Na Hórčanskim sportnišću njejsu tele dny za bulom honili abo so w konjacym sporće wubědźowali. Tam bě ćežka technika zasadźena, štož pak měješe přiwšěm z jěchanjom činić.
Hórki (aha/SN). W lěće 1992 załožene konjace sportowe towarstwo Při Klóšterskej wodźe ze swojimi tučasnje něhdźe 50 čłonami wobdźěla so mjeztym na turněrach po cyłej Němskej. Hač do lěta 2005 organizowaše wone wjacore tajke ze swójskimi mocami tež w Chrósćicach, pozdźišo pak kóždolětnje na sportowym arealu w Hórkach a na płoninach njeposrědnje wokoło tamnišeho stadiona.
Přihoty na turněry su wulke wužadanje čłonam towarstwa a mnohim dalšim jich čestnohamtsce podpěrowacym. Tola tež dźěło po turněrje žada sej dokładne postupowanje. Wosebje strapacěrowany trawnik sportnišća ma so po turněrje zaso wuporjedźeć, zo bychu tam mjez druhim tež koparjo sportoweho towarstwa Módro-běli Hórki dobre wuměnjenja měli a zo njeby strach hrozył znjezbožić, abo so zranić.
