Na Radworskej farje su předwčerawšim Bosćij Ješka, farar Beno Jakubaš, Achim Wowčer, Michaelis Šusterowa a Andrea Pawlikowa (wotlěwa) koporowej rołce za kulu wěže tamnišeje farskeje cyrkwje zaso pjelnili. Nimo dokumentow, kotrež w nimaj hižo wot lěta 1896 resp. wot lěta 1964 běchu, přidachu někotre dalše. Mjez nimi je spis z wopisanjom aktualneho stawa wosady a wažnych podawkow zašłych 56 lět. Tomu přidachu rjad časowych dokumentow, mjez druhim aktualne wudaća tydźenika ­Katolskeho ­Posoła, měsačnika Pomhaj Bóh a Serbskich Nowin. Foto: Bosćij Handrik

Kriza žada sej kreatiwitu, a kaž rady bychmy wšitcy skónčnje „normalitu“ znowa witali, měli kritiku kabaretista Andreasa Rebersa chutnje brać: Prašenje njeje, kak po koronje, ale z njej postupujemy. Po cyłej Němskej wo tym rozmysluja, kak hodźeli so lětsa adwentne wiki zarjadować. Je wotprajić po wšěm zdaću žana alternatiwa njeje, štož tež rěka, zo je kołbaska mjez lunkami horceho wina wosrjedź kobołkoweho dyma za system njeparujomna. Hač w adwenće potom woprawdźe alkohol porjedźa abo hač mamy so – kaž to na přikład w Bayerskej planuja – z punšom spokojić, znajmjeńša w sprjewinym měsće Budyšinje tuchwilu hišće jasne njeje. Wěste pak je: Wjacławske wiki budu, hdyž tež nic w starym měsće, ale na mjeztym 30 lět zaso pacifistisce „Třělnišćo“ mjenowanym bywšim Naměsće měra. Kak derje, zo su so wikowarjo a gastronomojo Bohateje hasy ponowjenju milinowoda runje dohodowneho spektakla dla wuspěšnje wobarali. Bosćan Nawka

Ličba natyknjenjow přiběra

Budyšin. W Budyskim wokrjesu zwěsćichu wčera sydom dalšich z koronawirusom natyknjenych wosobow. Dohromady je jich po wčerawšim stawje 615. Ličba schorjenych je wo pjeć na 43 při­běrała. W postajenej karantenje bě 162 wobydlerjow (+25). Srjedu su 25 testow přewjedli. Strašnosće koronapandemije dla wažne mnóstwo nowonatyknjenjow w minjenych sydom dnjach je 35 na cyłkowne wokrjesne wobydlerstwo.

Chcedźa Zahrodku wozrodźić

Wojerecy. W Delnim Wujězdźe planuja klětu składnostnje jeho 100. róčnicy wobstaća towarstwo Zahrodka wozrodźić. To potwjerdźi Sonja Hrjehorjowa, regionalna rěčnica Domowiny za teritorij župy „Handrij Zejler“, wčera na wuradźowanju regionalnych rěčnicow we Wojerecach. Tež z rěčnym kursom a wustajeńcu wo serbskich stawiznach chcedźa serbskosć we wsy zaso wožiwić.

Wobčušlenje wobmjezowane

Na swoju kóždolětnu kubłansku wuprawu podachu so čłonojo Budyskeje župy „Jan Arnošt Smoler“ minjeny kónc tydźenja. Dohromady 37 čłonow z dźewjeć Domowinskich skupin a towarstwow dojědźe sej najprjedy z Budyšina do Hrodźišća. Tam wopytachu row serbskeho ludoweho wuměłca Měrćina Nowaka a počesćichu jeho z basnju a spěwom w spominanju na 30. posmjertniny lětsa w juliju. Po tym wjedźeše hrabja Beat von Zenker skupinu hosći po swojim Hrodźišćanskim hrodźe. Po wobjedźe we Wichowje dowjeze nas bus do Radworja, hdźež dožiwichmy w hosćencu „Meja“ serbski program z Moniku a Bjarnatom Cyžec. Mjez druhim předstajištaj wonaj z pomocu klankow serbsku katolsku drastu ­a rozłožowaštaj zajimawostki wo nałožkach a serbskich swjedźenjach. Při tym dachmy sej kofej a tykanc słodźeć.

Na program přidružichu so nam čłonojo Domowinskeje skupiny z delnjołužiskeho Turjeja. Woni běchu samsny dźeń na wuprawje w Hornjej Łužicy a wopytachu mjez druhim Muzej Měrćina Nowaka w Njechornju. Róža Pinkawina wodźeše jich po domje a powědaše jim ze žiwjenja Njechorńskeho.