Budyšin (SN). Budyske nutřkowne město wožiwić, to je zaměr měšćanskeho zarjadnistwa. Při tym chcedźa wikowarjow aktiwnje podpěrać. Wo tym běchu ra­dźićeljo města w februaru wuradźowali a w tym zmysle akciju dobropisow wobzamknyli. Tajku je nětko tudyše Towarstwo nutřkowneho města organizowało. Wot 1. junija móža zajimcy dobropisy kupić, a to za 35 eurow. Dóstanu pak ­za tajki twory w hódnoće 50 eurow. Sto wobchodow so na akciji wobdźěla. Su to poskićerjo z wobłukow wikowanje, gastronomija a kultura w měsće Budy­šinje samym kaž tež we wokolinje. Akciju sponserujetej Ludowa banka Drježdźany-Budyšin kaž tež Budyska wobdźělenska a wobhospodarjenska towaršnosć.