Policija (18.08.20)
W Olbje dale pytaja
Stróža. Minjeny kónc tydźenja přetorhnjene pytanje za zhubjenym mužom w Olbje pola Stróže su wčera pokročowali. Tak zasadźichu specielnje wukubłane psy z Durinskeje. Wone zamóža ćěła zemrětych namakać a čuja, hdyž bychu płuny z ćěła na powjerch wody přišli. Na te wašnje so nadźijeja, zo móža městnosć, hdźež móhł zhubjeny 44lětny być, lěpje lokalizować a tam potom nurjakow zasadźić. Tež dźensa su wot dopołdnja w jězoru dale pytali.
Při Klóšterskej wodźe film hladali
Zakónča kinowu sezonu
Budyšin. Posledni raz w tymle lěću wotměje so jutře, srjedu, na terenje něhdyšeho woclotwarskeho zawoda při Sprjewinym kolenju w Budyšinje kinowy wječor Wot 21 hodź. pokazaja tam film „Das perfekte Geheimnis“. Zastupny lisćik w předpředani za 7,70 eurow dóstanu zajimcy online pod www.tixforgigs.com. Alternatiwnje hodźa so lisćiki tež w Budyskim Kamjentnym domje kupić, tam pak njehodźi so z kartu płaćić. Zbywace lisćiki maja při wječornej kasy za wosom eurow. Wopytowarjo měli hygieniske předpisy wobkedźbować.
Předstaja wobrazowy zwjazk
Koncerty, kabaret a klanki
Serbski kulturny centrum tež w času korony přiwabny
Slepo (AK/SN). Za zbytk lěta 2020 Slepjanski Serbski kulturny centrum (SKC) łahodnje planuje. Tole wuchadźa z aktualneje nowiny Slepjanskeje gmejny. Najebać wobmjezowanja koronoweje pandemije dla je kulturny centrum za wopytowarjow zbliska a daloka dale wobstajnje wočinjeny.
Widźeć su stajne wustajeńcy z drastu Slepjanskeho folklorneho regiona, přehladka klankow ze Slepjanskej drastu a zběrka jutrownych jejkow Serbskeho kulturneho centruma. Diplomowa designerka Regina Herrmann z Wermsdorfa we wokrjesu Sewjerna Sakska pokaza swoju stajnu wustajeńcu wo Slepjanskich serbskich powědkach. Powědkowe figury je wona sama zhotowiła a je w zestajenej scenje prezentuje. Tak nastachu mjez druhim wódny muž, plon, błudnički, lutki, hadźacy kral a připołdnica. Projekt z Reginu Herrmann je kulturny rum Hornja Łužica-Delnja Šleska w lětomaj 2009 a 2010 spěchował.
Zachowaja reje, tradiciju a drastu
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja. Wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Ćišćanska rejwanska skupina (13).
W lěće 1997 swjećachu w Ćisku 750. róčnicu prěnjeho naspomnjenja wsy. Zo bychu w swjedźenskim ćahu na něhdy ryzy serbske sydlišćo skedźbnili, chcychu w nim tež wobraz z tradicionalnymi serbskimi rejemi swojich prjedownikow we Wojerowskej serbskej drasće pokazać. Za to dobychu tehdy wosom porow. Wone so po swjedźenju rozsudźichu, přichodnje dale zhromadnje rejwać. Tak dóńdźe k załoženju Serbskeje rejwanskeje skupiny Ćisk. Prěnja předsydka lajskowuměłskeho cyłka bě Edith Zinkowa. K swojim probam zeńdźechu so na žurli hosćenca „K zelenemu wěncej“, hdźež tež dźensa zwučuja. Cyłk wobsteji tuchwilu z 18 aktiwnje sobuskutkowacych porow.
Pod nawodom Katje a Jakuba Hrjehorjec z Delnich Sulšec měješe ...
Zdobom běda a wjeselo
Z dešćom wočerstwjenje přišło
Krótkopowěsće (18.08.20)
Sakska swjeći 30. róčnicu
Aue-Bad Schlema/Drježdźany. Ze stadionowym koncertom w Aue woswjeći Swobodny stat Sakska swoje nowozałoženje a jednotu Němskeje před 30 lětami. Kaž statna kenclija wčera zdźěli, wustupitej Sakska statna kapała Drježdźany a Krajny hórski hudźbny korps Sakskeje 5. septembra zhromadnje w Rudnohórskim stadionje Aue-Bad Schlema. Nadrobnosće chcedźa jutře wozjewić.
Staroměšćanski festiwal wupadnje
Budyšin. Wot 30. awgusta do 1. septembra planowany staroměšćanski festiwal je Budyske turistiske towarstwo nětko wotprajiło. Předsydstwo towarstwa ma rizika hladajo na koronapandemiju za přewulke. Předwidźany bě po lońšej premjerje festiwala „Woda, wuměłstwo, swětło“ znowa wobšěrny serbski program.
Nowa rektorka uniwersity
Z Pitom po łužiskej jězorinje kolesować a myto dobyć
Zły Komorow (AK/SN). Turistiski zwjazk Łužiska jězorina je hódančkowu čaru „Wot hórnika k namórnikej“ za kolesowacych pućowarjow wokoło Złokomorowskeho a Lejnjanskeho jězora wuwił. „Wona swójby z dźěćimi w starobje zakładneje šule přeproša, změnu krajiny wot hórniskeho rewěra k wočerstwjenskemu paradizej na kolesu aktiwnje dožiwić. 37 kilometrow dołha čara wjedźe wokoło Lejnjanskeho a Złokomorowskeho jězora“, rozłožuje Katja Wersch, sobudźěłaćerka turistiskeho zwjazka za zjawnostne dźěło a marketing.
Hłowna figura hódančkoweje kolesowanskeje čary je Pit, maskotka łužiskeje jězoriny. Na wosom stacijach Pit dźěći namołwja na prašenja wotmołwić. Jězba započina so při Kóšynskim kanalu do Złokomorowskeho jězora. Tam steješe něhdy hoberski bager Ds 1120, wudobywacy čorne złoto z brunicoweje jamy. Druha stacija je markantna wěža „Zerzawy hózdź“, hdźež so Zornowski kanal wuliwa. Tón zwjazuje dźensa Lejnjanski jězor ze Sedlišćanskim. Z wysokeho wuhladnišća widźa wopytowarjo we wokolinje wjacore wsy a jězory.
