Slepo (AK/SN). Dźěćacu dnjowu přebywarnju „Pfiffikus“ w Slepom dyrbja nuznje wobnowić. Tak dyrbja tam elektriku a wěstotne připrawy sporjedźeć. Nawoda zarjada za planowanje, twarstwo a hórnistwo Slepjanskeho zarjadniskeho zwjazka Steffen Seidlich je to na njedawnym posedźenju gmejnskeje rady potwjerdźił. Kaž wón informowaše, je z programa „Mosty do přichoda“ njecyłych 300 000 eurow za podźělne saněrowanje zarjadnišća k dispoziciji. Wone maja najpozdźišo hač do kónca tohole lěta přetrjebane być, to rěka za twarske naležnosće. „Nadawki nětko zjawnje wupisamy, w nadźiji, zo za naprawy předewzaća namakamy, kotrež dźěła wukonjeja.“ Hladajo na połne nadawkowe knihi rjemjeslnikow to runjewon lochko njeje.

Postawy wobchowuja legendu za přichod

Bělšecy (CS/SN). Hakle něšto dnjow přeprošeja na horje Lubin stejace postawy sydom serbskich kralow na pućowanje. Budestečanski wjesnjanosta Markus Michauk (OLG) je wobkedźbował, zo bu poskitk hižo přewšo derje přiwzaty. Wo­sebje swójby ze serbskeho sydlenskeho ruma tam pućuja. „Ideja dobywa na dynamice“, so wón wčera wjeseleše, dopominajo na oficialnym wotewrjenju na nastaće ideje. Judit Heroldowa, mandźelska kamjenjećesarja Markusa Herolda z Bělšec, bě so na sakskim wubědźo­wanju „Čiń sobu!“ wobdźěliła a dobyła. Dźakowano pjenježnemu mytu móžeše wona projekt zwoprawdźić.

Wurjadnej projektaj wužiwaja stari kaž tež młodźi ludźo, zo bychu so wokřewili. Jónu je to pućowanska šćežka w Pančicach-Kukowje, kotraž nam to po­srědkuje, štož smy hižo dawno wo sławnym basniku Jakubje Barće-Ćišinskim wědźeć chcyli. Dalša šćežka wjedźe, ně zawjedźe nas do sonjenja wo dawno bitych bitwach na horje Lubin, w kotrejž sydom serbskich kralow-rjekow na to čaka, zo by jich serbski lud wubudźił a z nimi wospjet wojował. Jako bój wobhladować hodźi so tež wobdźělenje na wubědźowanju „Čiń sobu!“. Mnozy su wo projektowe pjenjezy wojowali. Zo stej projektaj Kaulfürstec a Heroldec mandźelskeju dobyłoj, mam za wulkotne. Přetož zwoprawdźenje jeju idejow njewabi raz na digitalne, ale na dožiwjenjowpołne woprawdźite pućowanje. Zdobom matej nadhódnotu. Wužiwarjo so wšak jeničce ćělnje a dušinje njewočer­stwjeja, ale zdobywaja sej tak duchowne namrěwstwo Serbow. A to mam za wosebje hódne! Milenka Rječcyna

Kamjenc (BG/SN). Z małej překwapjenku je wčera wječor Kamjenska měšćanska rada swoje wuradźowanje zahajiła. Nadregionalnje znaty swjedźeń Lessingoweho města Boršć tež lětsa wupadnje. Njebudźe žadyn wućah z města na swjedźenišćo, žadyn zaćah k zakónčenju a žane swjećenje na arealu Kamjenskeje Boršće. Tež rjadowniske zetkanja staršich lětnikow w piwowych stanach lětsa žane nje­pře­wjedu. Město toho zarjaduja swjedźenski kónc tydźenja, rěkaše na wčerawšej zhromadźiznje radźićelow ze stron měšćanskeho zarjadnistwa. Kak ma wony swjedźenski kónc tydźenja wupadać, wo tym chcedźa prawje bórze zjawnje wuradźować. Tak je to swjedźenski wuběrk hakle njedawno wobzamknył. Jako přičinu rozsuda zamołwići mjenuja, zo „nochcedźa dypkowny start noweho šulskeho lěta a z nim zwisowace wotewrjenje šulow wohrozyć“.