Zetkawać so a nakupować (1)
Na wsy wobchod měć dźensniši dźeń wjace samozrozumliwe njeje. We wobłuku lětušeho lětnjeho seriala smy so na wsach rozhladowali, zo bychmy swojim čitarjam tón abo tamny wjesny wobchod předstajili.
Před lětami pytachu w Njebjelčicach zajimca, kiž chcył wjesny wobchod přewzać. Na zbožo njeje dołho trało a pola wjesnjanosty Tomaša Čornaka (CDU) tajki wo durje klepaše. Wuměnjenje wobchod přewzać běše, zo stanje so tón předawarnja biologisce plahowanych tworow a zdobom wjesne zetkanišćo. Spěšnje běchu sej wšitcy přezjedni, zo wotpowěduje tajki wotmysł předstawam gmejny, kotraž ma ekologiske a socialne wuwiće za wažne. Mjeztym je wobchod wosrjedź wsy z mjenom „Łužiska dworowa předawarnja“ daloko znaty. Mnozy kupcy pak mjenuja jón dale „wjesny wobchod“.
Krótkopowěsće (28.07.21)
Incidenca dale niska
Budyšin/Zhorjelc. W Budyskim wokrjesu je po informaciji Roberta Kochoweho instituta koronaincidenca na 3,0 woteběrała. Dwaj pacientaj staj so wustrowiłoj, jedna wosoba je so z wirusom natyknyła. W Zhorjelskim wokrjesu wučinja incidenca dale 1,6.
Nowe swětowe namrěwstwo
Fuzhou. Města Mainz, Worms a Speyer su jako kolebka europskeho židowstwa do lisćiny swětoweho namrěwstwa přiwzate. Na te wašnje je UNESCO židowske kulturne městna w Němskej prěni raz wuznamjeniła. Dale bu wčera tež delnjogermanski Limes jako dźěl mjezy antikskeho Romskeho mócnarstwa jako swětowe namrěwstwo připóznaty.
Přećiwo winowatosći šćěpjenja
Policija (27.07.21)
Wopita pomhać chcyła
Lubij. Konsekwency za wšěch wobdźělenych měješe wobchadne njezbožo předwčerawšim w Lubiju. Tam bě wječor krótko po sedmich Fiat 78lětneho muža do latarnje zajěł, dokelž njebě ručne spinadło prawje přićehnjene. Při pospyće, awto zadźeržeć, so muž a jeho 74lětna sobujěduca zraništaj. Na to so jeju dźowka rozsudźi, ze swojim Citroënom k městnu njezboža jěć. Tam policisća pola 44lětneje test alkohola přewjedźechu a zwěsćichu, zo měješe wona 3,9 promilow alkohola w kreji. Jeje jězbnu dowolnosć zastojnicy nablaku sćazachu. Wobeju rentnarjow dowjezechu do chorownje.
Nakładne awto do busa zrazyło
Po jednym lěće zaso swjećili
Serbske Pazlicy (jl/SN). Serbskopazličanska młodźina je minjeny kónc tydźenja na wjesny swjedźeń přeprosyła. Hinak hač zwučene wotmě so zarjadowanje při wjesnym haće blisko młodźinskeho zetkawanskeho centruma. Pandemije dla so organizatorojo rozsudźichu, wjesny swjedźeń mjeńši wuhotować. Z wjesnym hatom mějachu Serbskopazličenjo rjanu kulisu.
Po zwučenym wašnju su swjedźeń sobotu z natočenjom piwoweho suda zahajili. Wječor młodostni wopytowarjam lóštny program předstajichu. W nim je powědarka Liškec Hana w lěće 2081 wo pandemiji rozprawjała a so dopominała, kak běchu 60 lět do toho tři wirusy Corina, Carola a Viruslava zhromadnje z hygienu a šćěpjenjom wuhnali. Wo hudźbne wobrubjenje starachu so DJjojo Serbskopazličanskeje młodźiny. Najprjedy zahra Raphael Kral šlagry a oldije. Pozdźišo wjerćeštaj dalšej DJjej tačele z načasnej hudźbu. Zo je něhdźe 600 ludźi přišło, młodostnych chětro překwapi. Ćim bóle so woni wjeselachu, zo je zarjadowanje tajki wulki zajim zbudźiło.
Nowotwar najskerje tuńši
W Chwaćicach chce gmejna nowe dźěćace dnjowe přebywanišćo twarić dać
Wulka Dubrawa (CS/SN). Hnydom dwójce steješe na zašłym posedźenju Wulkodubrawskeje gmejnskeje rady wjesny dźěl Chwaćicy w srjedźišću wuradźowanja. Jónu jednaše so wo twarski plan za nowu bydlensku štwórć na kromje wsy za awtowym domom Bierke. Tam maja šěsć jednoswójbnych, jedna rynkowa a dwě dwójnej chěži nastać. Podłožki běchu w meji wupołožene. Nošerjo zjawnych zajimow mějachu lědma wobmyslenja. Jeničce přirodoškitny zwjazk sej žada, zo měli posudk zhotowić, hač su někajke družiny wohrožene. Dokelž planuja tři wišniny podrězać, dyrbja za nje jako narunanje nowe štomiki nasadźeć.
Wot wčerawšeho twarja
Žuricy (SN). Dróhotwarskej projektaj w Budyskim wokrjesu staratej so wot wčerawšeho wo poćeženje wobchada. Hač do 20. awgusta ponowjeja wokrjesnu dróhu K 7266 wot křižowanišća při Porchowskim přemysłownišću hač na kromu Žuric. Dróha wostanje cyły čas dospołnje zawrjena. Šoferojo měli B 98 a S 94 wužiwać. Hač do spočatka septembra ponowjeja tež Salowski puć w Kulowje, štož stanje so w dwěmaj twarskimaj wotrězkomaj. Tež ta dróha je w času twarskich dźěłow dospołnje zawrjena. Wokołopuć wjedźe wot Hózka přez Koćinu a Salow.
Za wulět so přizjewić
Čorny Chołmc. Drježdźanske towarstwo Stup dale planuje 15. awgusta přewjesć wulět do Čornochołmčanskeho Krabatoweho młyna. Nimo wodźenja a wobjeda je předwidźane, Drježdźanske dźěći serbsku narodnu drastu woblec a z nimi program nazwučować. Za to móža so zajimcy hač do kónca julija pola Jadwigi Pjacec pod telefonowym čisłom 0176/ 429 86 468 přizjewić. Wot 14.30 hodź. chcedźa publikumej swój program předstajić. Na to su potom wšitcy přeprošeni.
Něhdy klubowy hosćenc był
Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa Budyski hosćenc „Wjelbik“. (5)
Zakładne murje domow na Budyskej Žitnej su zdźěla 600 lět a starše. Pomjenowanje hasy swědči wo tym, zo běchu tam w srjedźowěku ze žitom wikowali. Ze starych zapiskow dale wučitaš, zo bě na Žitnej hasy dwěmaj zamóžnymaj měšćanomaj dowolene piwo warić. Jedyn z njeju bydleše na městnje, hdźež steji dźensa woblubowany serbski hosćenc „Wjelbik“. Dom bu kónc Druheje swětoweje wójny runja mnohim dalšim twarjenjam zničeny.
