Krótkopowěsće (16.06.21)
Hač do kónca septembra
Budyšin. Šćěpjenskej centrumaj w Kamjencu a Lubiju ze swojimi mobilnymi teamami hač do kónca septembra dale dźěłatej. Prěnje šćěpjenja pak zaručeja tam jenož hišće hač do awgusta. W Budyskim wokrjesu přizjewichu wčera štyri natyknjenja z koronu a jedyn smjertny pad. Incidenca po RKI wučinja tu dźensa hódnotu 10. W Zhorjelskim wokrjesu rozprawjachu wo dwěmaj infekcijomaj. Incidenca po RKI je tam dźensa 6,3.
Hišće wušo z Pólskej dźěłać
Podstupim. Braniborska chce přichodnje hišće wušo ze susodnej Pólskej hromadźe dźěłać a po móžnosći wjele žiwjenskich a politiskich wobłukow splesć. To je krajne knježerstwo po informacijach statneje kenclije wčera wobzamknyło. Tak chcedźa mjezu přesahowacu zhromadnosć sylnić a rozrost pomjezneho regiona zhromadnje zaručić.
Startuja nowy podcast
Z wobydlerskim etatombudu wšelke projekty spěchować
Wojerecy (SN/MiR). Wobydlerski etat je ludźom dobra składnosć, swoje ideje za polěpšenje zhromadnosće zwoprawdźić. Wšelake města, mjez kotrymiž su nimo Kamjenca a Budyšina tež Wojerecy, wospjet pjenjezy za tajki wosebity etat planuja. W měsće nad Čornym Halštrowom nětko wuslědk wo wothłosowanju wobydlerskich namjetow předleži. Tam bě běrow wyšeho měšćanosty mjeztym třeći króć pod hesłom „Kóždy hłós płaći!“ wot 17. meje do 7. junija wobydlerjow namołwjał, aktiwnje sobu rozsudźić wo tym, kotre projekty měli z pomocu Wojerowskeho wobydlerskeho etata lětsa zwoprawdźić. 37 wšelakich namjetow bě do zarjadnistwa dóšło. Wuličenje hłosow je zakónčene. Hač su wšitke woprawnjene, tuchwilu pruwuja.
Policija (15.06.21)
Winik so cyle jednorje wotsalił
Kulow. Policija pyta swědkow njezboža, kotřiž móža so pod telefonowym čisłom 03571/ 465 0 abo na policajskim rewěrje přizjewić. Dźens tydźenja běše so w Kulowje njezbožo stało. 62lětna bě w 14.45 hodź. z kolesom po Kamjenskej po puću z města won. Do křižowanišća před dwórnišćom dyrbješe wona pomałšo jěć, dokelž tam awta čakachu. Při tym ju čorny VW Passat hišće přesćahny a nadobo borzdźeše. Kolesowarka sćahny wodźidło nabok, zo njeby do awta zrazyła, a padny. Zawinowar njezboža pak je z městna njezboža ćeknył.
Staršiski popłatk nochcedźa najprjedy raz zwyšić
Hamor (CK/SN). Popłatk staršich za hladanje dźěći w gmejnje Hamor najprjedy raz njezwyša. Wčera běchu tamniši gmejnscy radźićeljo wo předłoze wuradźowali, njejsu pak ničo rozsudźili. Na namjet zarjadnistwa měli přinoški wo tři procenty stupać. Nawoda hłowneho zarjada Arian Leffs bě to z wjetšimi personalnymi kóštami po tarifje wopodstatnił. Dźewjećhodźinske zastaranje w žłobiku měło potom na měsac 220 eurow płaćić, w pěstowarni 116 a w horće 64 eurow. To by w žłobiku šěsć, w pěstowarni tři a w horće dwaj euraj wjace było. Kaž Arian Leffs potwjerdźi, by gmejna z lochkim zwyšenjom dale w delnim resp. srjedźnym ramiku ležała, při čimž bychu starši potom po procentualnych předpisach Swobodneho stata Sakskeje na kóštach při zastaranju dźěći wobdźěleni byli. W poměrje k susodnym gmejnam by so Hamorska w srjedźnym polu zaměstniła.
Wotewrjene durje w hladarni
Worklecy budu bórze wo zajimawostku bohatše, hdyž tam nowa dnjowa hladarnja oficialnje dźěłać započnje. Pjatk, 18. junija, móža sej zajimcy wšitko dokładnje wobhladać.
Worklecy (SN/MWj). Po jednym lěće twarskeho časa a dalšej chwili přihotow je nětko we Worklecach nowa dnjowa hladarnja za staršich ludźi hotowa. Nastała je wona w bywšej wjesnej předawarni, kotruž staj Šnajderec mandźelskaj Jěwa-Marija a Carsten kupiłoj a wobšěrnje přetwariłoj. Rady byštaj wonaj hladarnju z jeje 18 městnami hižo prjedy wotewrěłoj, ale běrokratiske zadźěwki běchu zdźěla hoberske a dyrbjachu so hakle přewinyć.
Slědźenja měli dale hić
Nowe dopóznaća wo stawiznach, ze Serbami zwjazanych
Čorny Chołmc (SiR/SN). Susann Wuškec a Hans-Jürgen Schröter staj minjene šěsć měsacow pod nawodom Čornochołmčanskeho Krabatoweho młyna so ze stawiznami wsy kaž tež z jeje historiskimi zwiskami a jeje wokolinu, z Krabatowej baju a z Chorwatskeje pochadźacym wyškom Jankom Šajatovićom zaběrałoj. Minjenu sobotu staj wonaj projekt wosrjedź wsy, na naměsće před Frenclowym domom, předstajiłoj. „Team je so jara angažował a přewšo hódne fakty wotkrył. Njedosaha jeničce na powjerchu škrabać. Sym dźakowny za historisce hłuboko sahace dźěło. Tajki projekt w tej formje dotal njemějachmy“, podšmórny jednaćel Krabatoweho młyna Tobias Čižik. Zdobom so wón wjeseleše, zo bu předewzaće z kulturneho fondsa Budyskeho wokrjesa financowane.
Wjace hač 40 připosłucharjow běše přeprošenje sćěhowało, mjez nimi iniciatorka młyna Gertrud Wincarjowa. Woni zhonichu na přednošku pak jeničce dźěl dotalnych dopóznaćow. Wobsah slědźenjow je wo wjele wobšěrniši.
Nowe překwapjenki
Krótkopowěsće (15.06.21)
Dźeń a mjenje natyknjenjow
Budyšin. W Budyskim wokrjesu informowachu wčera wo jednym natyknjenju z koronawirusom. W tudyšich chorownjach lěkuja tuchwilu 44 koronapacientow, z nich dwanaće na intensiwnej staciji. Incidenca po RKI je tu dźensa 13,7. We wokrjesu Zhorjelc registrowachu wot soboty hač do wčerawšeho tři dalše infekcije a dwaj smjertnej padaj z časa wot 2. do 4. junija. Incidenca po RKI je tam 6,7.
Sputnik z ekologiskeje surowizny
Eespo/Paris. Finske předewzaće Arctic Astronautics a europska swětnišćowa agentura ESA wuwiwatej prěni přewažnje drjewjany satelit, kotryž chcedźa hišće lětsa do orbita dowjezć. Zaměr projekta „WISA Woodsat“ je wobkedźbować, kak so bjezćežitosć a radiacija w kosmosu na drjewo wuskutkujetej, a wuslědźić, hač hodźało so wone tam jako alternatiwa na přikład k zwjazowanskim maćiznam (Verbundstoffe) wužiwać.
Nahrawaja w Čěskej Šwicy
Policija (14.06.21)
Smjertnje njezbožił
Budyšin. Pjatk wokoło 23.30 hodź. bě šofer motorskeho po zwjazkowej dróze B 156 do směra na zajězd awtodróhi Budyšin-wuchod po puću. W dołhej křiwicy zjědźe wón z jězdnjenje, zrazy do nabóčneje planki a na to do štoma. Jako prěni wuchowarjo městno njezboža docpěchu, běše muž hižo bjez wědomja. Woni drje jeho reaniměrowachu, ale bjez wuspěcha, wón hišće na městnje wudycha. B 156 běše dlěje hač dwě hodźinje zawrjena.
