Policija (27.05.21)
Na party drogi brali
Jěžow. Drogowu party je policija předwčerawšim w Jěžowje pola Kamjenca skónčiła. Jako zastojnicy při bydlenskich durjach klinkachu, jedyn z hosći podhladnu titku z woknom won ćisny. W njej běchu konopjowe kćenja a dalše substancy. W bydlenju bě pjeć wosobow w starobje 22 do 40 lět. Pola nich namakachu konop, crystal, utensilije za konsum drogow kaž tež 500 eurow.
„Pjezl“ za wěžu na Pastwinej horje
Njewšědna ideja Kamjenčanki za 800lětne wobstaće Lessingoweho města nabywa dźeń a jasniše kontury. Tuž bě nětko načasu za prěnju zjawnu prezentaciju wosrjedź města.
Kamjenc (UM/SN). Jako bě Christo 1995 Berlinski Reichstag zapowěsnył, je to zajim medijow po wšěm swěće zbudźiło. Z tym drje 21. awgusta, hdyž ma wěža na Kamjenskej Pastwinej horje nachwilny šat dóstać, ličić njeje. Znajmjeńša regionalnje pak budu mnozy sćěhować, hdyž na štyrjoch bokach wěže 14 metrow dołhe šlebjerdy wosebiteho pjezla k zemi pušća. Tajku akciju Hornja Łužica hišće dožiwiła njeje.
Wěstota w stadionje wažna
Pjenjezy pak pobrachuja přihladowarske trawersy ponowić
Ralbicy (JK/SN). Trawersy Ralbičanskeho Stadiona přećelstwa hižo dlěši čas techniskim a wěstotnym žadanjam njewotpowěduja. Z teje přičiny je wjednistwo sportoweho towarstwa DJK Sokoł Ralbicy/Hórki wo tym rozmyslowało, kak móhli problem rozrisać. Přepodali su nadawk projektowej skupinje, kotraž měješe so z naležnosću rozestajeć. Jedyn z čłonow skupiny je twarski fachowc Stani Statnik. Wón zaběraše so z móžnosćemi, trawersy technisce a financielnje tak přihódnje kaž móžno wobnowić. Nimo toho je wotpowědny projekt naćisnył a jón kalkulował. Hižo před měsacami prošeše Statnik w mjenje projektoweje skupiny gmejnsku radu wo to, pruwować, hač móhła delanska gmejna stajić próstwu wo spěchowanje naprawy. Dokelž ma gmejna wjele druhich projektow, wosebje prěnjorjadnje twar noweje pěstowarnje w Ralbicach, kotrež maja so po móžnosći spěchować, wona sportowcam namjetowaše, so sami starać a trěbne financowanje na nohi stajić. Móžnosće k tomu je tohorunja mjenowała.
Móžny započatk
Žada sej škitny status wjelka znižić
Wjelk ma přichodnje mjeńši status škita dóstać. Z tymle žadanjom chce so Budyski krajny rada Michael Harig (CDU) hromadźe ze swojimi sakskimi kolegami w zastojnstwje na tudyše a zwjazkowe knježerstwo wobroćić, kaž krajnoradny zarjad wčera informowaše.
Budyšin (SN/at). Budyski krajny rada je minjene lěta wobstajnje přez wjelki škodowanych plahowarjow skotu na pastwach podpěrał. „Nochcemy wjelka w našej kónčinje wutupić. Dźe wjele bóle wo to, polěpšić niwow regulacije a škita w zmysle wurunanja zajimow mjez družinowym škitom a pastwinskim hospodarstwom“, wuzběhny Harig po nowinskej zdźělence. Koeksistenca wjelka, wužitneho skotu a dźiwiny je jeno z wulkej akceptancu ludnosće móžna.
Krótkopowěsće (27.05.21)
Zahaja kursy z prezencu
Budyšin. Wokrjesna ludowa uniwersita Budyšin zahaji wot noweho tydźenja prezencnu wučbu za prěnje kursy, hač do 7. junija dalše slěduja, krajnoradny zarjad informuje. Hač do wčerawšeho běchu w Budyskim wokrjesu 42 koronanatyknjenjow a štyri smjertne pady. Incidenca po RKI je tu dźensa 35,7. Wokrjes Zhorjelc zwěsći 84 infekcijow a šěsć zemrětych. Incidenca po RKI wučinja tam dźensa 46,3.
Dweju lawreatow počesćili
Lipsk. K zazběhej wosebiteho wudaća literarneho festiwala „Lipsk čita ekstra“ su wčera wječor Lipšćanske knižne myto za europske dorozumjenje w tamnišej Mikławskej cyrkwi přepodali. Wuznamjenili su lawreatow lěta 2020 a 2021 Lászla F. Földényija und Johnyja Pittsa. Něhdźe 400 zarjadowanjow wotměwa so hač do njedźele we wobłuku čitanskeho festiwala, nimale sto tež z publikumom.
Planuja wulkofabriku
„Trjebamoj rozmołwnych partnerow“
Sobuiniciator dr. Jörg Heidig rozłoži, kak móhł přichodny Łužiski monitor serbskej specifice regiona lěpje wotpowědować
Łužiski monitor ma wid ludnosće na strukturnu změnu w tudyšim brunicowym rewěrje zwobraznić. Po wozjewjenju prěnich wuslědkow lětušeho druheho naprašowanja bě najwjetši čas, so znajmjeńša z jednym jeho dweju iniciatorow rozmołwjeć. Při tym nochcyše Axel Arlt wot dr. Jörga Heidiga jenož pozadki zhonić, kak je k tajkemu projektej dóšło, ale předewšěm tež, kotry móžny wuznam přicpěwataj wón a wědomostny partner Stefan Bischoff Serbam za přichodne tajke naprašowanja.
Knježe dr. Heidig, z kotreje perspektiwy hladataj Steffen Bischoff a Wy na Łužicu?
dr. J. Heidig: Na Łužicu hladam jako tajki, kotryž je tule doma a prawje wjele wo regionje, jeho wuwiću w minjenych lětdźesatkach a wo přichodźe rozmysluje. Stefan Bischoff hlada skerje přez nawoči eksperty za naprašowanja. Wobaj pochadźamoj ze Žitawy a přewjedujemoj přepytowanja w nadawku třećich, štož su zwjetša naprašowanja sobudźěłaćerjow w předewzaćach.
Policija (26.05.21)
Ćežke baterije kradnyli
Słónkecy. Njewšědnu rubiznu wupytali běchu sej njeznaći, kotřiž zadobychu so w nocy na póndźelu w Słónkecach (Schlungwitz) do garaže na terenje firmy. Tam pokradnychu baterije třoch elektriskich jězdźidłow. Kóžda wažeše něhdźe 800 kilogramow. Cyłkowna škoda wučinja nimale 11 000 eurow. Na to jězdźidła z barbu popryskachu.
Awto přewysoke
Musical, rock a wjele žorta
Mortkow (AK/SN). Před srjedźowěkowskej kulisu Mortkowskeje Jakubecec twjerdźizny chcedźa lětsa w lěću wjacore zarjadowanja wotměć. Tam planuja ryćerske dźiwadło, musical „Kiss me Kate“ a twjerdźiznowu symfoniju z rockowej hudźbu kapały „Queen“. Nimo toho budźe so dźiwadźelnik Tom Pauls wo wjele žorta starać. Tole wuzběhny Martina Küpferling z twjerdźiznoweho managementa. „Action, musical, rock a humor – to drje dyrbjało za kóždy słód něšto pódla być“, wona rozłoži. Na te wašnje chcedźa wopytowarjam zmóžnić, před kulisu twjerdźizny rjany lětni wječor přežiwić a jón snano z popołdnišim wodźenjom zwjazać.
Na lětnim jewišću před twjerdźiznu maja so konsekwentnje po hygienowych postajenjach měć, Martina Küpferling podšmórnje. Wšitke přihladowarske městna budu pod třěchu, tak zo žanu wariantu za špatne wjedro njetrjebaja. Zastupne lisćiki su wotnětka na předań, mjez druhim internetnje pod . Dyrbjało-li zarjadowanje wupadnyć, wobsedźerjam lisćikow pjenjezy wróća.
