Sćiječenjo so z konceptom wuwića města Budyšina zaběrali
Sćijecy (CS/SN). Wjesna rada Sćijecy je so na swojim wčerawšim posedźenju z Integrowanym měšćanskim konceptom 2030+ rozestajała. W dokumenće, kotryž ma bórze jako 32stronska brošurka wuńć, su jednanske ćežišća za wuwiće města w přichodnych dźesać lětach zdźěłane, njezměja pak zakonsku móc. Přiwšěm tworja wone wotpowědne wuměnjenja za to, spěchowanske próstwy stajeć. Zdźěłali su koncept fachowe skupiny ze sobudźěłaćerjow měšćanskeho zarjadnistwa a lokalni akterojo, mjez nimi Załožba za serbski lud a Němsko-Serbske ludowe dźiwadło. Z něhdźe 550 namjetow dyrbjachu woni naprawy z najwjetšim efektom wuběrać. Wušła je z toho prioritna lisćina 20 dypkow, kotrež su nětko Sćiječanskej wjesnej radźe předstajili.
