Krasny napohlad a čiłe žiwjenje
Krótkopowěsće (29.12.20)
Infekcije dale přiběraja
Budyšin. Ličba na koronawirus schorjenych w Budyskim wokrjesu je so wčera wo 58 na dohromady 2 181 inficěrowanych zwyšiła. Jedyn pacient je zemrěł, 339 ludźi je so wustrowiło. Incidenca je snadnje woteběrała, na 100 000 wobydlerjow je so 450,66 natyknyło. Zhorjelski wokrjes, hdźež su wčera šćěpić započeli, informuje wo dohromady 4 741 infekcijach (+ 54), incidenca wučinja tam 426,5.
Statnik namołwja k solidariće
Budyšin. Předsyda Domowiny Dawid Statnik w na Youtube-kanalu třěšneho zwjazka přistupnej hodownej narěči k „solidariće z wutrobu a rozumom“ w zwisku z koronapandemiju namołwja. Najpozitiwniši aspekt lěta 2020 je za njeho, zo „njeje to serbske hižo pyšny připlack, ale zakładny kamjeń zhromadneje regionalneje identity“.
Wobrot jasnje stopnjowali
Žitawa. Zhotowjer tunkadłow Fit je nalěto na naprašowanje Sakskeje produkciju desinfekciskich srědkow zahajił. Tele rozšěrjenje sortimenta je předewzaću stopnjowanje lětušeho wobrota wo něhdźe 15 procentow wobradźiło, byrnjež wulki dźěl šaržow spočatnje darmotnje na přikład chorownjam dodawali.
Wichor wčera wobornikow zaběrał
Rjanu ideju wobdźiwali
Njewšědny Boži narodk w pawiljonje za hrodom swójby přiwabił
Pěskecy (aha/SN). Koronapandemija drje je nimale wšě zwučenosće změniła, přiwšěm běchu hody za wjele ludźi měrny swjedźeń pokoja a wjesela. Nimale wšitcy so po tym mějachu, zo njemóžachu so kaž hewak swójby po zwučenym wašnju we wjetšich kruhach z přiwuznymi zetkawać. Wosebje młode swójby ze swojimi dźěćimi so hewak patoržicu do wobradźenja wječor w našich cyrkwjach při Božim narodku pomodla a wumóžnika witaja.
To je tež z dawnej tradiciju pola Šwejdźic w Pěskecach. Staršej Michaela a Andreas ze swojimi dźěćimi Pawlom, Jasmin a Sofiju chcyštaj so tež lětsa po tym měć. Tola natykliweje chorosće dla chcyštaj wobeńć zetkanja z wjele ludźimi. Tuž bě jimaj přewšo witana móžnosć sej dojěć do Worklec. Dźiwajo na njewšědnu situaciju měješe tam Towarstwo kapałki Marije maćerje Božeje spomóžnu ideju, wuhotować Boži narodk na městnje, hdźež so natyknjenje miniměruje a tola so skići móžnosć k zhromadnemu modlenju. Za to hodźace městno bě tam pawiljon, bywša oranžerija w hrodowym parku.
Policija (28.12.20)
Dar wuspytać chcył
Kamjenc. K hodam darjeny e-scooter chcyše prěni dźeń hód 14lětny w Kamjencu wuspytać. Na Bambruchskej dróze pak jědźeše wón z nim wobsadce policajskeho awta runjewon do rukow. Zastojnicy porokowachu, zo njebě dwukolesaty nastroj zawěsćeny a pósłachu hólca domoj, wězo nóžkujo.
Mopedaj fuk
Wojerecy. Paduši, kotřiž su hodowne dny mopedaj typa Simson S 50 we Wojerecach a Niskej pokradnyli, su potrjechenym hodowne dny chětro skepsali. W času wot póndźele hač do soboty zadobychu so cuzy do garaže we Wojerecach a spakosćichu z njeje módry moped. Wón drje njebě přizjewjeny a njeměješe tuž tež žanu zawěsćensku značku. Přiwšěm trochuje jeho wobsedźer hódnotu jězdźidła na 2 500 eurow. Na Simson S 51 N měrjachu so paduši prěni dźeń hód w Niskej a pokradnychu bruny moped w popołdnišich hodźinach z dwora statoka. Na jězdźidle přičinjena zawěsćenska značka: 719 UXT. Po informacijach policije trochuje wobsedźer hódnotu mopeda na něhdźe 1 000 eurow. Za woběmaj jězdźidłomaj policija nětko slědźi.
W mnohich katolskich kaž ewangelskich wosadach su ludźo najebać ...
Přihotuja šćěpjenski centrum
Wobmjezowanja dale płaćiwe
Drježdźany/Budyšin (SN/JaW). Tuchwilne wobmjezowanja za škit před koronawirusom su tež silwester a nowe lěto płaćiwe. To wobkrućištej nam na naprašowanje Sakske ministerstwo za socialne a towaršnostnu zhromadnosć a Budyski krajnoradny zarjad. Tak smědźa so dale maksimalnje pjeć wosobow z dweju domjacnosćow zetkać. „Dźěći hač do 14 lět k tomu njeliča. Za rjadowanja na městnje rozsudne su płaćiwe postajenja w jednotliwych zwjazkowych krajach“, rěka k tomu na internetnej stronje zwjazkoweho knježerstwa, na kotrež wobě zarjadnišći skedźbnjatej. Dale w postajenju rěka, zo „je na silwesterskim dnju a nowe lěto po wšej Němskej zakazane, so zhromadźować“.
Patoržicu so podźakowałoj
Krótkopowěsće (28.12.20)
Incidenca hód dla woteběrała
Budyšin. Přez hody je ličba na koronawirus schorjenych w Budyskim wokrjesu wot minjeneje srjedy hač do wčerawšeho wo 665 woteběrała. To zwisuje z wobmjezowanymi testami. W samsnej dobje bě 32 smjertnych padow, cyłkownje je to nětko 246. Wčerawša incidenca je 461,37. Zhorjelski wokrjes informuje wo 774 zwěsćenych natyknjenjach wot 23. decembra. Incidenca bě wčera 408,35.
Spěchowanske srědki do Wojerec
Drježdźany/Wojerecy. Wojerowski klinikum łužiskeje jězoriny je tele dny spěchowanske srědki we wobjimje 100 000 eurow dóstał. Pjenjezy podpěruja studiju wuwjedźomnosće za projekt „Virtual Smart Hospital Wojerecy“. Tajki móže wažny twarski kamušk za naslědne strukturne wuwiće za město Wojerecy a za dalewuwiće Łužicy na region wočerstwjenja a strowoty być, rěka ze sakskeho ministerstwa za regionalne wuwiće.
Wuspěšne lěto za twornju Fit
