Chrósćicy. Něhdźe tysac kilometrow dołhi je Jakubowy puć podłu historiskeje Via regije wot ukrainskeje hranicy přez Pólsku hač do Zhorjelca. Po tej čarje je prof. Gerd Gellißen w dwěmaj wotrězkomaj pěši putnikował, a to w lětomaj 2017 a 2018. Wo tym přednošuje emeritowany profesor, horliwy putnik a prezident Bratstwa swjateho Jakuba z Düsseldorfa, z wobrazami přichodnu sobotu, 21. decembra, w 19.45 hodź w Chróšćanskej putniskej hospodźe. Nimo wosobinskich dožiwjenjow Gellißen tohorunja wopisuje, što putniska šćežka ze swojej přirodu, stawiznami a wuměłskimi stawiznami skići. Wutrobnje přeprošeni su wšitcy putnicy, tajcy, kotřiž chcedźa so hakle z putnikom stać, a wězo tež wšitcy zajimcy zbliska a zdaloka.
Tohorunja sobotu, ale hižo w 16 hodź., su najmłódši znowa na bajku do Chróšćanskeje putniskeje hospody prošeni. Ćeta Monika baje jim tónraz wo „Třoch přećach“.
Popołdnjo krótkofilmow
Z 1,6 promilemi po měsće
Kamjenc. Při kontroli na Kamjenskej Macherowej lepichu policisća wčera w nocy 18lětneho šofera Renaulta, kiž njebě hižo kmany awto wodźić. Wotpowědny test wunjese, zo měješe młodostny 1,6 promilow alkohola w kreji. Papjery sćazać jemu njemóžachu, dokelž njeměješe je při sebi, awto bě sej požčił.
Zhorjelc (SN). Wyši měšćanosća wyšeho centralneho měšćanskeho zwjazkarstwa Budyšin-Zhorjelc-Wojerecy (OSZV) chcedźa hišće wušo hromadźe dźěłać. To wobzamknychu Alexander Ahrens (SPD), Octavian Ursu (CDU) a Stefan Skora (tohorunja CDU) na swojim njedawnym dźěłowym zetkanju w Zhorjelcu.
Kaž zarjad za medijowe dźěło a marketing města Budyšina tele dny zdźěli, tworješe srjedźišćo wuradźowanjow, zdźěłać regionalny wuwićowy a jednanski koncept za region zwjazkarstwa. Koncept spěchuja z pomocu směrnicy za regionalne wuwiće. Z nim chcedźa sylnosće a potencial wobdźělenych třoch městow za wuwiće regionalneho ruma a sylnjenje Hornjeje Łužicy jako region podšmórnyć. Dźěło za region sej města runohódnje dźěla, a to na zakładźe mjjenowaneho koncepta.
Rakecy (JK/SN). Tež poslednje posedźenje Rakečanskeje gmejnskeje rady wčera wječor žadaše sej połnu koncentraciju wšěch čłonow. Samo na sebi chcychu hižo zahajić diskusiju wo klětušim hospodarskim planje, dalšich wažnych dźěłow na zarjedźe dla pak su to na spočatk přichodneho lěta přestorčili.
Hamorska gmejna chce nastupajo strukturnu změnu we Łužicy wobkedźbowana być a w naležnosći tež jasne słowa sobu rěčeć.
Hamor (AK/SN). Gmejna Hamor chce strukturnu změnu we Łužicy dołhodobnje sobu postajeć a wuhotować. Wona chce při strukturnej změnje wobkedźbowana być. Tole podšmórny wjesnjanosta Achim Junker (CDU) na zašłym wuradźowanju gmejnskeje rady. Najwjetšu prioritu ma za komunu při tym krute pisomne zakótwjenje rósta a dźěła do zakonja. Tak měli pozdźišo předewšěm industrijne stejnišća milinarnjow a wuhlowe jamy zmysłapołnje dale wužiwać.
Zhorjelc (AK/SN). Wokrjes Zhorjelc chce słužbu za nuzowe wuchowanje a za transport pacientow we wjesnych kónčinach polěpšić. To wuchadźa z noworjadowanja wotpowědneho wobłukoweho plana za lěta 2021 do 2028. Z 72 hłosami a jeničkim hłosawzdaćom je jón wokrjesny sejmik wčera wobzamknył.
Plan předwidźi wažne změny. Lěta 2018 wukazane městnosće za wuchowanske straže w Jonsdorfje, Slepom a Rěčicach změja kóžda přidatne wuchowanske jězdźidło, a to wodnjo kaž w nocy. W Habrachćicach chcedźa přidatne jězdźidło dwanaće hodźin přewostajić. We wuchowanskej słužbje na Leschwitzowej w Zhorjelcu změja chorobne awto tohorunja wšědnje 24 hodźin k dispoziciji. Wobłuk zasadźenja wopřijima po potrjebje, wosebje w nócnych hodźinach, cyły wobłuk Zhorjelskeho wokrjesa. „Tak mamy nimale stoprocentowsce zaručene, zo je wšón wokrjes hladajo na nuzowu słužbu zastarany“, podšmórny socialna decernentka Martina Weber we wokrjesnym sejmiku. „Budźe-li trjeba, móžemy system dale rozšěrić.“