Krótkopowěsće (24.09.20)
Tři nowe koronapady zwěsćili
Budyšin. W Hornjej Łužicy registrowachu wčera tři nowe natyknjenja z koronawirusom, dwě w Budyskim a jedne w Zhorjelskim wokrjesu, kotrež běchu pola šulerki šule w nutřkownym měsće Zhorjelca zwěsćili. W Budyskim wokrjesu je 42 schorjenych wosobow, z nich jednu dale stacionarnje lěkuja. Ličbje postajenych karantenow běštej wčera 86 (-42), rozprawja Budyski krajnoradny zarjad, a 106 (+16), kaž ze Zhorjelca rěka.
Jewišćowy bal wotprajeny
Budyšin. Tradicionalny, 13. a 14. nowembra planowany jewišćowy bal Němsko-Serbskeho ludoweho dźiwadła lětsa wupadnje. „Smy dołho rozmyslowali a zwěsćili, zo pod wokomiknymi wuměnjenjemi korony dla zarjadowanje ze sceniskim programom, reju a pohosćenjom přewjesć njemóžemy“, informuje Budyske NSLDź na swojej internetnej stronje.
Korčmy wot 22 hodź. zawrjene
To by znamjo přisłušnosće było
Sabrina Kuschy čłonstwo wokrjesa Dubja-Błóta w Domowinje nastorčiła
Sabrina Kuschy je prěnja sobudźěłaćerka w zarjadnistwje braniborskeho wokrjesa Dubja-Błóta, kotraž zastojnstwo wokrjesneje społnomócnjeneje za naležnosće Serbow hłownohamtsce wukonja. Wo zazběhu noweje dźěławosće je so Axel Arlt z njej rozmołwjał.
Čehodla sće so wo zastojnstwo społnomócnjeneje za naležnosće Serbow we wokrjesu Dubja-Błóta požadała?
S. Kuschy: Dźěłam mjeztym 15 lět w zarjadnistwje wokrjesa Dubja-Błóta. Sym so tu na zarjadnisku fachowu přistajenu wukubłać dała a po tym studowach nimo powołanja na zawodnu ekonomku. Dwanaće lět běch za wobłuk turizm we wokrjesu zamołwita. Nětko běše w mojim žiwjenju změna na rjedźe. A tajka so z wupisanjom městna hłownohamtskeje społnomócnjeneje za serbske naležnosće wězo jara derje skićeše. Nimo toho sym w Běłej Górje-Bělinje wotrostła a sym wot dźěćatstwa z tradicijemi a kulturu Serbow zwjazana.
Maće sama tež serbsku narodnu drastu w kamorje?
Powjetša kubłanišćo
Kamjenc. Lessingowy gymnazij w Kamjencu budźe powjetšeny. Krajnoradny zarjad Budyšin, nošer kubłanišća, přeprosy na połoženje zakładneho kamjenja pjatk, 25. septembra, w 13 hodź. na Henselowej.
Wo stawiznach so rozmołwjeć
Biskopicy. Budyski wokrjesny zwjazk žónskeje unije dopomina z diskusiju na minjene 30 lět. Zarjadowanje na temu „Dopomnjenki – rozmołwy k 30. róčnicy němskeje jednoty“ wotměje so dźensa w 19 hodź. w klubowni Biskopičanskeho hotela Evabrunnen. Něhdyša zapósłanča poslednjeje swobodnje woleneje Ludoweje komory NDR a pozdźiša zapósłanča CDU zwjazkoweho sejma Marja Michałkowa poda zawodne słowa do temy. W naslědnej diskusiji chcedźa so wobdźělnicy rozmołwjeć wo wosobinskich dopomnjenkach a začućach za čas před 30 lětami, kotryž žiwjenje wobydlerjow Němskeje hač do dźensnišeho wobwliwuje.
Čitanje w galeriji
Wulki cirkus na šulskim swjedźenju
Njedawny swjedźeń Křesćanskeju šulow we Wóslinku bě zaso dobra składnosć zetkanja a bjesady, wosebje wučerjam, rozmołwjeć so z něhdyšimi šulerjemi, kotřiž su nětko zaso raz kubłanišćo wopytali. Nawodaj šulow Kerstin Hörig a Steffen Günther witaštaj hosći do swjedźenskeho stana z nazymsce pyšenymi blidami. Po nyšporje z fararjom Michaelom Nicolausom a po krótkej narěči noweho wjesnjanosty Johannesa Nitzsche wustupichu šulerjo ze swojim cirkusom EVMOLINO. Tak móžachu wšitcy wobdźiwać dompterku hada. Swoju akrobatisku dokonjanosć předstajištej Johanna Schöne a Eva Domscheck ze 7. lětnika. Runje tak imponowacy běše poskitk Lary Rieger ze 6. lětnika na jednokole. Cirkusowa direktorka Anna z rjadownje 9a měješe swoju nuzu z klawnomaj Wilhelmom a Juliusom. Za kulojty program přijachu šulerjo wutrobny přiklesk. Na to zesydachu so sobu na ławki za blidami, a wšitcy zhromadnje swačachu.
Policija (23.09.20)
Do lawbow so zadobywałoj
Kamjenc. Kedźbliwosć wobydlerja je w nocy na wutoru paduchomaj w Kamjencu zadźěwała w zahrodkownišću kradnyć. Mužej w starobje 19 a 20 lět běštaj so na Měrowej do štyrjoch lawbow zadobyłoj. W dalšich jědnaće staj při pospyće nutřłamanja zwrěšćiłoj. Přiwšěm běštaj tójšto wěcow spakosćiłoj, z kotrymiž pak daloko přišłoj njejstaj. Po informaciji wobydlerja jeju policija lepi a nimo toho zwěsći, zo běštaj chětro alkoholizowanaj. Młódši bě tež cannabis und amfetaminy brał. Při sebi měještaj młodostnaj sekeru a wjacore nože. Hódnota pokradnjenych wěcow kaž tež rozměr wěcneje škody njejstej dotal hišće wujasnjenej. Kriminalna słužba Kamjenskeho policajskeho rewěra nětko podhlada padustwa z brónjemi dla přepytuje.
Wulka pomoc do peruskich Andow
Budyšin/Frankenberg (SN/MiR). Podpěrać kubłanje je nadawk, kotryž předewzaće DEBAG chutnje bjerje. Tak wone hižo mnohe lěta kooperaciju swojeje twornje w Budyšinje z tamnišim powołanskošulskim centrumom pěstuje. Nětko pak je wuwiwar technologije a producent pječenskeje techniki wospjet pokazał, zo podpěruje ludźi, předewšěm młodostnych w regionach swěta, kotrež nimaja tak wšowopřijacy socialny system kaž Němska. Tak su do Peruwa darili pěc, kotruž wužiwaja tam za jednu chorownju a šulu. „Za nas bě hnydom jasne, zo chcemy podpěrać projekt ,Diospi Suyana’, štož woznamjenja ,Dowěr so Bohu’“, zwurazni jednaćel DEBAG Oliver Theiß.
Šulerjo sadźeja tysacy štomow
Wojerowski Léona Foucaultowy gymnazij je mišter w lutowanju energije
Wojerecy (AK/SN). Dołhodobnje z klimje přichilenej šulu stać chce so Wojerowski Léona Foucaultowy gymnazij. Tohodla je so na cyłozwjazkowym wubědźowanju www.energiesparmeister.de wobdźělił.
Cyłosakske wothłosowanje 2020 přez iniciatiwu co2online bě gymnazijej dobyće wunjesło. A 18. septembra wotmě so nětko počesćenje na runinje Zwjazka. Z projektom „Energijowe liški“ w kmótřistwje z iniciatiwu „eins energie in Sachsen GmbH & Co. KG“ je sej Léona Foucaultowy gymnazij druhe městno zawěsćił. Tak je kubłanišćo nětko „wicemišter w lutowanju energije w Němskej 2020“. „Počesćenje je nam připóznaće a pohon“, praji šulski nawoda Uwe Blazejczyk.
