Krótkopowěsće (10.06.21)
Incidenca dźeń a snadniša
Budyšin/Zhorjelc. W Budyskim wokrjesu zličichu hač do wčerawšeho dohromady 18 dalšich infekcijow z koronawirusom. Z cyłkownje 43 stacionarnje zastaranych 14 pacientow intensiwnje hladaja, dwanaćo su zemrěli. Incidenca je so na 20,3 znižiła. W Zhorjelskim wokrjesu zwěsćichu štyri nowonatyknjenja a dwaj smjertnej padaj. Dale woteběraca incidenca tam aktualnje 7,5 wučinja.
Kritizuja wólbne procedere
Budyšin. W lisće Domowinje kritizuja někotři jeje čłonojo přećiwki we wustawkach towarstwa, předewšěm wólbne procedere delegatow na hłownu zhromadźiznu. Woni sej žadaja, předsydstwo njewuwjazać, doniž njejsu přećiwki wujasnjene. Domowina skedźbnja na bazodemokratiski princip a zo jako zarjad njediktuje, kak towarstwa swojich delegatow wola. Jeli so něchtó postorkuje, njech to najpjedy w towarstwje tematizuje.
Wobchad w Hřensku wolóžić
Ćahi w hinašich časach jězdźa
Kamjenc. Twarskich dźěłow dla so jězbny plan ćahow wot zwučenych časow trochu wotchila. Hač do 26. junija su časy wšelakich wot- a přijězdow ćaha z Kamjenca do Drježdźan a wróćo kaž tež na čarje Kinspork–Drježdźany změnjene. W nocy płaći wosebity twarski jězbny plan. Zdźěla maja sobujěducy bus wužiwać. Kolesa móža tam jenož we wobmjezowanej ličbje sobu brać. Na linijomaj RB 34 a RB 33 proša wobkedźbować pokiwy we wobchadnych powěsćach a informacije na aktualnych jězbnych planach, pod , pod serwisowym telefonowym čisłom 03 41 / 2 31 89 82 88 abo pod .
Rjadowanje zaso změnjene
Policija (09.06.21)
Kedźbliwi swědcy pomhali
Wojerecy. Na Edisonowej we Wojerecach su předwčerawšim wječor wokoło wosmich třo swědcy zadobyće do lawby wobkedźbowali. 34lětny muž bě so tam namócnje zadobył a wšelake kamory přerył. Susodźa-zahrodkarjo słyšachu haru, chwatachu k potrjechenemu objektej a su zadobywarja narěčeli. Tón skoči z woknom a chcyše z kolesom ćeknyć, padny pak do bliskeje hrjebje. Swědcy móžachu jeho zadźeržeć a wołachu policiju, kotraž so dale wo naležnosć staraše. Při přepytowanju drje njejsu zastojnicy pola muža žanu rubiznu namakali, wón pak měješe nóž při sebi. Hač je to za chłostanje relewantne, statne rěčnistwo pruwuje.
Motorske do jeepa zrazyło
Ležownosć dale njejasna
Na stejnišćo noweje dźěćaceje dnjoweje přebywarnje so hišće njedojednali
Njeswačidło (JK/SN). Njeswačanska gmejnska rada njemóže so hišće na móžne stejišćo za nowu dźěćacu dnjowu přebywarnju dojednać. Po tym zo běchu so radźićeljo gmejny a fachowe wotrjady wokrjesa na njezjawnym posedźenju w meji intensiwnje a we wulkej formje z přihotami za twar noweje pěstowarnje zaběrali, njeje doskónčna ležownosć za projekt w Njeswačidle hišće wěsta. Na wčerawšim schadźowanju mějachu radźićeljo před sobu lisćinu z móžnymi městnosćemi, kotrež po wulkosći do prašenja přińdu. Za nowotwar trjebaja po słowach wjesnjanosty Gerda Schustera (CDU) znajmjeńša 5 000 kwadratnych metrow. Po něšto dlěšej diskusiji dojednachu so na to, tak mjenowane nowe abo srjedźne sportnišćo postajić jako zakład dalšeho planowanja. Radźićel Norbert Braun (Rjemjesło a přemysło) so runja někotrym dalšim za nje wupraji, skedźbnjejo na to, zo tam hižo trěbne medije leža a wotkryće ležownosće njeby gmejnu přewjele płaćiło.
Twarske dźěła na Chróšćanskej farskej cyrkwi Symana a Judy ...
Wuměłska twórba so znowa paliła
Krótkopowěsće (09.06.21)
Incidenca niska kaž hišće ženje
Budyšin. 13 nowych natyknjenjow z koronawirusom su wčera w Budyskim wokrjesu zwěsćili. Dale stej dwě wosobje zemrěłoj. Incidenca po informacijach Roberta Kochoweho instituta dale woteběra. Wottam zdźělichu za dźensa hódnotu 23, tak nisku kaž hišće ženje. Za Zhorjelski wokrjes podawa RKI hódnotu 12,3. Tam zwěsćichu wčera pjeć infekcijow, jednu z britiskej mutantu B.1.1.7.
Nora Schmid nowa intendantka
Drježdźany. Semperowa opera Drježdźany změje wot hrajneje doby 2024/25 nowu intendantku. 42lětna Nora Schmid naslěduje potom Petera Theilera, kotrehož zrěčenje w lěće 2024 wuběži. Z Berna pochadźaca hudźbna wědomostnica skutkowaše hižo w sezonje 2010/2011 na Sakskej statnej operje, a to jako šefdramaturgowka a wot 2012 přidatnje jako wosobinska asistentka intendantki.
Přećiwo drogowej kriminaliće
Policija (08.06.21)
Z městna njezboža ćeknyłoj
Wojerecy. We Wojerecach je njedźelu popołdnju na Teschenskej a samsny dźeń wječor na Halštrowskej k njezbožu dóšło. Mějićel na Teschenskej wotstajaneho Fiata bě zwěsćił, zo je wone wobškodźene. Dotal njeznate jězdźidło bě je tušěrowało a wěcnu škodu 1 500 eurow načiniło. 34lětny šofer awta marki Audi měješe na Halštrowskej tohorunja z dotal njeznatym skućićelom činić. Motorski bě na Audi zjěł, kotryž dyrbješe wobchada dla zastać. Škodowany poda so po zražce na bliske tankowanišćo, zo njeby městnosć njezboža blokował a zo by rozměr škody zwěsćił. Wón bě z toho wuchadźał, zo wodźer módreje MZ za nim jědźe. Tón pak bě so zminył. Na Audiju nastata škoda wučinja něhdźe 200 eurow. Policija přepytuje we woběmaj padomaj ćeknjenja z městna njezboža dla.
Z pokradnjenym awtom po puću
Čitarnja zaso wočinjena
Budyšin. Z negatiwnym koronatestom a z terminom hodźi so wot dźensnišeho zaso čitarnja Budyskeje měšćanskeje biblioteki wužiwać. Tam maja nimo normalnych dźěłowych městnow tež internetne a multimedijowe městna. Termin skazać móža zajimcy pod telefonowym čisłom 03591/ 534 809.
Rozšěrjeja časy testow
Smochćicy. Testowanski centrum na koronu w Smochćicach swoje dotalne wotewrjenske časy za wopytowarjow sawrijoweho parka rozšěrja. Kubłanišćo swj. Bena nětko wšědnje, wot póndźele hač do njedźele, stajnje hač do 13 hodź. ludźi na test wita. Póndźelu započinaja hižo rano w šesćich, dalše dny w sedmich, sobotu we wosmich a njedźelu w dźewjećich. Zajimcy dyrbja so přizjewić. Terminy posrědkuja z pomocu internetneho kalendra pod abo telefonisce pod čisłom 035935/220 (wot póndźele do pjatka wot 10 do 12 hodź.). Sobu přinjesć dyrbja zajimcy chorobnu kartku. Za negatiwny test dóstawaja woni digitalny a na papjerje wobkrućeny wuslědk. Ludźo ze symptomami schorjenja pak njeměli přińć, ale maja so hnydom na swojeho lěkarja wobroćić.
Ekskursija na hrodźišćo
