W parlamentach dwurěčnych gmejnow je lědma žonow. W Pančicach-Kukowje běchu w minjenych měsacach samo jeničce mužojo. To pak je so z wčerawšim posedźenjom změniło.
Wotrow (SN/MWj). Dotal běchu w gmejnskej radźe Pančicy-Kukow móhłrjec mužojo mjez sobu. Jako jenička žona bu w lěće 2019 Katrin Piller do gremija wuzwolena. Chorosće dla pak wona zastojnstwo bórze po wólbach złoži. Wot toho časa bě parlament ryzy muski. Dokelž pak je Stefan Rjeda kónc minjeneho lěta swój mandat wotedał, maja nětko zaso žonu w gmejnskej radźe. Je to Grit Hawšowa z Pančic-Kukowa, kotraž nětko za Serbske wolerske zjednoćenstwo parlamentej přisłuša. Při wólbach 26. meje 2019 bě wona dohromady 115 hłosow dóstała. Grit Hawšowa přisłuša nětko tohorunja hłownemu wuběrkej gmejny a je zastupowaca čłonka techniskeho wuběrka.
Dokelž bě Stefan Rjeda wjele lět zastojnstwo 1. zastupowaceho wjesnjanosty wukonjał, dyrbjachu wčera tež tule poziciju znowa wobsadźić a wuzwolichu za to Stefana Andersa (CDU). 2. a 3. zastupowacy wjesnjanosta staj Peter Rietscher (CDU) a Stefan Cyž (Serbske wolerske zjednoćenstwo).
