50 lět po maturje so zetkali
Něhdyša rjadownja 12B1 Serbskeje wyšeje šule je so minjenu sobotu zetkała, zo by spominała na połstatu róčnicu złoženja matury 1970. Bohužel so pjećo wobdźělić njemóžachu. Tež naš tehdyši rjadowniski wučer Teo Bejmak chorosće dla pódla njebě.
Najprjedy pobychmy w naše „starej“, nowej šuli, w Budyskim Serbskim gymnaziju. Tele twarjenje někotři z nas hišće njeznajachu. My smy tehdy hišće w Małym Wjelkowje do šule chodźili a w internaće bydlili. Internat hólcow bě na starym hrodźe w Radworju.
Nawoda Serbskeho gymnazija René Wjacławk nas po domje wodźeše. Wón je nam fachowe rumnosće z načasnym wuhotowanjom pokazał, w awli zajimawosće wo šuli powědał a na naše prašenja wotmołwjał. Tak plećeše so rozmołwa mjez druhim tež wo wučbje po systemje 2plus, wo serbskosći na gymnaziju abo wo wućeženju kubłanišća. Skónčnje móžachmy hišće cyle horjeka na štwórtym poschodźe wužiwać krasny wuhlad na cyłe sprjewine město. Renéjej Wjacławkej so za zajimawe a wěcywustojne wodźenje a rozmołwu hišće raz cyle wutrobnje dźakujemy.
Zo njebychu korjenje puć kóncowali
Asfaltowane kolesowanske šćežki podłu łužiskich jězorow su přewšo woblubowane. Wone pak maja špak, zo je korjenje štomow wotspody kóncuja. Łazowska gmejna chce nětko přećiwo tomu zakročić.
Łaz (AK/SN). Kolesowanski kołopuć wokoło Třižonjanskeho jězora chce gmejna Łaz ponowić a w tym zwisku tomu zadźěwać, zo korjenje štomow a kerkow asfaltowu worštu kóncuja. Tomu su gmejnscy radźićeljo na swojim zašłym posedźenju přihłosowali.
Přewšo dobry wothłós měješe minjeny kónc tydźenja ...
Center swjeći 20lětne wobstaće
Krótkopowěsće (07.10.20)
Wučerka so natyknyła
Ralbicy/Budyšin. Serbska zakładna šula Ralbicy je wot korony potrjechena, kaž Budyski krajnoradny zarjad wčera wozjewi. Infekciju su pola wučerki zwěsćili, jednu rjadownju 4. lětnika pósłachu do karanteny, dalše kontakty tuchwilu přepruwuja. Wčera bě w Budyskim wokrjesu 16 wobkrućenych nowonatyknjenjow z koronawirusom, cyłkownje 654. Schorjenych je 75 wosobow (+12).
Nobelowe myto Němcej
Stockholm. Nobelowe myto fyziki dóstanu lětsa hnydom třo, kotřiž su wo čornych dźěrach w swětnišću slědźili a kompaktny objekt w centrumje našeje galaksije wotkryli. Połojcu pjenježneho myta spožča Rogerej Penrose z Wulkeje Britaniskeje. Tamnu połojcu dźělitaj sej Andrea Ghez z USA a Reinhard Genzel z Mnichowa, zdźěli wčera akademija wědomosćow w Stockholmje.
Pilotojo a politika
Hódnje na dudaka spominać (13)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ tworićelskosć na dobro našeje maćeršćiny znowa pozbudźiło. Serbske Nowiny tule w serialu rjad drobnych a małych projektow předstajeja.
Wón bě wusko ze Slepjanskej wosadu zwjazany a česćeše sej lětstotki zakorjenjenu tradiciju hudźenja na dudach. Na kozole a na měchawje wón hraješe. „Korla Tilich z Małeje Nydeje njehudźeše jenož na dudach. Wón je tež sam twarješe, porjedźeše a wukubła njeličomnych młodostnych w hraću na tymle instrumenće. Za naš ansambl je wón samo wšelake twórby za dudy spisał“, powěda předsydka Serbskeho folklorneho ansambla Slepo Stephanie Bierholdtec. Wot lěta 2015 je wona zdobom społnomócnjena za turizm gmejny Slepo a dźěła w Slepjanskim Serbskim kulturnym centrumje.
Prominentny na wotewrjenju był
Wo nowej trajnej wustajeńcy so wobhonili
Załožba za serbski lud spěchuje tójšto zarjadnišćow a projektow, kotrež k zachowanju a wuwiću serbskeje rěče a kulturny přinošuja. Za natwar wustajeńcy serbskeje ewangelskeje drasty na Ćišćanskim statoku je tamniše kulturne towarstwo wot załožby něhdźe 2 000 eurow dóstało.
We wobłuku informaciskeho zarjadowanja we Wojerowskim regionje su sobudźěłaćerjo załožby tele dny tež Ćišćanski statok wopytali a so wo stawje projekta wobhonili. Witała je jich předsydka Tina Schubertowa. Hans Groba poda přehlad wo aktiwitach Ćišćanskeho kulturneho towarstwa a rozłoži natwar wustajeńcy. Wona je mjeztym hač na někotre mjeńše dźěła kaž wopisanje jednotliwych eksponatow dozhotowjena. Skupinka rjemjeslnikow towarstwa bě wustajenišćo w swójskej režiji přihotowała a je technisce wuhotowała.
Policija (06.10.20)
Kolesowarja so šmórnył a dale jěł
Budyšin. Na Ćichońskej dróze w Budyšine je minjenu sobotu popołdnju wodźer wosoboweho awta dweju kolesowarjow přesćahnył. Při tym so wón jednoho z njeju z wonkownym špihelom šmórny, tak zo kolesowar padny a so zrani. Zawinowar pak je dale jěł. Policija pyta nětko swědkow, kotřiž su snano něšto wobkedźbowali.
