K jubilejej přeprošuje hornčer na dworowy swjedźeń
Halštrow (SN/MWj). Runje před 25 lětami je Halštrowska Hollandec hornčernja prěni dworowy swjedźeń přewjedła. Tehdy zhladowachu na 250lětne wobstaće swójbneho předewzaća. Štwórć lětstotka pozdźišo hotuja so na přichodny „kulojty“ jubilej. Dworowych swjedźenjow je Hans Holland w tym času tójšto organizował, ale tón k 275. róčnicy zawoda je žno něšto wosebiteho. Što pak je jeho potajnstwo, zo jako hornčer tak dołho wobsteji? „Najwažniše je, zo sy hornčer z ćěłom a dušu. Wězo njesměš so kónctydźenskeho dźěła bojeć, hdyž sy wot jutrow hač do nazymy stajnje na najwšelakorišich wikach po puću“, Hans Holland wuswětla. Jeho wosebitosć je, zo ze swojimaj sobudźěłaćerkomaj lědma wuměłske wěcy zhotowja, ale hłownje sudobja, kotrež móžeš w domjacnosći trjebać a wužiwać. A te hodźa so do pjecy runje tak kaž do mikrožołmaka abo wopłokowanskeje mašiny.
Wobornicy dwójce widźeć
Na jězdźidle Regiobusa wabja wotnětka za wohnjowu woboru
Budyšin (CS/SN). Něhdźe 5 300 ludźi so w Budyskim wokrjesu w dobrowólnej wohnjowej woborje angažuje. Ale kaž předsyda wokrjesneho wohnjowoborneho zwjazka Gert Schöbel praji, je w najmjenje gmejnach hornja hranica docpěta. Nimo toho runje na mjeńšich wsach dnjowa hotowosć často zaručena njeje. Byrnjež po słowach Gerta Schöbela we wokrjesu něhdźe 1 000 młodostnych wobornikow měli, so něhdźe 80 procentow z nich zhubi, hdyž du na studij abo wukubłanje do cuzby. Wabjenje je potajkim nuznje trěbne.
Policija (25.07.19)
Pjenjezy a złoto slubili
Łuh. Hižo před wjacorymi tydźenjemi njeznaći žonje we Łuhu napowědachu, zo dóstanje wona bórze paket z pjenjezami, złotom a debjenkami, hdyž do toho 2 700 eurow přepokaza. Z wulkimi wočakowanjemi žona pjenjezy přepokaza, na slubjeny paket pak podarmo čakaše. Hakle zawčerawšim so wona policiji dowěri, po tym zo běchu cuzy z njej wospjet kontakt nawjazali. Tónraz chcychu dalšich 1 000 eurow měć, kotrež bychu pječa za cło trěbne byli.
Lany wolij w sudach poskićowali
Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo zetkawachu a rady pobjesadowachu. W našej lětnjej seriji na něhdyše wjesne wobchody dopominamy.
Dźensa: Wětrow (8)
Hižo we 18. lětstotku eksistowachu pola Wětrowa jamy, hdźež wudobywachu běłu hlinu. 1898 natwarichu za jeje předźěłanje šamotownju. Srjedź minjeneho lětstotka wutworichu na jeje městnje zawod za wohnjokrute cyhele, kotryž rozrosće w lětach wot 1959 do 1963 k najwjetšemu swojeho razu cyłeje NDR. Wjace hač 2 000 dźěłaćerjow sej tam swój wšědny chlěb zasłužeše. Runočasnje dyrbjachu za wulki dźěl dźěłaćerjow bydlenja zaručić. 89 swójbow tam spočatnje bydleše a 1968 bydlenske sydlišćo samo hišće powjetšichu. Za tam bydlacych natwarichu wulki kulturny dom a za zastaranje wulku konsumowu předawarnju, wšako so ličba wobydlerjow Wětrowa w běhu dźesać lět wo pjeć razow powjetši a 45 procentow wšěch wobydlerjow Bóščanskeje gmejny we Wětrowje bydleše.
Hdyž nas lěćo z 30 stopnjemi a wjace zapleńči, pyta čłowjek za ...
Z ruku stworjene
Krótkopowěsće (25.07.19)
ZVON zwyši płaćizny
Budyšin. Wot 1. awgusta maja ludźi wjace pjenjez za busowy abo ćahowy tiket na terenje Zaměroweho wobchadneho zwjazka Hornja Łužica-Delnja Šleska ZVON zapłaćić. To bě ZVON hižo w decembrje wyšich kóštow za sprit, personal a narunadłow dla wobzamknył. Tak stupa płaćizna za dnjowy tiket w terenje ZVON wot dotal 12 na 13,50 eurow.
Chcedźa dialog wuwabić
Choćebuz. „Ći tamni smy my – wobrazy disonantneje towaršnosće“ rěka fotowa wustajeńca, z kotrejž wěnuje so Braniborski krajny muzej za moderne wuměłstwo aktualnym towaršnostnym konfliktam. Chcedźa tak dialog mjez „Zmištrujemy to“ a „My smy lud“ wuwabić. Wustajeńcu wotewru 16. awgusta w Choćebuskim muzeju Dieselkrafwerk.
Murja z nowym mjezwočom
Busowe dwórnišćo bórze wužiwaja
Znaty zawod by swoju zamkarnju rady rozšěrił
Pančicy-Kukow (SN/MWj). Runje za čas žnjow maja sobudźěłaćerjo zawoda za ratarsku techniku BayWa w Pančicach-Kukowje ruce połne dźěła. Wodnjo a w nocy wobsteji nětko zasadźenska hotowosć. Hdyž so při dźěle na polu traktor abo syćomłóćawa skóncuje, dyrbja ju zamkarjo tak spěšnje kaž móžno sporjedźeć. „Jenož hdyž mašina funguje, wona ratarjej pjenjezy přinjese“, wě Steffen Müller. Hromadźe z dalšimi witaše regionalny nawoda BayWa za wuchodnu Saksku a južnu Braniborsku njedawno zapósłancow Sakskeho krajneho sejma Alojsa Mikławška a Marka Šimana (wobaj CDU), jako wonaj we wobłuku swojeje kóždolětneje kolesowanskeje jězby po swojimaj wólbnymaj wokrjesomaj tež w Pančicach-Kukowje pozastaštaj.
Policija (24.07.19)
Skućićela lepili
Budyšin. We wčerawšich rańšich hodźinach wobydler Budyskeje Mättigoweje policiju informowaše, zo bě runje wobkedźbował, kak so njeznataj do awta zadobudź spytataj. Jednoho ze skućićelow zastojnicy hišće na městnje lepichu, tamny ćekny. W nachribjetniku 39lětneho Georgičana namakachu wěcy, kotrež běchu po wšěm zdaću pokradnjene. Wokno Opela, z kotrymž so wón runje zaběraše, bě rozbite. W bliskosći wuhladachu štyri awta, do kotrychž bě so něchtó na podobne wašnje zadobył. Hač běštaj to 39lětny a jeho komplica, dyrbja nětko zwěsćić. Georgičana nachwilnje zajachu.
