Policija (24.08.20)
Bjez bencina a dowolnosće
Budyšin. Na twarnišću awtodróhi A 4 mjez wotbóčkomaj Budyšin-wuchod a Wóspork wčera krótko po połnocy šofer wosoboweho awto hižo dale jěć njemóžeše. Přiwołana policija zwěsći, zo bě 26lětny muž zabył, swój Alfa Romeo sčasom natankować. Při dokładnišim přepruwowanju so wukopa, zo młody muž scyła žane awto wodźić směł njeby, dokelž dyrbješe před časom swoju jězbnu dowolnosć wotedać.
Za wučerjow a kubłarjow
Wučbna kuchnja ma nastać
Dźěćacu a młodźinsku farmu we Wojerecach wobšěrnje ponowja
Wojerecy (JK/SN). Wulki wokomik bě to minjeny štwórtk na Wojerowskej dźěćacej a młodźinskej farmje, jako witachu tam sakskeho ministra za regionalne wuwiće Thomasa Schmidta (CDU). Jeho bě přeprosył Křesćansko-socialny kubłanski skutk (CSB), w kotrehož nošerstwje farma je. Minister bě sobu přinjesł wulki šek za trěbne wobnowjenje tamnišeho farmoweho domu. Tale twarska naprawa je wobstatk hranicy přesahowaceho projekta, kotryž CSB wot lěta 2019 zhromadnje z uniwersitu we Wrócławju zwoprawdźa. We Wojerecach chcedźa 170 000 eurow za wutwar delnjeho poschoda tamnišeje farmy nałoži.
Dowěru do demokratije wróćić
Pradowěra do demokratije je ćerpjeła. Ludźo so wot politiki wotwobroćeja. Woni čuja so njesłyšani a wumjezowani. „Dyrbimy jim dowěru do demokratije wróćić. Dyrbimy demokratiju wuchować“, měni architektka a cityjowa managerka Dorit Baumeister. Jako njestronjanka nastupi wona k wólbam wyšeho měšćanosty Wojerec 6. septembra. Wolerske zjednoćenstwo Lěwicy, Zwjazka 90 /Zelenych a zwjazka Aktiwne Wojerecy kandidaturu podpěruje.
Krótkopowěsće (24.08.20)
Financne zamóženstwo rostło
Frankfurt nad Mohanom. Financne zamóženje priwatnych domjacnosćow w Němskej je po woteběranju korony dla po nětko předležacej analyzy hižo zaso rekordny niwow docpěło. Bursa je so wočerstwiła a mnozy ludźo dale wjele pjenjez nałoža. Tuž wuchadźa banka ING Němska z toho, zo je financne zamóženje domjacnosćow kónc junija w sumje na 6,55 bilionow eurow rozrostło.
Funda za CDU nastupi
Slepo. Jörg Funda nastupi za CDU k wólbam wjesnjanosty Slepjanskeje gmejny 1. nowembra. Kaž Zhorjelski wokrjesny zwjazk strony zdźěli, su čłonojo gmejnskeho zwjazka CDU Slepjanska wosada Fundu hižo minjenu wutoru nominowali. Po wotstupje dotalneho wjesnjanosty Reinharda Borka nawjeduje Jörg Funda wot 1. awgusta tamniše zarjadniske zjednoćenstwo nachwilnje.
Matury bjez censurow?
Policija (21.08.20)
Drogi plahował
Łaz. We wjesnym dźělu Łazowskeje gmejny je policija minjene dny mału plantažu konopnych rostlin namakała. Na hornim poschodźe jednoswójbneho domu 60lětneho muža steješe dohromady 15 tychle rostlinow. Nimo toho namakachu zastojnicy wšelki grat za plahowanje tajkich drogow. Policija wšitko sćaza.
Bombu znješkódnili
Chór Budyšin spěwa
Wuježk. Dokelž po wěšćenju wjedrarjow zajutřišim, 23. awgusta, hižo cyle tak horco kaž dźensa njebudźe, móhł so tón dźeń wulět na Čornobóh zadanić. Wot 14 hodź. mjenujcy spěwa chór Budyšin na Čornoboze před tamnišej hórskej bawdu. Koncert wotměje so we wobłuku lětušeho Dnja Hornjeje Łužicy.
Čitaja a hudźa
Liboń. Štyristronski statok w Libonju w Hodźijskej gmejnje budźe jutře, sobotu, wot 15 hodź. městnosć za njewšědne zarjadowanje pod hołym njebjom. Wopytowarjo dožiwja tam čitanja a hudźbu dohromady dźesać sobuskutkowacych z Erfurta, Drježdźan, Budyšina a Berlina. Mjez druhim wustupi Anna-Maria Bretschneiderec.
Seniorojo škotuja
Kozarcy. Přichodny škotowy turněr serbskich seniorow wotměje so wutoru, 25. awgusta, w 14 hodź. Kartyplacarjo zetkaja so tónraz w Kozarčanskim hosćencu „Při kupjeli“, zdźěli organizator Měrćin Nowak. Tež nowačkojo su tam witani.
Na dworowy swjedźeń
Ze samozešitej tobołu kupać jěli
Smjerdźaca (aha/SN). Smjerdźečanske kubłanske srjedźišćo LIPA je lětsa pjaty raz w prěnim a poslednim tydźenju lětnich prózdnin planowało za předšulske dźěći a šulerjow prěnich lětnikow dny wočerstwjenja a sporta. Spočatk prózdnin su tydźeń z dwaceći wobdźělenymi dźěćimi wuspěšnje přewjedli. Za dalši su dóšli telko přizjewjenjow a naprašowanjow, zo dyrbjachu spěšnje přeplanować.
Wustawki za kupjel změnili
Runja wšitkim druhim kupjelam w Hornjej Łužicy je tež Kulowska tele dny přewšo derje wopytana. Přiwšěm wona njedawno měšćanskich radźićelow zaběraše. Někotři wočakuja njewočakowane wobmjezowanja.
Kulow (AK/SN). Měšćanscy radźićeljo Kulowa su sej přezjedni, zo je tamniša lěsna kupjel za město a wokolne wsy dale trěbna. Ju maja dołhodobnje zawěsćić a wo jeje dalšej eksistency njeměli žane dwěle być. Wo změnje popłatkowych wustawkow, kotrež płaća wot 11. decembra 2014, pak maja radźićeljo rozdźělne měnjenja. To wotbłyšćowaše so na zašłym posedźenju měšćanskeje rady, jako tale tema na dnjowym porjedźe steješe a so wo kontrowersnu diskusiju postara.
