Šulerjo nawjeduja cyłu staciju chorownje
Wojerecy (SN/MWj). Wot 24. apryla hač do 11. meje je 24 šulerjow medicinskeje powołanskeje fachoweje šule za zastaranje pacientow a za bjezporočny wotběh na neurologiskej staciji Wojerowskeje jězorinoweho klinikuma zamołwitych. Šesty raz so šulerki a šulerjo tak na zasadźenje w praksy přihotuja, informuje rěčnik klinikuma Gernot Schweitzer w nowinskej zdźělence.
Dołho njebě jasne, hač hodźi so projekt „Šulerjo nawjeduja staciju“ wobmjezowanjow korony dla scyła wotměć. Dotal su tónle dźěl wukubłanja stajnje na staciji za ortopediju a njezbožowu chirurgiju kaž tež na geriatriskej staciji přewjedli. Loni dyrbjachu projektowej tydźenjej wotprajić, dokelž bě geriatriska stacija koronapandemije dla zawrjena. Lětsa je nětko neurologija domicil šulerskeje stacije. Tež tu dyrbja šulerjo mediciny samostatnje dźěłać a pokazać, što su dotal nawuknyli.
Policija (26.04.21)
Hač do nocy woheń hašeli
Hodźij. Dotal njeznaći běchu wčera wječor w Hodźijskej gmejnje hromady hałzow zapalili. Wokoło 21.30 hodź. alarmowachu wohnjowych wobornikow z Prěčec a Myšec, zo bychu palacu so hromadu w Hodźiju hašeli. Krótko do 23 hodź. dyrbjachu kameradojo z Hodźija na dróze mjez Hodźijom a Darinom hašeć. Tam běchu dotal njeznaći wotpadki zapalili. Dokelž njeje tam blisko žana móžnosć wodu klumpać, wołachu wobornikow z Prěčec wo pomoc. Dobrowólni wohnjowi wobornicy běchu tam hač do pózdnjeje nocy zasadźeni.
Dźěći maja swoje wjeselo
Pomjenuja puć po swjatym
Pančicy-Kukow (SN/MWj). Přichodni wobydlerjo Pančic-Kukowa, kotřiž budu sej swój dom w nowotwarskej štwórći do směra na Jaworu twarić, změja zajimawu adresu. Woni bydla potom na Puću swj. Bosćana. To su gmejnscy radźićeljo na swojim zašłym posedźenju we Wotrowje wobzamknyli.
Nowy puć, kotryž přez nastawacu bydlensku štwórć powjedźe, je zjawny, dyrbi so tuž zjawnje wěnować a trjeba tohodla mjeno, kaž wjesnjanosta Markus Kreuz (CDU) rozłoži. W zjawnych syćach běchu wobydlerjo namołwjeni namjety zapodać. Z nich je so Puć swj. Bosćana skónčnje jako najwotpowědniši přesadźił. Kaž Markus Kreuz dale rjekny, wotbłyšćuje mjeno krutu wěru wobydlerjow, a wone je mjez ludźimi tež kruće zakorjenjene. Tak maja w Pančicach cyle w bliskosći bydlenskeje štwórće apoteku swj. Bosćana, a w Swinjarni steji postawa tohole swjateho, kotruž su před lětomaj restawrowali.
Wobydlerjow zapřijeć
Wo wokolinje wsy rozmyslować njeje jenož naležnosć radźićelow
Chrósćicy (JK/SN). Podobnje tamnym gmejnam zarjadniskeho zwjazka Při Klóšterskej wodźe ma Chróšćanska koncept wo wobhospodarjenju wodźiznow druheho rjadu nastajić. Za to změje fachowu podpěru wobswětoweho inženjerskeho běrowa Stowasser z Radebeula. Na minjenym posedźenju gmejnskeje rady wjesnjanosta Marko Kliman (CDU) měnješe, přihoty a plany za koncept zwjazać z rozmyslowanjom, kak wožiwić a zapołožić stare, zdźěla hižo zabyte puće wokoło Chrósćic. Wo tym běchu hižo před lětami w zwisku z krajnym noworjadowanjom rěčeli, za gmejnu abo wjes Chrósćicy pak njeje ničo konkretneho wuskočiło. Nětko wobsteji šansa, hromadźe z fachowcami puće, kotrež wjesnjanam a wokolinje wjele woznamjenjeja, wožiwić a spožčić wokolinje zdźěla nowe struktury a žiwjenje.
Kulowsku pěstowarnju poswjećili
Hižo loni w měrcu bu katolska pěstowarnja swjateje Marije w Kulowje, kotraž je w nošerstwje katolskeje wosady Marije donjebjeswzaća, z cyłkownej kapacitu za 215 dźěći dotwarjena. Wčera su dom nětko poswjećili.
Kulow (aha/SN). Nošer kubłanišća, Kulowska katolska wosada, měješe z tamnišej měšćanskej radu, kotraž bě so wo wšě twarske naležnosće starała, předwidźane, přepodaće a žohnowanje zwjazać ze swjedźenjom za wšěch na twarje wobdźělenych kaž tež za staršich wšěch tuchwilu 197 dźěći w starobje wot jednoho lěta a 70 chowancow horta.
Koronapandemije dla běchu zarjadowanje wjacore razy přestorčili. Tak dojednaštej so Kulowska katolska wosada a měšćanska rada, to wčera, njedźelu, nachwatać. Nawodnica kubłanišća Thèrése Hörauf njemóžeše na zarjadowanje kaž předwidźane wšěch na twarje wobdźělenych a staršich witać, tak zo běchu tam město předwidźanych 600 ludźi jeničce třicećo – mjez nimi Zhorjelski biskop Wolfgang Ipolt, wosadny farar dr. Wolfgang Křesák kaž tež Kulowski měšćanosta Markus Posch (CDU).
Krótkopowěsće (26.04.21)
Incidenca 300 jasnje překročena
Budyšin. Zwjazkowe nuzowe borzdźidło koronapandemije dla płaći wot předwčerawšeho tež w Hornjej Łužicy. W Budyskim wokrjesu zwěsćichu wot pjatka hač do njedźele 340 nowonatyknjenjow a tři smjertne pady. Tydźenska incidenca po RKI je dźensa 327,6. Tež w Zhorjelskim wokrjesu, hdźež rozprawjachu wčera wo 36 infekcijach, je incidenca wot pjatka přiběrała a je dźensa po RKI 248,9.
Ze žonomaj na čole
Drježdźany/Lipsk. Katja Kipping je kaž wočakowane načolna kandidatka sakskeje Lěwicy za wólby zwjazkoweho sejma 26. septembra. Wona dósta na sobotnym zjězdźe w Drježdźanach 75 procentow hłosow. Na třeće městno krajneje lisćiny wuzwolichu Budysku zapósłanču sejma Caren Lay. Tež sakscy Zeleni su z lěkarku Paulu Piechotta sobotu na zhromadźiznje w Lipsku žonje načolne městno krajneje lisćiny dowěrili.
Dalšej kamerje planowanej
Přijimuja hałzy
Njebjelčicy. Dokelž so lětsa žane chodojtypalenje njewotměje, skići Njebjelčanska gmejna swojim wobydlerjam wosebity serwis. Zajimcy móža suche hałzy hač do přeměra dźesać centimetrow w Njebjelčanskim twarskim zawodźe wotbyć. Prěnja składnosć je jutře, sobotu, wot 8 do 15 hodź. Dalšu tajku předwidźa pjatk, 30. apryla, wot 12 do 18 hodź.
Ideje bórze zapodać
Kamjenc. Za hospodarskej lěće 2021 a 2022 přewostaji město Kamjenc stajnje po 9 000 eurach jako wobydlerski etat. Z nim spěchuja wobydlerski angažement a socialnu zhromadnosć w měsće samym a w jeho dźělach. Hišće hač do 30. apryla móža wobydlerjo, towarstwa a iniciatiwy swoje namjety a ideje zapodać, a to najlěpje z mejlku pod . Maksimalnje hodźi so 2 000 eurow spěchować.
Na serbsko-němsku namšu
Kórjeń. Přichodna serbsko-němska namša wotměje so njedźelu, 25. apryla, w 10 hodź. w Kórjenju (Kahren) pola Choćebuza. Liturgiski nawod změjetej wosadna fararka Reinhild Magirius a serbska dušepastyrka Katharina Huglarjowa. Po kemšach budźe mały zhromadny kofej pod hołym njebjom.
Policija (23.04.21)
Drogi brała
Budyšin. Pod wliwom drogow awto wodźiła je předwčerawšim žona w Budyšinje. Zastojnicy zadźeržachu 43lětnu na Nowoměšćanskej dróze. Drogowy test reagowaše pozitiwnje na amfetaminy. Dale jěć žona wězo njesmědźeše. Jeje přeńdźenje budźe po wšěm zdaću droha naležnosć. W normalnym padźe woznamjenja to pokutu 500 eurow, dwaj dypkaj w Flensburgu a měsac zakaz jězdźenja.
Simultanu techniku wužiwali
Čłonojo gmejnskeje rady Ralbicy-Róžant su so wčera schadźowali. Posedźenje pak njebě tajke kaž kóžde druhe dotal. Přetož prěni raz wužiwachu za to simultanu techniku.
Ralbicy (JK/SN). Hižo něšto lět bě so radźićel Tomaš Bjeńš (Swobodne wolerske zjednoćenstwo Delany) wo to prócował, přewjesć wuradźowanja gmejnskeje rady z pomocu simultaneje techniki. Dokelž Wojerowski Serwisowy běrow za serbsku rěč w komunalnych naležnosćach tajku poskića, je sej tam delanska gmejna techniku wupožčiła a ju wčera zasadźiła. Nažel bě jenički němski čłon gmejnskeje rady, Eduard Luhmann (CDU) schorjeł, tak zo njebě móžno wot njeho zhonić, kak so technika wuskutkuje. Najebać to su někotři radźićeljo simultany přełožk, kotryž Regina Krawcowa poskići, wupruwowali a běchu spokojom. Na kóždy pad chcedźa na přichodnym posedźenju w meji techniku znowa zasadźić a su sej ju hižo skazali.
