Krótkopowěsće (13.09.19)
Zettwitz Zhorjelc wopušći
Zhorjelc. Decernentka Zhorjelskeho wokrjesa Heike Zettwitz budźe nowa społnomócnjena wokrjesa Dubja-Sprjewja. Předwčerawšim je ju tamniši wokrjesny sejmik ze 44 ze 46 móžnych hłosow wuzwolił. Nowe zastojnstwo chce wona w nowembru nastupić. W Zhorjelskim wokrjesu nawjedowaše Zettwitz wobswětowy, twarski, lěsniski a wokrjesny wuwićowy zarjad kaž tež zarjadnistwo za nadróžny wobchad a porjad.
Wjesnjanostow witali
Radwor. Na žurli Radworskeho hosćenca „Meja“ přewjedźechu dźensa kóždolětne posedźenje přirady energijoweho zastaraćela Enso a Drježdźanskeho zastaraćela Drewag. Wjesnjanosta Wincenc Baberška móžeše měšćanostow a wjesnjanostow ze wšeje wuchodneje Sakskeje witać. Na spočatku rozłoži Tomaš Rječka přitomnym Radworske centralne tepjenje.
Filmy zapodać
Měšćanosta wobžaruje njewužiwanu šansu
Kulowski měšćanosta Markus Posch (CDU) je so wčera tydźenja na posedźenju gmejnskeje rady k wuslědkej wólbow Sakskeho krajneho sejma wuprajił.
Kulow (AK/SN). Markus Posch hódnoći wuslědk wólbow krajneho sejma jako njewužiwanu šansu. Direktny kandidat CDU, Mathias Kockert z Kulowa, njeje sej při wólbach 1. septembra direktny mandat za krajny sejm zdobył. „Jako měšćanosta to jara wobžaruju, za město a za naše wjesne dźěle. Runje direktny kandidat w Drježdźanskim krajnym knježerstwje stajnje zaso durje wotwěra“, Posch wuzběhny. W Kulowje drje bě so Kockert z 55,2 procentomaj wšěch hłosow jasnje přesadźił, w dalšich komunach wólbneho wokrjesa 54 Budyšin pak doby kandidat strony AfD Timo Schreyer. Wón bě mjez druhim w Njedźichowje 6,8 procentow hłosow wjace nažnjał hač Kockert, we Łutach 10,7 procentow wjace a we Wóslinku samo 11,0 procentow.
Młodostni chorym rady poboku
Policija (12.09.19)
Bulowe saki pokradnjene
Kamjenc. Kamjenscy koparjo so njemało dźiwachu, jako zwěsćichu, zo bě jim něchtó saki, kotrež bule wotpopaduja, pokradnył. Po 60 metrach běchu wone w stadionje na Dittrichowej na wjacore sćežory přičinjene. Wěcna škoda wučinja něhdźe 6 000 eurow. Problem je, zo budu bórze nowe saki trjebać.
Podhladneho zadźerželi
Wojerecy. We Wojerecach je policija wutoru wječor při kontroli 36lětneho lepiła, kiž bě z hižo loni pokradnjenym kolesom po puću. Nimo toho měješe podhladny zakazany nóž při sebi.
Wjelk borana po wsy ćěrił a morił
Krajny rada Harig a wjesnjanosta Kreuz žadataj sej wótriše naprawy
Budyšin (SN/mwe). „Takle dale njeńdźe“, rěka w nadpismje nowinskeje zdźělenki Budyskeho krajnoradneho zarjada, kotruž je nam Tobias Schilling, fachowy referent krajneho rady Michaela Hariga, wčera sposrědkował. Po aktualnym wjelčim nadpadźe w Žuricach žadataj sej Harig a Markus Kreuz (wobaj CDU), wjesnjanosta gmejny Pančicy-Kukow, razniše zapřimnjenje přećiwo wjelkej. Wuchadźišćo jeju postupowanja je, zo je wjelk minjenu sobotu rano w šesćich wulkeho borana z pastwišća přez Žuricy ćěrił, njeposrědnje pódla wjesneje dróhi morił a tam hač do połojcy zežrał. Hišće w 6.45 hodź. je wobydler rubježne zwěrjo při bliskim kamjentnym nasypje wobkedźbował, prjedy hač so wone do směra na Rušicy zhubi. Z wotškódnjenjom za grawoćiwje zakusaneho borana jeho plahowar ličić njetrjeba, dokelž njebě minimalny škit zawěsćeny. „Najebać to njemóžemy akceptować, zo wjelk wosrjedź sydlišća skoćo zakusa a scyła spłóšiwy njeje“, Michael Harig wuswětla.
Wobydlerjo kaž šoferojo wolóženi
Po měsacy trajacych twarskich dźěłach a poćežowanjach hary a procha dla, hdźež su tež wulke štomy podrězali, su wobydlerjo w Němcach wolóženi: Wutwar statneje dróhi S 95 je zakónčeny.
Němcy (SN/mwe). Dźewjeć tydźenjow prjedy hač planowane je dróha z Kulowa přez Němcy do Wojerec zaso wobjězdźomna. Z wulkim wjeselom móžachu Němčenjo a mnozy dalši kaž tež šoferojo přepodaće wulkeho projekta wčera popołdnju přez Wojerowskeho wyšeho měšćanostu Stefana Skoru (CDU) sćěhować. Wšako dyrbjachu so wobydlerjo wosebje při wulkej horcoće a suchoće z prochom bědźić.
Hižo w lěće 2010 běchu z narunanskim nowotwarom mosta přez Čorny Halštrow prěni krok k wobnowjenju jara wobjězdźeneje dróhi z Kulowa do Wojerec přez Němcy činili. Hnydom po tym bě dalši wutwar dróhi planowany. Konsolidacijow hospodarskeho plana města Wojerec a dalšich ćežow dla pak dyrbjachu naprawy přeco zaso přestorčić. Hakle w lěću 2014 móžachu z nowym planowanjom dróhotwara přez Němcy započeć.
Wotrowčenjo hotuja so na swój wjesny swjedźeń, kotryž tam wot ...
Chcedźa z Njebjelčanskej pěstowarnju wabić
Filmowy team z Lipska je wčera w Njebjelčicach zapopadnył wobrazy za imageowy pask. Ćežišćo filmowcow běchu wosebitosće architektury tamnišeje pěstowarnje.
Krótkopowěsće (12.09.19)
Za towarstwo Krabata hłosować
Njebjelčicy. Krabatowe towarstwo je za Myto publikuma Němskeho angažementoweho myta namjetowane. Online-wothłosowanje je so dźensa w interneće pod https://www.deutscher-engagementpreis.de/publikumspreis/ zahajił. Sakske towarstwo kandiduje we wosom z 19 temowych wobłukow. Po cyłej republice, rozrjadowane po zwjazkowych krajach, wabi 617 cyłkow wo podpěranske hłosy.
Wojerowska šula pódla
Drježdźany/Wojerecy. Wyša šula „Při planetariju“ we Wojerecach je jedne z pjeć sakskich kubłanišćow, hdźež zwoprawdźeja projekt „šula a digitalna demokratija“. Jedne lěto wukmanjeja profijo šulerjow, wučerjow a staršich. We workshopach posrědkuja hódnoty we wobłuku socialnych medijow, zo bychu online-diskriminaciji w formje cyber-mobbinga abo hatespeechow zadźěwali.
Kóncowku „-ová“ zachować
Policija (11.09.19)
Woclowe dźěle na dróze
Budyšin. Na Budyskej Lubijskej dróze je so wčera rano připowěšak po zdaću złamaneho dźěla dla z turkowskeho nakładneho awta wutorhnył. Na nim běchu ćežke woclowe dźěle składowane, kotrež wšitke na dróhu spadachu. Wotrězk zwjazkoweje dróhi B 6 bě hač do wječora zawrjeny, dokelž dyrbjachu dźěle rumować a skóncowane nakładne awto wotwjezć.
Z mašiny diesel wuklumpali
Bluń. Na twarnišću w Blunju (Bluno) běchu njeznaći minjeny kónc tydźenja z twarskeje mašiny něhdźe 300 litrow diesela wuklumpali. To je twarski dźěłaćer hakle wčera zwěsćił. Kriminalna policija nětko za paduchami slědźi.
