Znowa w cyrkwi kradnyli

Pančicy-Kukow. Z třomi mužemi, kotřiž běchu wutoru w Róžeńčanskej cyrkwi křiž, klinkački a škličku pokradnyli, dyrbješe so policija předwčerawšim znowa zabě­rać. Po tym zo běchu zastojnicy sakralne wěcy wutoru do Róžanta wróćili, je sku­ćićeljo na samsnym městnje nazajtra znowa spako­sćichu. Policija lepi jich z rubiznu w klóštrje Marijinej hwězdźe w Pančicach-Kukowje. Paduchow dowjezechu na Kamjenski policajski rewěr, dweju z nich po lěkarskim přepytowanju do chorownje.

Stefan Rjeda zastojnstwo w Pančičansko-Kukowskej gmejnskej radźe złožił

Pančicy-Kukow (SN/MWj). Posedźenja gmejnskeje rady Pančicy-Kukow drje su runja podobnym gremijam zwjetša wěcowne a racionalne. Wčerawše poslednje w lěće 2020 pak měješe přiwšěm emocionalny wukónc. Za zwonkastejacych překwapjace bě, zo je wjesnjanosta Markus Kreuz (CDU) wjelelětneho gmejn­skeho radźićela Stefana Rjedu (Serbske wolerske zjednoćenstwo) na jeho próstwu ze zastojnstwa rozžohnował. Kukowčan je něhdźe 30 lět Pančičansko­Kukowskej gmejnskej radźe přisłušał a so stajnje z wulkim angažementom za naležnosće wobydlerjow zasadźał. „Wón bě stajnje spušćomny a sej swojeje zamoł­witosće wědomy“, wuzběhny Markus­ Kreuz a přepoda Stefanej Rjedźe swěčkowy wobłuk z motiwom klóštra Marijineje hwězdy jako symboliski dźak.

Budyšin. Koronapandemije dla dźěła Budyske měšćanske zarjadnistwo tuchwilu na hranicy swojich móžnosćow. Wosebje napjate je połoženje w přizjewjerni a na stawnistwje. Spočatk decembra běchu tam wosom sobudźěłaćerkow pozitiwnje na koronu testowali, šěsć z nich so hišće wustrowiło njeje. Mjez druhim tam tež smjertne wopisma wustajeja. Mjeztym pochowanske instituty podłožki zemrětych z přidawkom „kontaminowane“ wotedawaja, štož sobudźěłaćerki wosebje poćežuje. Zo bychu znajmjeńša nuzowe dźěło zaručili, je přizjewjernja za publikum zawrjena. Wobydlerjo měli so najprjedy telefonisce wobhonić, kak móža swoje naležnosće najlěpje zrjadować, měšćanske zarjadnistwo zdźěli.

Poslednje dny stareho a prěnje dny nowe­ho lěta su na mnohich městnach składnosć, na dźěło zašłych měsacow zhladować. Serbske Nowiny rozhladuja so po dwurěčnych komunach, što su tam zdokonjeli.

Kulow (AK/SN). Najebać koronapandemiju móžeše město Kulow lětsa swoje planowane naprawy zwoprawdźić, kaž měšćanosta Markus Posch (CDU) w swojim zhladowanju 2020 podšmórnje. „Wažne najprjedy raz bě, zo smy nowu pěstowarnju w Kulowje dotwarili a za wužiwanje přepodali. Dale smy saněrowanje Krabatoweje zakładneje šule dokónčili“, sćehnje Posch prěnju bilancu. W zakładnej kaž tež we wyšej šuli „Korla Awgust Kocor“ je město do digitalneje infrastruktury inwestowało. Klětu chcedźa hišće kónčne nastroje kaž tablety, laptopy a digitalne tafle wobstarać. Wonkownje najwočiwidniše je nowowuhotowane Kulowske torhošćo.