Čestnohamtski angažement je w dźensnišej towaršnosći njeparujomny. Naš system wosebje we wjesnych kónčinach wot tajkeho wotwisuje. Tak wukonjeja wo­hnjowi wobornicy swěru swoju słužbu. A dalše cyłki prócuja so wo dobru zhromadnosć. Towarstwo Radworske dwórnišćo inkluzije wokoło Chěžkec swójby z Boranec je so na wosebje wulki projekt zwažiło a chce něšto jónkrótne we wokolinje wutworić. Po swojich wizijach dadźa tuchwilu Radworske dwórnišćo na zetkawanski centrum přetwarić, a to z přede­wšěm priwatnymi srědkami. Tajke něšto nječini so tak připódla, ale je z wjele rozsudami a nadawkami zwjazane. Štóž je hižo raz staru chěžu přetwarił, wě, wo čim rěču. Sy-li jónu wjerchi, swisle, třěchu abo sćěnu wočinił, dyrbiš stajnje z njerjanymi překwapjenkami ličić. Mam tuž wulki respekt před towarstwom a angažementom Chěžkec swójby. Nadźijam so, zo sej swoje wizije z dalšej wutrajnosću a sćerpnosću spjelnja. Bianka Šeferowa

Dalše komuny Zhorjelskeho wokrjesa dóstanu šěrokopasmowu techniku

Rózbork (AK/SN). W Zhorjelskim wokrjesu dóstanje dźesać dalšich komunow z dohromady 3 500 domjacnosćemi spěšny internet. „Tak móžemy słabje wobsydlene wjesne kónčiny we wobłuku strukturneje změny dale wuwiwać“, rjekny krajny rada Bernd Lange (CDU) minjeny štwórtk při symboliskim zahajenju twarskich dźěłow přez Němsku telekom w Rózborku. Po cyłoeuropskim wupisanju běchu předewzaću nadawk za twarske dźěła přepodali. Konkretnje dźe mjez druhim wo Rózbork, Hamor, Běłu Wodu, Wuskidź, Krušwicu, Mužakow a Nisku. Cyłkowne kóšty wučinjeja po dotalnym planowanju 25,5 milionow eurow. Z toho přinošujetej Zwjazk 15 milionow a swobodny stat 10,5 milionow. Cyłkownje ma wokrjes 70 milionow eurow spěchowanskich srědkow k dispoziciji.

Schadźowanka budźe!

Budyšin. Organizaciski team załožby je rozsudźił lětušu schadźowanku w Budyšinje přewjesć, a to 21. nowembra w „Krónje“. Přihoty su zaběželi, a kul­turne skupiny budu najručišo informowane. Wobšěrny hygienowy koncept, kotryž je z wuměnjenjom, nětko zdźěłuja. Reje pak žane njebudu a bara wostanje za­wrjena.

Dalše štyri koronapady

Budyšin. Přez kónc tydźenja su w Budyskim wokrjesu dalše štyri nowoinfekcije z koronawirusom zwěsćili. Jedyn pacient je so zwonka wokrjesa natyknył, tamni na swójbnych swjedźenjach. Ličba w zwisku z koronu zemrětych wučinja mjeztym 21. Spočatk meje natyknjena 53lětna žona, kotraž bě wot toho časa w chorowni, je komplikacijow korona­infekcije dla zemrěła.

Štó dóstanje myto publikuma?

Ralbicy (JK/SN). Wokomiknje maš dźěło gmejnskeje rady Ralbicy-Róžant nastupajo zaćišć, zo so wšitko jenož hišće ­wokoło noweje Ralbičanskeje pěstowarnje wjerći. Tola tomu tak njeje. Nimo noweje kalkulacije za drje najwjetše wu­žadanje delanskeje gmejny wěnowachu so radźićeljo na minjenym posedźenju tež hinašim wažnym nadawkam. Woni so dojednachu, zo lětušu a klětušu ­pawšalu 54 000 eurow k wudźeržowanju komunalnych pućow zjimaja. Tak hodźi so wjetši objekt zwoprawdźić. Po gmejnskej prioritnej lisćinje měli Trupinski puć w Ralbicach a Fabriksku dróhu w Šunowje ponowić. K tomu poda twarski in­ženjer a planowar Stanij Statnik roz­prawu k stawej a móžnym naprawam. Z nazhonjenjow minjenych dróhotwarskich projektow by móžno było – hladajo na dale a tuńše poskitki fachowych firmow – přirunajo z kalkulaciju gmejny wobaj pućej wobnowić. Radźićeljo so tuž dojednachu, wupisać wobaj pućej klětu spočatk lěta za wobnowjenje w dwěmaj losomaj a potom poskitki firmow wo­čaknyć. Jeli su wone we wobjimje gmejnskich­ móžnosćow, hodźitej so ­wobaj pućej ponowić.