Zaběraja so z techniku
W Delanach wosebity gremij ludźi při wažnych prašenjach poradźuje
Ralbicy (JK/SN). Loni njejsu so čłonojo gmejnskeje rady Ralbicy-Róžant k tomu předrěć móhli kupić nowy traktor za komunalne nadawki w swojej komunje. Zwrěšćił je projekt na rozdźělnych měnjenjach wo wuhotowanju a tak wo płaćiznje móžneje dźěłanskeje mašiny za gmejnu. Nimo toho chcychu delanscy radźićeljo wočaknyć, kotre konkretne nadawki z koncepta wo hladanju a wuwiću wodźiznow druheho rjadu na gmejnu wurostu. Cyła naležnosć pak by so w njepřezjednosći nimale rozpušćiła.
Z handyjom na slědach Kaeublera
Za mobilne telefony eksistuje wulka ličba najwšelakorišich aplikacijow. Dalša je tele dny w Budyšinje k tomu přišła. Z njej móža wužiwarjo tójšto zajimaweho wo stawiznach města zhonić.
Budyšin (SN/MWj). Nowa aplikacija za handy je wuslědk skupiny šulerjow Budyskeho Schilleroweho gymnazija. Ze swojej wučerku Ulriku Wiezorek woni předwčerawšim w tudyšej radnicy předstajichu, z čim běchu so minjene měsacy zaběrali. Nastała je tak mjenowana actionbound-app, kotraž zmóžnja interaktiwnu rallye z handyjom po měsće. Při tym wjerći so wšitko wokoło bywšeho Budyskeho wyšeho měšćanosty dr. Konrada Johannesa Kaeublera (1849–1924).
Hižo dlěši čas je w Pančicach-Kukowje rěč wo tym, zo budźe ...
Nětko twarja nowu zakładnu šulu
Šěsć metrow wysoki škit před haru
Krótkopowěsće (25.03.21)
Sejm noweli přihłosował
Drježdźany. Sakski krajny sejm je wčera nowelu rozhłosoweho statneho zrěčenja sćelaka MDR schwalił. Frakcije CDU, SPD a Zelenych hłosowachu za naćisk, Lěwica so hłosa wzda, AfD bě přećiwo tomu. Tež krajnej parlamentaj Durinskeje a Saksko-Anhaltskeje matej zrěčenju hišće přihłosować. Hakle potom je Serbam stajne městno w rozhłosowej radźe MDR skónčnje zaručene.
Hódnota znowa jasnje překročena
Budyšin. Po wčerawšej incidency pod 100 je RKI za Budyski wokrjes dźensa ze 123,4 zaso tajku nad rozsudnej hódnotu podał. Wokrjes pak chce nowe powšitkowne postajenje Sakskeje wočaknyć a hakle potom wo dalšim postupowanju rozsudźić. Wčera zwěsći wokrjes Budyšin 125 nowych natyknjenjow z koronawirusom, Zhorjelski wokrjes 121. Ličba padow z britiskej mutaciju wirusa powjetši so tam wo 14. Dźensniša incidenca po RKI je we wokrjesu Zhorjelc 159,5.
Nowu skóržbu zapodali
Radźićeljo so schadźuja
Njebjelčicy. Přichodne zjawne posedźenje gmejnskeje rady Njebjelčic wotměje so jutře, štwórtk, w 19.30 hodź. w tamnišim gmejnskim zarjadnistwje. Jedna z temow budźe studija, kotruž chcedźa energijowemu konceptej gmejny wotpowědnje zdźěłać. We wobłuku twarskich naležnosćow póńdźe wo twar hale za kompostěrowanje na Miłočanskim přemysłownišću. Zajimcy su wutrobnje přeprošeni.
Poradźuje po telefonje
Budyšin. Prawiznik a zapósłanc Budyskeho wokrjesneho sejmika Lěwicy Hajko Kozel poskići pjatk, 26. měrca, wot 15 do 17 hodź. darmotne socialne poradźowanje po telefonje. Předewšěm póńdźe wo aktualne dźěło- a socialnoprawniske wuskutki koronoweje pandemije. Kozel pak tohorunja na wšitke dalše prašenja wotmołwi, a to samozrozumliwje tež serbsce. Zajimcy njech zazwonja pod telefonowym čisłom 035932/ 363 727.
Wobjed skazać
Policija (24.03.21)
W awće dwělować započała
Wóslink. Najskerje w poslednim wokomiku je žona z Wóslinka minjene dny spóznała, zo su ju z tak mjenowanym wnučkowym trikom wobšudźić chcyli. Kaž policija předwčerawšim zhoni, bě Wóslinčanku minjeny štwórtk cuza žona zazwoniła, wudawajo so jako pólska wobchadna policistka. Wona powědaše, zo bě dźowka 79lětneje při wobchadnym njezbožu pólskeho staćana strašnje zraniła a zo dyrbi nětko do jastwa, jeli rentnarka za nju kawciju 70 000 eurow njezapłaći. Wona tuž wšo swoje zamóženje hromadźe pytaše, sydny so do cuzeho čakaceho awta, zo by sobu do Wrócławja jěła. W běhu jězby pak započa wona dwělować. Mjez druhim ju zadźiwa, zo šofer napadnje husto telefonuje. Jako Wóslinčanka słowo „wnučkowy trik“ naspomni, da jej šofer telefon, na kotrehož tamnym kóncu bě wona „policistka“, kotraž wša rozhorjena na nju swarješe. Na to šofer zwonka Wrócławja zasta a 79lětnu z awta pušći. Tam pak so žana pozdatna policistka njezjewi. Wóslinčanka na to ze swojim zamóženjom zaso domoj jědźeše a bě dźakowna, zo swoje pjenjezy zhubiła njeje.
Šula nimale dospołnje zhubjena
Jednore, ale wěste wašnje
Z wobnowjenjom dróhow maja w Rakecach dobre nazhonjenja
Rakecy (JK/SN). Runja druhim gmejnam steja tež w Rakecach před wulkim wužadanjom, komunalne dróhi dale w dobrym a wužiwajomnym stawje dźeržeć abo je do tajkeho dóstać. Zo bychu to z wobmjezowanym etatom 76 000 eurow k spokojnosći wšitkich potrjechenych zdokonjeli, su sej prioritnu lisćinu nastajili. Po njej chcedźa postupować. Na minjenym posedźenju gmejnskeje rady je nawodnica twarskeho zarjada gmejny Martina Nytsch hromadźe z wjesnjanostu Swenom Nowotnym (CDU) lisćinu a naprawy k wobnowjenju abo wuporjedźenju mjenowanych dróhow předstajiła.
