Město Kulow wobdźěli so na wosebitym projekće za swój komunalny lěs

Kulow (AK/SN). Swój komunalny lěs chce město Kulow zesylnić, zo by přećiwo škódnikam lěpje wobstał. Na swojim zašłym posedźenju měšćanscy radźićeljo wobzamknychu, zo wobdźěli so město na slědźerskim projekće PRIMA (planowanje a rizikowy management). Partneraj stej statny zawod Sakski lěs, kotryž so wo 153 hektarow Kulowskeho měšćanskeho lěsa stara, a slědźerski institut z Badensko-Württembergskeje. „Trjebamy wotmołwy na prašenje, kak móhli lěs přećiwo škódnikam kaž skórnikej lěpje škitać“, praji twarski nawoda města ­Stephen Rachel.

Hižo loni w decembru bě statny zawod Sakski lěs na wuznam darmotneho projekta skedźbnił. Z nim hodźi so riziko za Kulowski lěs analyzować. Kotre naprawy so na to zwoprawdźa, móže město w swójskej zamołwitosći rozsudźić. Při tym Sakski lěs komunu podpěruje, praji nawoda hornjołužiskeho lěsniskeho wobwoda Holm Karraß. Runja druhim komunam wobhospodarjeja Kulowski lěs po dźesaćlětnym planje. Tón lětsa wuběži, tak zo dyrbja nětko za přichodnu dekadu planować.