Při zdźěłanju hospodarskeho plana 2021 za město Kulow začuwaja tam nětko wuskutki koronapandemije. Přiwšěm maja přichodnje wulke twarske předewzaće planowane.
Kulow (AK/SN). Na zašłym posedźenju Kulowskeje měšćanskeje rady su jeje čłonojo lětuši hospodarski plan města jednohłósnje wobzamknyli. Předwidźane bě to hižo za kónc minjeneho lěta. Hakle spočatk 2021 pak wšitke trěbne ličby předležachu, komornik Thomas Woelke radźićelam zdźěli. Plan wopřijima dohromady 18,5 milionow eurow. Pod smužku steji deficit něhdźe 200 000 eurow. Sadźby ze ležownostny a přemysłowy dawk so njezměnja.
„W lětomaj 2020 a 2021 so wuskutki pandemije wotbłyšćuja“, rěka w rozprawje k hospodarskemu planej. Při přihotach na lěto 2020 běchu hišće z toho wuchadźeli, zo wobjim přemysłoweho dawka wobstajnje dale přiběra. Ale hižo w běhu lěta dyrbjachu zwěsćić, zo wón wo 35 procentow woteběra. Z wosebitymi připokazankami móžachu tři štwórćiny deficita wurunać.
