Krótkopowěsće (24.07.20)
SLM ma noweho jednaćela
Lipsk. Dr. Hardy Sieglitz budźe wot 1. awgusta nowy jednaćel Sakskeho krajneho medijoweho wustawa (SLM). „Wjeselimy so, zo nimamy z dr. Sieglitzom jenož wosebje kompetentneho partnera, ale nadźijamy so, zo dr. Sieglitz na wosebite wašnje ke konstruktiwnej komunikaciji mjez gremijemi a sobudźěłaćerkami a sobudźěłaćerjemi přinošuje“, rjekny předsyda zhromadźizny SLM Dawid Statnik.
„Denkzeit Event“ zahajeny
Drježdźany. Sakska je wubědźowanje „Denkzeit Event“ zahajiła. Za nowe a inowatiwne koncepty za zarjadowanja pod wuměnjenjemi korony přewostaji swobodny stat 1,5 milionow eurow. Najlěpše ideje chcedźa z 1 000 do 50 000 eurami mytować. Hač do 21. awgusta móža so zajimcy přizjewić.
Situacija dale napjata
Policija (23.07.20)
Pjaneju kolesowarjow lepili
Čorny Hodler. Chětro wopitaj a ke kolesowanju po wšěm zdaću hižo njekmanaj běštaj muž a žona, kotrejuž lepichu policisća w nocy na srjedu na Čornohodlerskim parkowanišću. 53lětna žona bě tam padnyła a so při tym zraniła, jeje 44lětny přewodźer spyta so wo nju starać. Najskerje běštaj wobaj z kolesom na dompuću z hosćenca, rěka w policajskej rozprawje. Při kontroli zwěsćichu pola žony 1,24 promilow alkohola w kreji, pola muža samo 1,96 promilow. Na to měještaj wobaj krej wotedać. Skónčnje dowjezechu jeju k ambulantnemu zastaranju do chorownje. Wo dalšich konsekwencach jězdźenja lepjeneju pod wliwom alkohola rozsudźi statne rěčnistwo.
Podpěruja konkretne projekty
Rakečanska gmejna přewostaja w lěće 2020 towarstwam znowa pjenjezy, zo móhli swoje nadawki spjelnić. Tónraz pak kroča po hinašim puću hač loni.
Rakecy (JK/SN). Loni je Rakečanska gmejna towarstwa pawšalnje spěchowała z fondsa 70 000 eurow, kotrež je Sakska komunam za swójske wužiwanje přewostajiła. A tak smědźeše so kóžde towarstwo nad podpěru wjeselić. Zdobom pak nastachu rozmyslowanja, hač njeby spomóžniše było podpěru za towarstwa na cyle konkretne projekty wjazać. Tak je spěchowanje tež za zjawnosć skutkowniše a towarstwa přidatnje wužada.
Přewjedu medijowy labor
Budyšin. Sakski wukubłanski a wupruwowanski kanal přewjedźe w swojej Budyskej wotnožce na Mukowej wot 27. julija hač do 7. awgusta medijowy labor. Wobdźělnicy budu na přikład swójske ideje z 3D-ćišćakom zwoprawdźić móc a dóstanu fachowu pomoc wot planowanja hač k zwoprawdźenju. Dźěło wukonjeja w małych skupinach a w separatnych rumnosćach. Zajimcy hač do dwanaće lět njech přizjewja so pod .
Dale jeno z terminom
Wojerecy. Zo móhli we wobłuku přizjewjernje Wojerowskeho měšćanskeho zarjadnistwa wotstawkowe rjadowanja dodźeržeć, móža tam wobydlerjo swoje naležnosće jenož potom zrjadować, hdyž maja termin dorěčany. Město poskići tuž móžnosć, sej termin na swojej internetnej stronje pod www.hoyerswerda.de online dorěčeć. Štóž tajku móžnosć nima, njech sej termin tež pod telefonowym čisłom 03571/ 456 456 wučini. Kaž z měšćanskeho zarjadnistwa rěka, běchu tónle system w aprylu 2020 zawjedli. Wón je so jako dobry wopokazał, dokelž dlěšim čakanskim časam zadźěwa.
Znamjo zwjazanosće z domiznu
Ze stolětneho duba w Brězowce bajowa postawa nastała
Brězowka (AK/SN). Z wjace hač sto lět stareho duba je Slepjanski drjeworězbar Thomas Schwarz wot měrca tohole lěta skulpturu wódneho muža tworił, kotraž steji nětko w Brězowce. „We wobliču wódneho mža zjednoćeja so pryzle kaž tež dobroćiwosć. Zwisk ze wsu bě mi při tym wažny“, rjekny wuměłc minjeny pjatk při wotkryću skulptury. Domowinska skupina bě na zarjadowanje přeprosyła.
Bjezposrědnje nad motiwom wódneho muža steji serbske mjeno wsy Brězowka. K skulpturje słuša ławka, na kotrejž su widźeć ryby, woda a žołmy. „Ławka nasta z wjerška duba“, powěda Thomas Schwarz. Skulptura steji wosrjedź lipoweho hajka. „Je to moja třeća postawa wódneho muža. 2014 sym tajku za Radowizu (Radewiese) pola Mosta (Heinersbrück) w Delnjej Łužicy twarił, lěto pozdźišo slědowaše ławka z wódnym mužom, błudničkami a lutkami za Witaj-pěstowarnju ,Milenka‘ w Rownom.“
Nukle plahować je jim wjeselo
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Chróšćanske towarstwo plahowarjow nukli (6).
Klětu zhladuje Chróšćanske towarstwo plahowarjow rasowych nukli na 50. róčnicu wobstaća. Załožili běchu je za čas NDR, zo bychu jako plahowarjo kruty zakład za zachowanje čistych rasow měli. Tehdy dźě wjele ludźi na wsach za swójske zastaranje drobny skót plahowaše. Tež podpěra při přidźělenju picy bě zaručena. Čłonam towarstwa bě wažne, zo fachowcy nukle plahuja.
Zjawna kupjel w Miłorazu drje dožiwi lětsa swoju poslednju sezonu. ...
Pytaja pod dróhu za municiju
2,8 milionow chudych dźěći
Bertelsmannowa załožba wulke regionalne rozdźěle w Němskej zwěsćiła
Gütersloh (dpa/SN). Chudoba dźěći w Němskej wostanje po najnowšim přepytowanju z njezměnjenymi wulkimi ličbami dale „njewobdźěłane wulkotwarnišćo“. Něhdźe 2,8 milionow dźěći a młodostnych wotrostuje w chudobje – 21,3 procenty wšěch młódšich hač 18 lět, Bertelsmannowa załožba wčera rozprawješe. „Hižo wjele lět je bój přećiwo chudobje dźěći jedne z najwjetšich towaršnostnych wužadanjow w Němskej.“ Najebać to su wot 2014 w cyłoněmskim přerězku lědma polěpšenja spóznajomne. Wjace hač kóždy pjaty wotrostowacy je potrjecheny – z wulkimi regionalnymi rozdźělemi. Koronapandemija hrozy problem hišće přiwótřić, załožba zwěsća.
Krok po kroku serbšćinu wuknyć
Zmužitosć słuša ke kóždemu spočatkej. „Wšo dalše slěduje. Je wažne nowotarstwo njewotpokazać, ale je wuhotować“, wopisuje Karsten Herden w Běłej Wodźe swoje wašnje žiwjenja. Na namjet Zwjazka 90/Zelenych přisłuša wón přiradźe za serbske naležnosće Zhorjelskeho wokrjesneho sejmika.
Wotrostł je Herden w Radojzu (Radeweise) pola Grodka. 1986 bu jeho ródna wjes wotbagrowana. Něhdźe 200 wobydlerjow su přesydlili. „Naša swójba drje nima serbske korjenje“, praji 40lětny, kiž je mjeztym Běłowodźan. „Tradicije a nałožki, kaž debjenje jutrownych jejkow a mejestajenje a -mjetanje, pak słušeja stajnje hižo k mojemu žiwjenju. Za mnje jako dźěćo na wsy bě to normalita.“ Jeho dźěd Heinz Koalick bě hač do lěta 1985 wjesnjanosta w Radojzu, wowka Charlotte nawjedowaše konsumowu předawarnju. Po přeću staršeju nawukny Karsten Herden po wuchodźenju šule w Grodku powołanje kachlicarja. Žiwidłowa branša pak jeho bóle wabješe. Tak sta so z kucharjom a wukubła so pozdźišo na fachoweho hospodarja. Dwě lěće nawjedowaše w Běłej Wodźe kuchnju. Wot lěta 2018 dźěła wón jako hospodarski nawoda Budyskeje hladarnje na Židowje.
