Nowe kompjutery zarjadowali
Ralbicy (JR/SN). Na Serbskej wyšej šuli Ralbicy su wuknjacy rjadownje 5-1 wčera nowe kompjutery zarjadowali. Zhromadnje z towaršnikom Halštrowskeje firmy diversys.IT Heikom Höhnu, sobudźěłaćerjom firmy Bertom Harigom a wučerjomaj Křesćanom Zahrodnikom a Janom Rjedu smědźachu šulerki a šulerjo kompjutery zešrubować, kable připinyć a dźěłowy system instalować. Pozdźišo zarjadowachu wšelake kompjuterowe programy, mjez druhim software za pisanje, kalkulacije, datowe banki a prezentacije kaž tež CAD/CAM program. Z nim móža wšelakore motiwy a objekty programěrować, kotrež dadźa so w techniskim centrumje na CAD/CAM-mašinje do drjewa abo metala frezować.
Prědku a zady njedosaha
Pomocne pjenjezy sprawnje rozdźělić žana lochka naležnosć
Njeswačidło (JK/SN). Sakske komuny so wjesela, hdyž dóstanu dale pawšalne spěchowanje statneho knježerstwa k skrućenju wjesneho ruma. Pawšalu Sakska tež lětsa zaso płaći, gmejny pak steja před prašenjom, kak pjenjezy z dobrym wuskutkom rozdźělić.
Z picowanjom swojich třoch młodźatow matej baćonaj w Němcach ...
Zawěra dopomina na stawizny
Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa Lejnjanski hosćenc „K lipje“. (4)
Lejnjanski hosćenc „K lipje“ při dróze mjez Kamjencom a Budyšinom njeje jenož prawa adresa lubowarjam słódnych jědźow, ale tež za stawiznisce zajimowanych. Znate je, zo steješe na samsnym městnje hižo spočatk 19. lětstotka přićahliwy hosćenc. Tam zetkachu so 17. měrca 1848 zastupjerjo burow z 30 klóšterskich wsow, zo bychu swoje žadanja klóštrej Marijinej hwězdźe zwuraznili. Bě to spočatk rewolucionarnych njeměrow we Łužicy.
W septembrje 1877 bu na žurli Lejnjanskeho hosćenca prěnja serbskorěčna dźiwadłowa hra na wsy předstajena. Zarjadowanje serbskich studentow a čłonow Chróšćanskeho towarstwa Jednota dožiwi tehdy wjace hač 200 zahorjenych přihladowarjow. Tafla dźensa hišće na to dopomina
Město dyrbi chětro lutować
Tak mjenowane tučne lěta města Budyšina su wočiwidnje nimo. Nětko dyrbi komuna lutować, a to nic přemało. Z tym dyrbjachu so wčera radźićeljo města na swojim posedźenju rozestajeć.
Budyšin (CS/SN). Na wčerawšim posedźenju Budyskeje měšćanskeje rady je financny měšćanosta dr. Robert Böhmer swoje namjety k hospodarskej konsolidaciji předstajił. W etaće sprjewineho města je něhdźe 3,5 milionow eurow wulka dźěra. Dźěl naprawow hodźał so we wobłuku zarjadnistwa zwoprawdźić, tamnemu dźělej dyrbja měšćanscy radźićeljo přihłosować. W času krizy dyrbi so město znowa wusměrić, kaž dr. Böhmer rjekny, a při tym priority sadźeć. K nim słušeja na kóždy pad šule a dźěćace dnjowe přebywanišća, w kotrychž njeměli lutować.
Přichod KaBi pod třěchu OLK
Budyšin (SN/at). Hornjołužiske kliniki ptzwr (OLK) stanu so z nowym mějićelom Kamjenskeje kubłanskeje towaršnosće ptzwr (KaBi). Wokrjesny sejmik je na swojim posedźenju minjenu póndźelu předani dospołnych wobchodniskich podźělow Budyskeho wokrjesa přihłosował. Kaž zastupowacy krajny rada Udo Wićaz (CDU) nowinarjam rjekny, maja z OLK partnera, kiž je kmany tuchwilne potenciale KaBi wužiwać a wutwarjeć. Předań bě trěbna, dokelž zaměr towaršnosće při załoženju 1992, posłužby zaručić na polu wu- a dalekubłanja dorosćenych a wosebje spěchowanja potrěbnych młodostnych, dźensa wjace w srjedźišću jeho skutkowanja njesteji. Mjeztym koncentruje so KaBi na zastaranje z jědźu, čehoždla bě so wokrjes za kupcom za swójske podźěle na předewzaću rozhladował.
Klětu 1. januara OLK KaBi ze wšitkimi tuchwilnymi sobudźěłaćerjemi nimo jednaćelki přewozmje. Jako riziko za kupca móhł so špatny twarski a techniski staw produkowanišća w Kamjencu wopokazać.
Krótkopowěsće (22.07.21)
Dwě koronanatyknjeni
Budyšin/Zhorjelc. W Hornjej Łužicy je incidenca dale na niskim niwowje. Roberta Kochowy institut je dźensa za Budyski wokrjes hódnotu 2,3 podał, za Zhorjelski 1,2. Budyski krajnoradny zarjad informowaše wčera wo dwěmaj natyknjenjomaj z koronawirusom. We wokrjesu Zhorjelc wčera žana infekcija njebě, zwěsćili pak su tam w dalšim, hižo wobkrućenym padźe delta-wariantu.
Lubijčan sobu wicemišter swěta
Drježdźany/Lubij. Silvius Perrert, šuler Lubijskeho Gymnazija bratra a sotry Scholl, je ze štyrjomi towaršemi z Kronacha, Lörracha, Weidena a Hamelna slěbornu medalju na wirtuelnym swětowym cupje w fyzice (International Young Physicists Tournament) dobył. 17lětny přisłušeše narodnemu mustwu Němskeje, kotrež bě z Bad Honnefa po pjeć kołach wo dobyće wojowało, kaž kultusowe ministerstwo rozprawja.
CO2-bilanca wozjewjena
Na jězbje z čołmom do raja bajow
Nimale 60 wobdźělnikow Chróšćanskeho wjesneho towarstwa Domizna a Kamjenskeje župy „Michał Hórnik“ poda so minjenu sobotu na wuprawu do Bórkowow. Jako so wobdźělnicy popołdnju při busowym zastanišću w Chrósćicach zetkachu, nochcyše nichtó tak prawje wěrić, zo planowane čołmikowanje woprawdźe budźe, wšako runje sylne zliwki zachadźachu. Před Choćebuzom pak so wulětnikarjam hižo słónco směješe, a w Bórkowach jenož hišće někotre łužički na dešćikojty dźeń dopominachu.
W Bórkowach poskića delnjołužiske zapisane kulturne towarstwo Studnja wosebitu dźiwadłowu jězbu z čołmikom do raja bajow. Na třoch čołmach dožiwi tuž skupina Hornjoserbow na hodźinje trajacej jězbje bajowe postawy kaž błudničku, wódneho muža a připołdnicu. Tele postawy a dalši su zdźěla tež delnjoserbsce rěčeli a spěwali. Wosebitosć tamnym turistam zawěsće bě, słyšeć z nimo jěducych čołmow rjane hornjoserbske pěsnje, kotrež sej wulětnikarjo zhromadnje zaspěwachu.
Poselstwo solidarity
Z akciju „Wojerecy strowja Mosambik“ na podawki 1991 dopominali
Wojerecy (AK/SN). Wjace hač sto wobydlerjow je so minjeny pjatk na njewšědnej akciji před Wojerowskej Łužiskej halu wobdźěliło. We wulkich pismikach bě tam na zemi čitać „HOYERSWERDA SAUDA MOCAMBIQUE“ (Wojerecy strowja Mosambik). Z tymile słowami solidarizowachu so z něhdyšimi mosambikskimi zrěčenskimi dźěłaćerjemi. Po wukročenjach přećiwo wukrajnikam 1991 dyrbjachu woni chcyjo nochcyjo město wopušćić. „Dopominamy na to a so tak z tehdyšimi potrjechenymi solidarizujemy“, podšmórny Cindy Paulick jako sobuorganizatorka z iniciatiwy za ciwilnu kuražu. Sobu skutkowali su zastupjerjo towarstwow, politiskich stron, sportowych skupin, wohnjoweje wobory a mnozy dalši. „Chcemy wědu wo tehdyšich podawkach žiwu dźeržeć. Tu njeńdźe wo prašenje winy, ale wo zamołwitosć“, praji dalša organizatorka Sabine Proksch.
Policija (21.07.21)
Twarski grat a material kradnyli
Wojerecy. Paduši běchu w nocy wot minjeneje njedźele na póndźelu we Wojerecach po puću. Woni měrjachu so na wšelki grat a twarski material, kotryž namakachu w pódlanskim twarjenju na kromje města. Hódnotu rubizny trochuje policija na něhdźe 2 000 eurow. Wěcna škoda wučinja dwaceći eurow.
