Rjane ideje rodźili
Dialog na městnje njemóžeš zarunać
Digitalizacija mnohich žiwjenskich wobłukow wotkrywa nowe nazhonjenja, móžnosće a perspektiwy. „Wona je nam wažna šćežka, nic pak złoty puć do přichoda. Móžemy bjeze wšeho wuzwolić“, podšmórny sociologa dr. Christian Papsdorf z TU Kamjenicy na forumje „Digitalny přichod“ w Běłej Wodźe.
Běła Woda (AK/SN). Zarjadowanje minjeny štwórtk w měsće škleńčerjow słuša do rjadu „Kontrowersnje na městnje – fakty, tezy, argumenty“. Sakska krajna centrala za politiske kubłanje bě hromadźe z ludowej uniwersitu Třikrajowy róžk a ze sociokulturnym centrumom Telux diskusiju přihotowała, kotraž wotmě so lětsa prěni raz jako prezencne zarjadowanje.
Krótkopowěsće (13.07.21)
49 komunow bjez korony
Budyšin/Zhorjelc. W Zhorjelskim wokrjesu je incidenca po RKI dale na nuli. Budyski wokrjes informowaše wčera wo dodatnym přizjewjenju dweju korona-natyknjenjow z minjeneho tydźenja. Incidenca po RKI je tu dźensa 2,3. Něhdźe 111 000 wosobow je prěni raz šćěpjenych, 90 000 hižo dospołnje. 49 ze 57 komunow Budyskeho wokrjesa je aktualnje bjez korony, kaž wčera rěkaše.
Šiman přiradźe dale přisłuša
Budyšin/Berlin. Zapósłanc Sakskeho krajneho sejma Marko Šiman (CDU) přisłuša hač do klětušeho přiradźe Němsko-čěskeho rozmołwneho foruma. Zwjazkowy wonkowny minister Heiko Maas (CDU) je Serba znowa powołał. Gremij sta so w swojim nimale 25lětnym skutkowanju z krutym wobstatkom němsko-čěskich stykow. Zhromadne dźěło dale zesylnić je tež dale zaměr Šimana.
Funkcionaram režima nišu rentu
Policija (12.07.21)
Sydom wosobow zranjenych
Wojerecy. Ćežke wobchadne njezbožo sta so sobotu popołdnju na zwjazkowej dróze B 97 we Wojerecach při wotbóčce do Kulowa. Tam njebě 42lětny wodźer Renaulta předjězbu 33lětneje šoferki Mitsubishija wobkedźbował a zrazy jej do awta. Při tym so sydom wosobow zdźěla ćežko zrani. Wěcnu škodu trochuja na něhdźe 20 000 eurow. Dróha bě wjacore hodźiny zawrjena.
Swěrna serbskemu žiwjenju
W Běłej Wodźe swjeći dźensa Marja Henčlowa 90. narodniny. Rodźena w Trjebinje je wona tam do šule chodźiła a pozdźišo w ratarstwje dźěłała. Swojej ródnej wsy a Slepjanskej wosadźe je cyłe swoje žiwjenje swěrna wostała.
Dlěje hač 70 lět je Marja Henčlowa Trjebinskej Domowinskej skupinje a tamnišemu serbskemu žiwjenju swěrna, dźensa je najstarša čłonka wjesneje Domowinskeje skupiny. Zachować serbsku rěč, nałožki a kulturu běchu jej najwažniši wobsah žiwjenja. Wot wšeho spočatka přisłušeše tež Slepjanskim kantorkam. Z nimi je spěwne herbstwo Slepjanskeho regiona daloko za łužiskej mjezu šěriła. We wsy sej jubilarku wulce česća. W kóždejžkuli rozmołwje z njej sy jeje žiwjensku energiju začuwał, kotruž je stajnje tež na wustupach kantorkow wuprudźała.
Mjeztym sej staroba a strowotny staw Marje Henčloweje swój tribut žadatej, tak zo je wona do bydlenja z wobstajnym hladanjom w Běłej Wodźe přećahnyła. Tam so jeje dźěći wo nju staraja a z njej dźensniše 90. narodniny w małym swójbnym kruhu swjeća. Tež někotryžkuli Trjebinjan na nju dźensa spomina. Jost Schmidtchen
Štó smě k wólbam nastupić?
W zwisku z komunalnym dźěłom w městach a gmejnach nastawaja zas a zaso prašenja, čehodla wobsteja wěste rjadowanja, kak je to a tamne zakonsce předpisane a štó ma poprawom kotre prawa. Na tajke a podobne prašenja wotmołwjamy w małej seriji. Naš awtor je bywši wjelelětny předsyda zarjadniskeho zwjazka Při Klóšterskej wodźe Alfons Ryćer. (6)
Wólbna perioda gmejnskich radow traje w Sakskej pjeć lět. Wólby wotměwaja so stajnje mjez 1. aprylom a 30. junijom. Wone maja so najpozdźišo 90 dnjow do wólbneho dnja zjawnje wupisać. Kandidować smě kóždy, kiž je znajmjeńša 18 lět stary a w gmejnje bydli. Ze zapósłancom njesmědźa być wjesnjanosta a přistajeni gmejny abo zarjadniskeho zwjazka, kotremuž gmejna přisłuša. Štóž za čas wólbneje periody swoje hłowne bydlenje w gmejnje wotzjewi, zhubi runočasnje tež mandat w gmejnskim parlamenće. W praksy so tajke něšto tež časćišo stawa.
Na nawsy wjeselo knježiło
Serbski domizniski dźeń 2021 we Wojerecach a na Horach wotměli
Wojerecy/Hory (AK/SN). Serbski ewangelski domizniski dźeń Wojerowskeho regiona zesylnja zhromadnosć, dopomina na historiske korjenje, sensibilizuje za identitu a skruća wěru. Tole podšmórny superintendent na wuměnku Jan Malink wčera we Wojerowskej Janskej cyrkwi. Swjedźensku Božu słužbu je Židźinski chór ze serbskimi kěrlušemi wobrubił. Domizniski dźeń so wot lěta 2007 wotměwa, loni pak dyrbješe korony dla wupadnyć.
Po kemšach jědźechu wobdźělnicy wčera z konjacymi zapřahami na Hory. Po puću pozastachu při lipje w Židźinom. Wo hudźbny přewod starachu so Rakečanscy dujerscy hercy. Na Horjanskej nawsy dožiwichu wobdźělnicy wjele zabawy a zhromadnosće. Jich zawjeselichu dźěći pěstowarnje „Lutki“ z pěsnjemi, basnjemi a rejemi. Wone wustupichu jako lutki kaž tež w narodnej drasće Wojerowskeho regiona. Wotewrjenej běštej tohorunja Patokec kładźita bróžnja a burski muzej.
Radźićeljo wuradźuja
Radwor. Přichodne zjawne posedźenje Radworskeje gmejnskeje rady wotměje so srjedu, 14. julija, we 18.30 hodź. w jědźerni Radworskeje šule. Mjez druhim porěča tam wo kóštach wobhospodarjenja pěstowarnjow a wo nakupje jězdźidła za komunalny twarski zawod. Zajimcy su wutrobnje witani.
Prěnje stajne blido
Budyšin. Po wjacorych měsacach přestawki přewjedźe Budyski měšćanski zwjazk CDU srjedu, 14. julija, wot 19 hodź. prěnje stajne blido CDU w tymle lěće. Zarjadowanje wotměje so w hosćencu Sprjewina pensija na Rybarskej hasy 6. Tam chcedźa sej mysle wuměnjeć wo najwšelakorišich temach, kotrež su ludźi w minjenym času zaběrali. Přizjewjenje njeje trěbne.
Raj bajkow zaso přeproša
Nowa hěta za Wjacławske wiki
Budyšin (CS/SN). Ze sydom přihłosowanjemi a jednym wzdatym hłosom je financny wuběrk Budyskeje měšćanskeje rady na swojim zašłym posedźenju 4 000 eurow za „swjedźeń zetkanja“ přizwolił. Zarjadowanje ma so 18. septembra we wobłuku Interkulturneho tydźenja wotměć. Zastupjerjo wjacorych narodow poskićeja zajimowanym wobydlerjam tón dźeń wšelake zaběry, mjez druhim dźiwadło, modowu přehladku a dźěćacu zabawu. Partnerstwo za demokratiju swjedźeń podpěruje, towarstwo Witajće w Budyšinje jón organizuje. Samsny podawk běchu 2019 hižo raz organizowali a z nim dobry wothłós žnjeli.
