Za wudźeržowanje a porjedźenje pućow ma gmejna jenož mało pjenjez
Njeswačidło (JK/SN). Nawodnica twarskeho zarjada Njeswačanskeje gmejny Katrin Ulrich njeměješe so lochko, jako na zašłym posedźenju gmejnskeje rady lětušu sumu pjenjez za ponowjenje a wudźeržowanje gmejnskich dróhow mjenowaše. 53 000 eurow smědźa wočakować a k tomu zbytk 5 600 eurow z lěta 2020. Tak mało pjenjez wulke skoki njedowola. Tohodla wjesnjanosta Gerd Schuster (CDU) namjetowaše, takrjec jako domjacy nadawk, wo tym rozmyslować, kotre dróhi měli so sporjedźeć abo ponowić. Tajku prioritnu lisćinu přihotuja samo na sebi kóžde lěto. Za lětušu lisćinu, wo kotrejž chcedźa na přichodnych posedźenjach wuradźować, mjenowaštaj Schuster a Ulrich někotre přikłady. Tak měli so Kamjenska dróha a Při hrodźe w Njeswačidle, dźěl wjesneje dróhi w Dobrošicach a dźěl puća w Holešowje ponowić. Dale předwidźane su někotre mjeńše puće, kotrež maja so zazyglować, to rěka z ćeńkej asfaltowej worštu skrućić a zrunać.