Wot apryla wužiwa dźesać porow kibutow polo mjez Róžantom a Łazkom za hnězdźenje, lehnjenje a za to, swoje młodźata woćahnyć. Tam je tuchwilu najwjetše lehnišćo tejele družiny ptačkow po cyłej Sakskej.
Róžant (SN/MiR). Hižo srjedź měrca běchu jednaćelej spěchowanskeho towarstwa Sakskeje hladarnje ptačkow w Njeswačidło dr. Winfriedej Nachtigallej prěnje kibuty napadnyli. Wšako wone dosć wótře swoje ki-wit wołaja. Spočatk apryla běchu tam dwanaće kibutow wobkedźbowali, kónc apryla picowaše tam pjeć porow 17 młodźatow. Dalše štyri pory hišće na to čakachu, zo so młodźata z jejkow wudypaja. Poslednja kontrola kónc meje wunjese, zo sydaše tam pjeć žónkow, a widźeć bě hač do dźesać młodźatow. Tónle wuspěch bě jenož móžny, dokelž bě ratar Ralf Hentzschel kibutam polo přewostajił. Dalši partnerojo běchu mjenowane towarstwo a delni zarjad za přirodoškit Budyskeho wokrjesa. Na te wašnje móžachu ptački dwaj hektaraj njewobdźěłaneje role wužiwać, na kotrejž běchu niska wegetacija a dwě wulkej pólnej łuži.