Zakładnu a wyšu šulu w Ralbicach dale digitalnje wuhotuja
Ralbicy (JK/SN). Za digitalizaciju Ralbičanskeje Serbskeje zakładneje a wyšeje šule je rada gmejny Ralbicy-Róžant wuhibki stajiła a wčera wobšěrny paket wudawkow wobzamknyła. Nadawk za nakup digitalnych taflow dósta firma Schröder-Systeme z Drježdźan, kotraž bě zarjadniskemu zwjazkej Při Klóšterskej wodźe na wupisanje nadawka najpřihódniši poskitk zapodała. Delanscy radźićeljo chwalachu dobry rozsud komisije zwjazka, najmodernišu techniku za wuhotowanje šulskich kubłanišćow nakupić dać.
