Štóž je so minjeny čas po kćějacym ­Łazkowskim lěsu wuchodźował, je tam sta podołhojtych plastowych škitačkow wuhladał, kotrež sadźenki štomikow wobdawaja.

Łazk (SN/MWj). Łazkowski lěs je wokoło jutrow wjele ludźi přiwabił, kiž su tam kćějaty podlěsk wobdźiwali. Něchtóžkuli je so při tym snano prašał, što drje maja swětłe podołhojte plastowe štyriróžki woznamjenjeć, kotrež tam we wulkej ličbje wuhladaš. Wone škitaja sadźenki dubow, kotrež dyrbja tam něhdy narosć, rozłoži rewěrowy hajnik klóštra Marijina hwězda Guido Budar.