Skónčnje zaso do kina
Towarstwo njewuzamknyć
Prócuja so dale wo twar kolesowanskeje šćežki podłu hłowneje dróhi
Nowe Město (AK/SN). Sprjewinu dróhu na čarje Budyšin–Hamor–Slepo su podźělnje saněrowali. Tak rozšěrjena wjedźe Sprjewina dróha nětko tež po Nowym Měsće.
Na kromje wsy w gmejnje Sprjewiny Doł skutkuje wot lěta 2013 zapisane towarstwo Předźernja – wo naslědnym žiwjenju. Wone poskića zajimcam wobswětowe kubłanje, dźěćace campy, podijowe diskusije a dźěłarnički. Wot awgusta 2020 jězdźa elektrisce ćěrjene welotaksije po kolesowanskich šćežkach wokoło Běłeje Wody, Wojerec a Grodka. Čłonojo Nowoměšćanskeho towarstwa bychu tuž tajku šćežku witali, kotraž tež nimo jich ležownosće wjedźe. „Tola runje tam chcedźa so tajkeje wzdać“, kritizuje rěčnica towarstwa Friederike Böttcher. „To rěka, zo dyrbja sej welotaksije do směra na susodne Sprjejcy abo do Grodka planowanu wokrjesnu dróhu z nakładnymi awtami a dalšimi jězdźidłami dźělić, a te su zdźěla hač do 100 km/h spěšne. Strach njezbožow za čłowjeka je na tej čarje wosebje wulki.“
Wopačna lubosć k pječa wopušćenym młodźatam žada sej tójšto ...
Dobre wuchadźišćo
Město chce komuny zapřijeć
Wojerecy (AK/SN). Wojerecy chcedźa wokolne gmejny do strukturneje a energijoweje změny sobu zapřijeć. Tak ma nastać zhromadna Łužiska twornja tzwr, a to jako wobstatk Zastaranskich zawodow Wojerecy (VBH). Tónle zaměr su Wojerowscy měšćanscy radźićeljo na swojim wutornym posedźenju z třomi hłosawzdaćemi wobzamknyli. „Z Łužiskej twornju ma so zhromadne dźěło mjez komunami we wobłukach milina, płun, ćopłota, pitna woda a wopłóčki skrućić. Chcemy tworjenje hódnotow w regionje zesylnić“, potwjerdźi jednaćel VBH Wolf-Thomas Hendrich. Tak móhła so Łužiska twornja přichodnje wo wobswětlenje pućow w Sprjewinym Dole a Łazu starać a wo to, zo je we Łutach zastaranje z ćopłotu zawěsćene.
Serbski dźěłowy kruh radźićelam rozprawjał
Budyskej měšćanskej radźe je nowy předsyda dźěłoweho kruha za serbske naležnosće Benjamin Wirth rozprawu dźěławosće podał. Při tym naspomni wón ideje, kiž hodźeli so w přichodźe zwoprawdźić. Njezataji pak tež brachi, kotrež měli so wotstronić.
Budyšin (CS/SN). Benjamin Wirth zwěsći na wčerawšim posedźenju měšćanskeje rady w swojej zamołwitosći jako předsyda dźěłoweho kruha za serbske naležnosće Budyšina, zo so serbske swójby zaso do města nawróćeja. Za přičinu ma wón tudyšu dwurěčnosć a zo je móžno tu žiwu serbskosć dožiwić. „Jako město Budyšin mamy na přikład porno Choćebuzej woprawdźite lěpšiny“, Wirth zwurazni. Jeho zaměr je, zo so dwurěčnosć, kotraž dźě płaći jako pokazka na wosebitosć, samozrozumliwa stanje. Jako přikładaj mjenowaše předsyda dźěłoweho kruha hrajkanišćo „Sprejnik“, hdźež měli hišće stelu ze serbskim napisom stajić, kaž tež runoprawne serbsko-němske popisanje noweje mjećenskeje mašiny Budyskeje wobdźělenskeje a wobhospodarjenskeje towaršnosće.
Krótkopowěsće (01.07.21)
Maja crossmedia-redaktorku
Budyšin. Redakcija Serbskich Nowin ma nowu crossmedia-redaktorku. Budyšanka Božena Šimanec ma wot přichodneje póndźele prezentacije jeničkeho serbskeho dźenika na polu nowych medijow a socialnych syćow wutwarić a zesylnić. Dotal skutkowaše mać dweju dźěsći w Kamjenicy we wobłuku zjawnostneho dźěła a marketinga a ma dobre znajomosće content-managementa.
Wobmjezowani zběhnjenej
Budyšin/Zhorjelc. Wjacore koronaprawidła w Budyskim wokrjesu wot dźensnišeho wjac njepłaća, tak tež wobmjezowanje kontaktow za priwatne zetkanja a powšitkowna winowatosć, nahubnik wužiwać. We wokrjesu wozjewichu wčera šěsć natyknjenjow, incidenca po RKI je dźensa 4,7. Zhorjelski wokrjes njeměješe žanu nowu infekciju, dodatny smjertny pad z 19. junija bu podaty. Incidenca po RKI je tam dźensa 2,0.
Skórnik kóncuje Łužiske hory
Smědźa nětko nuzniki twarić
Budyšin (SN). Při Budyskim spjatym jězoru smědźa skónčnje spěchowanske srědki wužiwać. Sakske statne ministerstwo za hospodarstwo, dźěło a wobchad je sprjewine město z listom informowało, zo přewostaji jemu ze spěchowanskeho programa „Polěpšenje regionalneje hospodarskeje struktury‘‘ 176 496 eurow. Pjenjezy su myslene za twar zjawneje připrawy nuznikow při spjatym jězoru.
Wotpowědnu próstwu wo „spěchowanje předewzaćow k polěpšenju hospodarstwu bliskeje infrastruktury (GRW Infra)“ je Budyšin hižo spočatk lěta stajił. Wobydlerjo a měšćanscy radźićeljo běchu sej tajku inwesticiju přez lěta žadali. Nětko smědźa předewzaće skónčnje zwoprawdźić. Ze spěchowanskej próstwu je město Budyšin hižo kompletny projekt sobu zapodało. To rěka, zo móže twarske naprawy prawje bórze wupisać. Hdy budu nuzniki potom dotwarjene, njehodźi so wězo hišće rjec.
Płaćić ma projekt 196 107 eurow. Dźakowano 90procentowskemu spěchowanju ze stron Swobodneho stata Sakskeje budźe etat města lětsa jeno z 19 611 eurami poćeženy.
Policija (30.06.21)
Ćežke njezbožo na A 4
Słona Boršć. Wčera krótko do połnocy sta so na awtodróze A 4 mjez Hornim Wujězdom a Słonej Boršću ćežke wobchadne njezbožo. Z dotal njeznateje přičiny zrazy transporter marki Renault za wotpočnišćom Hornja Łužica do transportera marki Fiat. Renault na to z dróhi zjědźe a prasny do štoma, při čimž so wodźer awta ćežko zrani. Šofer Fiata wosta njezranjeny. A 4 běše tři a poł hodźiny dospołnje zawrjena a wobchad so po dołhosći pjeć kilometrow kopješe. Policija přičiny njezboža nětko přepytuje.
Historisku bróžnju w Trjebinje zachowaja
Kónc awgusta chcedźa w Trjebinje zachowanu, wjace hač 80 lět staru, z hliny twarjenu bróžnju poswjećić. Tak dóstanje wjes w srjedźnej Łužicy cyle wosebity pomnik.
Trjebin (AK/SN). Gmejna Trjebin wuchowa pomnikoškitanu bróžnju, kotraž pochadźa z lěta 1935. Bróžnja steješe we wudobywanišću 1 brunicoweje jamy Wochozy. Dźakowano LEAG móža ju nětko za přichodne generacije zachować. Energijowy koncern da bróžnju na statok Hanza Šustera w Trjebinje přestajić a to zapłaći. Dźe wo bróžnju na něhdyšej ležownosći Za Goru 18, kaž Trjebinski wjesnjanosta Waldemar Locke (CDU) w aktualnym hamtskim łopjenu zarjadniskeho zwjazka Slepo potwjerdźa. „Twarske předewzaće Harald Rösch z Dźěwina so wo to prócuje pomnik wěcywustojnje restawrować a znowa natwarić. „Po zakónčenju twarskich dźěłow je planowane twarjenje 29. awgusta z gmejnu, wobydlerjemi a wopytowarjemi swjatočnje poswjećić.“
