Ćežišća hospodarskeho plana města Wojerec za lětsa a klětu předstajili

Wojerecy (AK/SN). Po dobrych nazhonjenja w lětomaj 2019 a 2020 chce město Wojerecy tež za 2021/2022 dwójny etat nastajić. Měšćanscy radźićeljo maja jón 11. meje wobzamknyć. Do toho budźe naćisk wot 20. do 28. apryla zjawnje wupołoženy. „Najebać napjate połoženje chcemy so ze strukturnej změnu dokładnje zaběrać. Za to planujemy hač do 2025 kóžde lěto 400 000 eurow. Te njesměmy šmórnyć“, wuzběhny wyši měšćanosta Torsten Ruban-Zeh (SPD) předwčerawšim na wobydlerskej zhromadźiznje. Něhdźe 20 zajimcow bě do awle Léona Foucaultoweho gymnazija přišło.

Jedne z ćežišćow etata je znowawožiwjenje industrijnišća w Ćisku. Hač do lěta 2025 chcedźa tam za nimale dźesać milionow eurow puće saněrować. Nimo toho planuja přemysłowe ležownosće wot priwatnikow wróćo kupić a je potom nowym inwestoram poskićeć. W tym zwisku so Ruban-Zeh nadźija, zo móža pola města dwě nowej městnje za hospodarske spěchowanje wutworić.