Podest město trawersow
Za přećelow sporta w Ralbičanskim stadionje dobre rozrisanje namakali
Ralbicy (JK/SN). Na minjenym posedźenju gmejnskeje rady Ralbicy-Róžant wuprajichu so wjesnjanosta Hubertus Ryćer (CDU) a dalši radźićeljo za to, podpěrać tamnišu sportowu jednotku při rozrisanju problema přihladowarskich trawersow. Wosebje hladajo na 100lětne wobstaće sportoweho towarstwa, kotrež chcedźa za dwě lěće swjećić, je pomoc gmejny trěbna. Tak wjesnjanosta radźićelow informowaše, zo su zhromadnje z komornicu Francisku Čapikowej hišće raz gmejnske financy přehladali a zwěsćili, zo hodźa so aktiwity projektoweje skupiny pod nawodom inženjera Stanija Statnika z 20 000 eurami podpěrać. To přitomneho inženjera wulce zwjeseli. Hromadźe z dalšimi čłonami projektoweje skupiny běchu wo nowych trawersach rozmyslowali a su dobre rozrisanje namakali.
Samo jězby z kuču poskićeja
Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa hotel a hosćenc „Při młynje“ w Nowej Łuce. (7)
Štyri kilometry sewjerozapadnje Wojerec dojědźeš sej do Noweje Łuki w gmejnje Halštrowska Hola. Přeprěčiš-li móst přez Halštrowsku wodu steji na lěwej stronje hotel a hosćenc „Při młynje“. Stawizny hosćenca napřećo bywšemu młynej sahaja do lěta 1861. To bě tam hižo dźědowy wuj nětčišeje mějićelki hosćenca Roswity Kochoweje hosći witał. Dom samy je wudwór, słušacy k Wojerowskemu hrodej. Po Prěnjej swětowej wójnje wjedźeštaj jón Awgust a Marie Koar, kotrajž staraštaj so tež wo palencarnju a ratarstwo. Dokelž njeměještaj žane dźěći, zdźědźištaj wobsydstwo swojemu bratrowcej Wilhelmej Koarjej. Wón bě pilny a angažowany. Z mandźelskej Hanu a dźěsćomaj Ernu a Maksom je wón hosćenc a ratarstwo tež přez ćežke lěta wjedł. Z industrializaciju a přiběracym wudobywanjom brunicy ludźo hosćenc dale a bóle wopytowachu.
Krótkopowěsće (03.08.21)
Dalšu koronainfekciju zwěsćili
Budyšin/Zhorjelc. Budyski wokrjes je wčera dalše natyknjenje z koronu zwěsćił, RKI poda dźensa incidencu 7,3. Aktualnje je tu tuchwilu 35 ludźi na wirus schorjenych, dwě wosobje lěkuja w chorowni. W Zhorjelskim wokrjesu je incidenca dale na 1,6. Wot dźensnišeho zwjazkowa policija tež na mjezy do Čěskeje a Pólskeje w Hornjej Łužicy sylnišo kontroluje, hač so wšitcy pućowacy na winowatosć testowanja dźerža.
Znowa přidatne městna
Budyšin. Tež w poslednim tydźenju Budyskeho lětnjeho dźiwadła móže NSLDź snadneje incidency dla publikumej 135 přidatnych městnow za kóžde předstajenje inscenacije „Sherlock Holmes a paski Beatlesow“ poskićić. Hač do njedźele je jich dohromady hišće šěsć předstajenjow na Budyskim hrodźe.
Dalša pomoc za start-upy
Na hermanku wuchować zwučowali
Policija (02.08.21)
Do wohenja padnył
Wojerecy. Ćežke spalenja poćerpjeł je sobotu wječor 39lětny muž, kiž bě we Wojerowskim zahrodnišću do lěhwoweho wohenja padnył. Kaž policija zdźěli, bě so wón njeznateje přičiny dla zakopnył a do palaceje so hromady padnył. Druhe wosoby jeho hnydom zaso wućahnychu a drastu zhašachu. Přiwšěm so muž mjezwoči, na rukomaj a nohomaj ćežko zrani. Něhdźe sydom procentow jeho kože bě wot spalenjow druheje rjadownje potrjechenych. Na pomoc wołachu helikopter, kiž ćežko zranjeneho do Lipšćanskeje specialneje chorownje transportowaše. Wojerowscy wohnjowi wobornicy městno njezboža wuswětlichu.
Za čestnohamtske dźěło
Nowe towarstwo załožene
Njebjelčicy (SN/MWj). 19 wosobow je wčera krótko po 13 hodź. w sydarni Njebjelčanskeje gmejny mjezynarodne towarstwo załožiło. Nimo někotrych wobydlerjow z gmejny a wokoliny běchu to hosćo z afriskeho Benina kaž kral Dadah Bokpe, wjesnjanosta čěskeje partnerskeje gmejny Hlučín Pavel Pašek a Njebjelčancy sympatizanća kaž Johannes Heimrath abo Wolfgang Kraus jako Krabat. Kaž we wustawkach rěka, ma nowe towarstwo zaměr, „mjezynarodne zhromadne dźěło z wosobinskimi kontaktami za mjezami Njebjelčanskeje gmejny z wobydlerjemi a gmejnami druhich statow pěstować kaž tež humanistiski swětonahlad a měrliwe wuwiće na mjezystatnej runinje podpěrać“. W srjedźišću steja komunalne partnerske poćahi mjez Njebjelčanskej gmejnu a městom Ouidah w afriskim Beninje.
Fanojo fantazije so zetkali
Poměr napjaty
Krótkopowěsće (02.08.21)
Test po dowolu trěbny
Budyšin/Zhorjelc. Wot wčerawšeho dyrbja so nawrótnicy z dowola na koronu testować dać. Z toho wuzamknjeni su šćěpjeni a wustrowjeni, dalokož njejsu so z koronawariantoweje kónčiny wróćili. Wěstotnych přičin dla je wustajenje digitalneho šćěpjenskeho certifikata w Budyskim wokrjesu wokomiknje jeno přez domjaceho lěkarja móžne. Incidencna hódnota Budyskeho wokrjesa je po RKI dźensa 7,7. W Zhorjelskim wokrjesu wučinja wona dale 1,6.
Intendant na dwě lěće
Budyšin. Tomaš Kreibich-Nawka je na přichodnej dwě lěće powołany intendant Serbskeho ludoweho ansambla. Wón přewza zastojnstwo dotalneje intendantki Judith Kubicec, kotruž je wot lěća 2020 hižo zastupował. Ze zazběhom noweje hrajneje doby wobsadźi SLA tež městnje chóroweho nawody a nawody orchestra.
Dalše openair-koncerty
Gižkojce. Kulturny forum łužiskeje brunicy swoje lěćne koncerty na Gižkojskim (Geißendorf) dale wjedźe. Po dobrym zazběhu spočatk lěća planuja za 8. awgust folk a pop, 22. awgust klasikarje ze 70tych lět a 26. septembra šansony a pop. Koncern LEAG koncerty podpěruje.
