Policija (25.06.21)
Kolesa awta kradnyli
Nadźanecy. Wšitke štyri kolesa Mercedesa su njeznaći w nocy na srjedu w Nadźanecach (Nadelwitz) wotšrubowali a sobu wzali. Při dalšim awće su šruby kolesow pušćili, policija wčera zdźěli.
Jasne nadawki za wutwar šule
Kachlicarske dźěła hišće raz wupisaja – poskitk předrohi był
Wotrow (SN/MiR). Pančičansko-Kukowski wjesnjanosta Markus Kreuz (CDU) a tamniši gmejnscy radźićeljo zaběrachu so na swojim wčerawšim posedźenju we Wotrowskej starej šuli z twarskimi nadawkami za saněrowanje a přetwar Šule Ćišinskeho. Po wuwjedźenjach Markusa Kreuza přewozmu regionalne a nadregionalne sakske předewzaća nadawki za suchotwar, za durje w objekće, woknowe deski, za sćěny, kotrež rumnosće dźěla, za blidarske dźěła kaž tež za wonkowne durje. Nastupajo zatwar tepjenskeje, přewětrjenskeje a sanitarneje instalacije přepodadźa dźěła samsnemu předewzaću, kotrež bě hižo prěni twarski wotrězk zdokonjało. Nastupajo kachlicarske dźěła gmejna nadawk hišće raz wupisa. „Na prěnje, wobmjezowane wupisanje, kotrež je w zakonju wo rozdawanju (Vergabegesetz) předpisane, běše so jeničce jedne předewzaće požadało“, Markus Kreuz rozłoži, „a jeho poskitk ležeše 26 procentow nad wobličenymi kóštami.“
Stólcy wosebity powabk byli
Do zahrod(k)ow druhich pohladnyć, so překwapić dać a sej inspiracije za swójski refugij sobu wzać, to je wotmysł Kamjenskeje měšćanskeje dźěłarnje. Minjenu njedźelu je wona druhi króć „dźeń wotewrjenych durčkow do zahrodki a na dwór“ přewjedła.
Kamjenc/Njebjelčicy (SN/MiR). W cyłku 23 mějićelow zahrod(k)ow je so na lětušej akciji wotewrjenych durčkow wobdźěliło. Někotři hobbyjowi zahrodkarjo běchu wospjet pódla, dalši prěni króć. W Kamjencu na Połčničanskej mějachu samo wjacore zahrodki, hdźež wopytowarjow witachu. Najrjeńšo drje bě, zo mějachu nimale wšudźe składnosć so posydnyć. Tu a tam poskićachu wobsedźerjo zahrod(k)ow wopytowarjam něšto k wočerstwjenju. W Kamjencu předawachu hosćencarjo wosebite chłóšćenki do zahrodkow chwatacym na ruku.
Jedna z poslednich mejow, za kotrejež wjerškom młodostni sahnychu, ...
Krótkopowěsće (25.06.21)
Wustajeja šćěpjenske certifikaty
Budyšin/Zhorjelc. W Budyskim krajnoradnym zarjedźe wotnětka šćěpjenske certifikaty RKI wustajeja. Kaž tam wčera zdźělichu, je wužiwana software „Schnelltest.Click“ swobodna šaltowana. Je pak trjeba do toho termin knihować. W Budyskim wokrjesu podachu wčera dwě koronanatyknjeni, incidenca po RKI je dźensa 1,7. Wokrjes Zhorjelc wudospołni statistiku smjertnych padow wo dwaj. Incidenca tam je po RKI dźensa 4,4.
Za wjace staršiskeho časa nanow
Drježdźany. Wobzamknjenje nastupajo wjetše wobdźělenje nanow na staršiskim času je na saksku iniciatiwu konferenca ministerkow a ministrow za runostajenje a žony wčera schwaliła a prosy tak zwjazkoweho zakonjedawarja pruwować, kak daloko je móžno, dalše znamjenja za intensiwniše wužiwanje staršiskeho čas přez nanow sadźeć. Zaměr je runostajenje w partnerstwje.
Jancyna naslěduje Michałkowu
Policija (24.06.21)
Zražce na wotpočnišću
Budyšin. Hnydom dwójce je wutoru na wotpočnišću Hornja Łužica při awtodróze A 4 k zražce dóšło. Popołdnju bě 53lětny Słowak ze swojim sedłowym wlečakom při zaparkowanju do nakładneho awta z kranom zajěł. Škoda wučinja 4 000 eurow. Wječor zrazy Ukrainjan ze swojim Lkw-jom do Mercedesa Vito a je škodu 3 000 eurow načinił.
Wotewru wustajeńcu
Budyšin. Jutře, 25. junija, wotewru w Budyskim Kamjentnym domje wustajeńcu -dieniemandsrose- Budyskeje wuměłče Heike Dittrich. Hač do 30. julija móža sej zajimcy wobhladać rysowanki a fotografije, kotrež so ze židowskimi stawiznami 20. lětstotka w Budyšinje rozestajeja. Jako zakład za swoje twórby je Dittrich wužiwała lětnej spisaj měšćanskeho muzeja z dokumentaciju židowskeho žiwjenja w měsće. Titul přehladki je ze zwjazka basnjow Paula Celana „Die Niemandsrose“. Zajimcy njech přizjewja so z mejlku na abo telefonisce pod čisłom 03591/5319972. Trěbnej stej škitny nahubnik kaž tež negatiwny koronatest z testowanskeho centruma, nic starši hač 24 hodźin. Druhe šćěpjenje, znajmjeńša dwě njedźeli stare, tohorunja akceptuja.
Kedźbu, serbscy škotowarjo
Lejno. Skónčnje móža seniorojo-škotowarjo zaso karty placać. Kaž Měrćin Nowak z Lubija zdźěli, zetkaja so woni wutoru, 29. junija, w 14 hodź. w Lejnjanskim hosćencu „K lipje“. Wobkedźbować maja so postajenja korony dla. 14. septembra chcedźa sej kartyplacarjo potom do Błótow wulećeć.
Wopomnišćo zaso přistupne
Chcedźa 800. róčnicu wsya 100. róčnicu wobory swjećić
Poršicy/Rachlow (SN/MiR). Poršicy w Kubšiskej gmejnje zhladuja klětu na 800. róčnicu prěnjeho naspomnjenja. Nětko pyta gmejna ludźi, kotrež maja ideje za woswjećenje historiskeho podawka. Tak su do gmejnskeje nowiny z junija zapřijeli próstwu na wobydlerjow rozmyslować wo tym, kak swjedźenske lěto ze zarjadowanjemi wobohaćeć. Přijimarjam informacijow gmejny a dalšim čitarjam podawaja tam pokiw na knihu „Mjez Čornobohom a Krakečanskimi hórkami“, kotraž je před lětami w nakładnistwje Lusatia wušła. Historiske to pućowanje po Kubšiskej gmejnje přisłušacych wsach.
Překwapjenka w Delanach
Wot apryla wužiwa dźesać porow kibutow polo mjez Róžantom a Łazkom za hnězdźenje, lehnjenje a za to, swoje młodźata woćahnyć. Tam je tuchwilu najwjetše lehnišćo tejele družiny ptačkow po cyłej Sakskej.
Róžant (SN/MiR). Hižo srjedź měrca běchu jednaćelej spěchowanskeho towarstwa Sakskeje hladarnje ptačkow w Njeswačidło dr. Winfriedej Nachtigallej prěnje kibuty napadnyli. Wšako wone dosć wótře swoje ki-wit wołaja. Spočatk apryla běchu tam dwanaće kibutow wobkedźbowali, kónc apryla picowaše tam pjeć porow 17 młodźatow. Dalše štyri pory hišće na to čakachu, zo so młodźata z jejkow wudypaja. Poslednja kontrola kónc meje wunjese, zo sydaše tam pjeć žónkow, a widźeć bě hač do dźesać młodźatow. Tónle wuspěch bě jenož móžny, dokelž bě ratar Ralf Hentzschel kibutam polo přewostajił. Dalši partnerojo běchu mjenowane towarstwo a delni zarjad za přirodoškit Budyskeho wokrjesa. Na te wašnje móžachu ptački dwaj hektaraj njewobdźěłaneje role wužiwać, na kotrejž běchu niska wegetacija a dwě wulkej pólnej łuži.
