Zapósłancej na rěčne hodźiny
Kamjenc. Zapósłanc Sakskeho krajneho sejma Alojs Mikławšk změje póndźelu, 18. nowembra, přichodne rěčne hodźiny w swojim Kamjenskim běrowje. Zajimcy móža w času wot 13 do 15.30 hodź. swoje naležnosće, próstwy a prašenja serbskemu zapósłancej direktnje přednjesć. Rady wón wšitkich poradźuje. Zapósłanc prosy so do toho přizjewić pak telefonisce pod 03578/305383 pak e-mailnje pod .
Kak přichodnje wuknyć?
Koło ma so zaso wjerćeć
Nowa Łuka (GM/SN). Koło młyna w Nowej Łuce (Neuwiese) drje hižo dlěje hač dźesać lět wjac njedźěła, dokelž bě stara wala nałamana. To pak so prawdźepodobnje bórze změni. Wšako su tam hakle njedawno cyle nowu walu přiwjezli, kotruž tele dny zasadźichu.
Zhotowili su nowu walu za Nowołučanske młynske koło z duboweho zdónka w Bismarku w Altmarce. Wudźěłał bě ju kolega młynotwarca Martina Zechera, kiž ma swój zawod w Harsće pola Wittenburga. Wón ma koło tež zaso zahibać. Jörg Oswald je 4,7 metrow dołhe a něhdźe połdra tony ćežke wjezwo z Budyšina ze swojim kranowym jězdźidłom do Noweje Łuki přiwjezł.
Tež lětsa su so mnozy lubowarjo koni jěchajo abo ze zapřahom na ...
Krótkopowěsće (15.11.19)
Benedikt Dyrlich myto přijał
Düsseldorf. Towarstwo wuměłska gilda Esslingen je wčera w Düsseldorfskim Domje Gerharta Hauptmanna serbskemu basnikej Benediktej Dyrlichej renoměrowane Myto Andreasa Gryphiusa spožčiła. Kóždolětne njedotěrowane wuznamjenjenje přizwoleja spisowaćelam za jich žiwjenski skutk.
Nowu knihu předstajiłoj
Budyšin. Awtoraj Michał Anders a Pětr Lipič staj wčera swoju njedawno w Ludowym nakładnistwje Domowina wušłu knihu „Z Lipicy do hole – Wobrazy a powěsće z dawnych časow“ w Budyskej Smolerjec kniharni předstajiłoj. Po z historiskimi fotografijemi wobrubjenym čitanju je sej tójšto z něhdźe 30 přitomnych zajimcow publikaciju kupiło a wot njeju signować dało.
Medicinski centrum wotewrěli
Skrućeja wjesnu zhromadnosć
Lichań (CS/SN). Cyłkownje dwanaće lipow a wjacore wšelake kerki su minjenu sobotu při Lichańskim (Spreewiese) wjacegeneraciskim domje sadźili. Akciju je mjez druhim Němski póst z 500 eurami podpěrał. Městno wosrjedź wsy słuži domoródnym jako zetkanišćo, ma pak tež wužiwarjam bliskeju kolesowarskeju šćežkow, kotrejž so tam křižujetej, jako wotpočnišćo k dispoziciji być. Do sadźenskeje akcije je Klukšanska firma městnosć zrunała a z mineralnym šćerkom napjelniła. Wšako chcedźa tam hišće sedźenske móžnosće kaž tež hětu za pućowarjow natwarić.
Nimo 30 čłonow Lichańskeho domizniskeho towarstwa wobdźěli so na sadźenju rostlin tež wosom sobudźěłaćerjow pósta. Su to kolegojo předsydy tamnišeho domizniskeho towarstwa Alexandera Golcherta, kiž w Budyskim listowym centrumje dźěła. Wón bě zwisk ke koncernowej centrali nawjazał, kiž čestnohamtski angažement po wšěm swěće podpěruje. Kaž rjekny nowinski rěčnik Němskeho pósta za Saksku Mattias Persson, su z podpěru koncerna hižo něhdźe milion štomow po cyłym swěće sadźili.
Z konceptom šulskeho dwora so zeznajomili
Radwor (SN/MKWj). Najebać přiběrace kóšty gmejna Radwor swoje tři pěstowarnje dale pjenježnje podpěruje. Na swojim posedźenju předwčerawšim su gmejnscy radźićeljo wotpowědne zrěčenja z Minakałskej pěstowarnju „Wroblace hnězdo“, z Radworskimaj dźěćacym dnjowym přebywanišćom „Marja Kubašec“ a z Katolskim dźěćacym domom „Alojs Andricki“ wotzamknyli. Radźićelow w tym zwisku wo tym informowachu, zo su wyše kóšty z wyšimi přiražkami swobodneho stata z najwjetšeho dźěla wurunane.
Z połnej paru dźěłaja tuchwilu na přitwarje Chelnjanskeje dobrowólneje wohnjoweje wobory. Zo móhło tak dale hić, su radźićeljo wčera wotpowědne twarske nadawki na polu elektroinstalacije, tepjenja a sanitarne přepodali.
Pjenjezy hraja tež wulku rólu w zwisku z wuhotowanjom Radworskeho šulskeho dwora, štož zamołwitych hižo dołho zaběra. Budyska architektka Ludmila Pansyna rozłoži radźićelam dwaj konceptaj, kak móhli šulerjam čas dworoweje přestawki porjeńšić. Kóšty wučinjeja we woběmaj padomaj něhdźe 430 000 eurow. Spočatk decembra chcedźa wo tym wuradźować.
Inwestuja do towarstwowych domow
Łaz (AK/SN). Gmejna Łaz nałoži pjenjezy z krajneje pawšale 2019 k sylnjenju wjesneho ruma a zaplanuje tuž 20 000 eurow za swoje wjesne dźěle. To je tamniša gmejnska rada předwčerawšim jednohłósnje wobzamknyła, sćěhujo tak w dalokej měrje namjety cyłkownje sydom wjesnych radow.
Za Łaz (Lohsa) maja něhdźe 5 600 eurow předwidźanych. Z nich wužiwaja 400 eurow za adwentničku seniorow w decembru. Dalšu sumu planuja za swójski podźěl projekta „Horje z křesła“. Zbytk přewozmu do přichodneho lěta. Za Běły Chołmc (Weißkollm), Tyhelk (Tiegling), Roholń (Riegel) a Tři Žony (Dreiweibern) maja 3 400 eurow. Tež tam wuhotuja z pjenjez w decembru seniorsku adwentničku a přewozmu zbytk do lěta 2020. Něhdźe 640 eurow přewostaja Drěwcam (Driewitz) a Lipinam (Lippen), štož přenjesu hnydom do klětušeho. Złyčinej (Litschen), Bjedrichecam (Friedersdorf) a Mortkowej (Mortka) přisteji 2 300 eurow.
Dźěl pjenjez inwestuja do wuhotowanja wobstejacych zarjadnišćow na wsach, mjez druhim za nowe stólcy a blida w towarstwowych domach. Nimale 1 100 eurow dóstanje Šćeńca (Steinitz). Hermanecam (Hermsdorf Spree) a Wysokej (Weißig) přewostaja 940 eurow, a to za klětu.
Policija (14.11.19)
Zuby sej wukusali
Mały Wjelkow. Prawdźepodobnje zuby wukusali su sej paduši spočatk tydźenja, jako chcychu w Małym Wjelkowje VW Passat pokradnyć. Kaž policija zdźěla, su drje so skućićeljo do awta zadobyli, startować pak je njemóžachu a dyrbjachu je stejo wostajić. Škoda na awće: 500 eurow.
Změja wurunany etat
Klětuši hospodarski plan w Rakecach prěnje koło přetrał
Rakecy (JK/SN). Loni zakónčena konsolidacija wjedźe Rakečansku gmejnu dale k wurunanym financam. Po tym zo bě nawodnica financneho wotrjada Franziska Pfeiffer na wčerawšim posedźenju gmejnskeje rady jara spokojacy staw gmejnskich financow rozłožiła, móžachu so radźićeljo wěnować naćiskej klětušeho hospodarskeho plana. Tón njepředwidźi jenož wurunany etat, ale samo poměrnje dobry dobytk. A to wšitko najebać wobšěrne inwesticije. Po lětušim skerje měrnym lěće nastupajo inwesticije chce gmejna Rakecy klětu tak prawje do infrastruktury inwestować.
Dróhotwar lěto prjedy hotowy
Budyšin (UM/SN). Pjeć twarskich wotrězkow, dwaj kilometraj, štyri lěta – při předewzaću tajkeho rozměra móžeš tola raz přehlad zhubić. Na wčerawšim přepodaću knježeše na Budyskej Tuchorskej hasy jeno cyle skrótka zamylenje wo korektnym rjedźe jednotliwych twarskich etapow. Skónčnje dźě bě to pódlanska wěc. „Wažne je, smy cyłkowne předewzaće lěto prjedy hač planowane dokónčili“, Budyska twarska měšćanostka Juliane Naumann zbožowna wozjewi.
Poprawom wšak bě planowane wutwar křižowanišća Tuchorska/Karla Liebknechtowa/Augusta Bebelowa jako posledni wotrězk hakle klětu zwoprawdźić. „Smy z toho profitowali, zo je přizamknjenje dalnoćopłoty na Dwórnišćowej kaž tež na dwórnišću samym spěšnišo postupowało hač předwidźane“, Naumann wuzběhny. Tak je Tuchorska, jedna z najdlěšich hasow sprjewineho města scyła, zaso dospołnje k dispoziciji.
