156 idejow za wobydlerski etat města zapodali
Wojerecy (AK/SN). Za wobydlerski etat 2021 města Wojerec je 134 wobydlerjow dohromady 156 idejow zapodało. To je tójšto wjace hač loni a wotbłyšćuje, zo je wobydlerski budget dobre znamjo demokratije w měsće, rjekny předsyda wodźenskeje skupiny Uwe Blazejczyk.
Ze stareho a noweho dźěla Wojerec je 83 namjetow dóšło. Dohromady 24 z nich zaběra so z porjedźenjom hasow a naměstow, 17 měri so na naprawy za wuměłstwo, kulturu a pomniki, mjez druhim na zachowanje Čorneje róže při tak mjenowanym rosariumje blisko Budyskeje aleje. 14 namjetow wěnuje so hrajkanišćam, ławkam a papjernikam.
Policija (23.11.20)
Awto skóncowali
Kamjenc. Złu překwapjenku dožiwi sobotu rano 20lětna wobsedźerka Fiata Panda w Kamjencu. Wječor do toho bě wona swoje jězdźidło něhdźe w 22 hodź. na Njebjelčanskej dróze wotstajiła. W nocy běchu njeznaći wobě kolesy na prawym boku překłóli a na motorowej hawbje 30 centimetrow dołhu šmaru zawostajili. Wěcnu škodu trochuja na něhdźe 300 eurow.
Zarjad přećahuje
Za dobru wjesnu zhromadnosć
Wjele pilnych rukow so na a wokoło Worklečanskeje kupy gratu přimało
Worklecy (aha/SN). Syła Worklečanow je minjeny štwórtk a pjatk na kupje swojeje wsy dźěłowu akciju přewjedła. Hižo spočatk februara bě tamniša wjesna skupina CDU přeprosyła na zjawnu diskusiju k aktualnemu wuwiću w gmejnje. W srjedźišću stejachu ideje, kak móhli wjesnu zhromadnosć skrućić a kak móhł kóždy při porjeńšenju wsy pomhać. Bórze na to so rozsudźichu, so jako wjesna zhromadnosć na sakskim idejowym wubědźowanju „Čiń sobu!“ wobdźělić, štož so pozdźišo jako wunošne wopokaza. Jako kónc junija dotwarjeny móst wot wulkeje na mału kupu přepodachu, je statny sekretar za regionalne wuwiće dr. Frank Pfeil w přitomnosći wjesnjanosty Franca Bruska, zapósłanca krajneho sejma Alojsa Mikławška (wšitcy CDU) a wulkeje ličby Worklečanow Simonej Žurej dobyćerske wopismo a myto w hódnoće 5 000 eurow přepodał. Tak bě zaručene, zo móžeše so předwidźany projekt „Geocaches Michał Hórnik – přirodźe blisku rewitalizaciju“ zwoprawdźić.
Krótkopowěsće (23.11.20)
Tróšku mjenje nowoinfekcijow
Budyšin. 391 nowych koronainfekcijow su wot minjeneho pjatka hač do wčerawšeho w Budyskim wokrjesu zwěsćili. Kaž krajnoradny zarjad zdźěli, je 2 130 schorjenych (+20), z kotrychž 107 (+13) stacionarnje lěkuja. W klinikach wokrjesa je 165 koronapacientow z wjacorych wokrjesow, 29 z nich na intensiwnej staciji. W Zhorjelskim wokrjesu bě w samsnym času 361 dalšich natyknjenjow.
Na swoje dźěło skedźbniła
Budyšin. Z dwurěčnym nawěškom pod hesłom „Domizna je pola nas doma“ je Domowina sobotu we wosom lokalnych wudaćach tydźenika Wochenkurier w serbskim sydlenskim rumje Hornjeje a Delnjeje Łužicy na swoje dźěło za serbskosć jako tudyšu jónkrótnosć skedźbniła. Zdobom pokaza na swoju internetnu stronu a tam na trojorěčne wosebite wudaće „Naša Domowina“.
Prěnja hodowna amnestija
Policija (20.11.20)
Pokradnjene awto w lěsu stało
Sepicy. Při wuchodźowanju w lěsu pola Sepic je žona minjenu wutoru awto wuhladała. Najprjedy sej wona při tym ničo njemysleše, dokelž bě při jězdźidle marki Audi muž, kiž so jako policist wudawaše. Nazajtra na pokutnym dnju so žona tola rozsudźi, swoje wobkedźbowanje policiji zdźělić. Na to so wukopa, zo běchu njeznaći awto wutoru popołdnju w Złym Komorowje pokradnyli. Z pomocu hajnika móžachu je z lěsa wućahnyć.
Do wobchoda so zadobyć chcył
Budyšin. Wosrjedź swětłeho dnja je so předwčerawšim připołdnju njeznaty do wobchoda na Budyskej Šulskej hasy zadobyć spytał. Poradźiło pak so jemu to njeje. Přiwšěm nasta něhdźe 2 000 eurow wěcneje škody, kaž Zhorjelska policajska direkcija zdźěli.
Twjerdźizna jako filmowa kulisa
Mortkow (AK/SN). „Wjera Baba Jaga pyta rumpodicha“ rěka bajka, kotruž wjerća jako telewizijnu hru wot 1. decembra na Mortkowskej Jakubec twjerdźiznje. Ideju za to Andreas Pippart hižo dołho ma. Mjeztym pjeć lět nawjeduje režiser a jednaćel swoju Drježdźansku produkcisku firmu MyTVplus. Priwatny sćelak zwoprawdźa telewizijne produkcije, live-wusyłanja a multimedijowe produkcije. Hakle w septembru je Pippart w Čornochołmčanskim Krabatowym młynje wjerćał. W filmje sobu skutkować budźe countryjowa spěwarka Linda Feller, kotraž chce z rumpodichom duet spěwać. Dokelž pak wón njepřińdźe kaž wučinjene, wona hromadźe z wjeru Babu Jagu rumpodicha pyta, mjez druhim na potajnej twjerdźiznje.
Na Mortkowsku twjerdźiznu bu Andreas Pippart skedźbnjeny, jako bě we łužiskej jězorinje na wopyće. Minjene dny bě ze swojej sobudźěłaćerku Manuelu Lange na městnje. „Twjerdźizna so perfektnje hodźi“, bě wón zahorjeny. „Hollywood by tajku hakle za wjele pjenjez natwarić dyrbjał. Tu so za naš film wšitko wulkotnje hodźi.“ Tež mějićel twjerdźizny dr. André Jakubetz projekt podpěruje.
K jězorej kolesować
Wojerecy. Tónle tydźeń su posledni wotrězk kolesowanskeje šćežki z Wojerec k Šibojskemu jězorej dotwarili. Wona wjedźe nětko wot statneje dróhi S 108 wot přijězdki na přemysłowu přestrjeń Kinajcht hač ke kołopućej wokoło Šibojskeho jězora. W přihotach na twarske dźěła běchu wjace hač 200 štomow a štomikow podrězali. Za to su 20 při nowej kolesowanskej šćežce a tři na přemysłowej přestrjeni w Ćisku sadźili.
Koncert wotprajeny
Budyšin. Za sobotu, 28. nowembra, planowany awlowy koncert w Budyskim Schillerowym gymnaziju k zazběhej adwentneho časa so aktualnych přičin dla wotměć njehodźi. Kaž sobuorganizatorka Rosemarie Härtel zdźěli, chcedźa termin na sobotu, 9. januara, w 17 hodź. na samsnym městnje přestorčić, jeli to koronowe połoženje potom dopušći.
Wobchod dlěje wočinjeny
Hdyž su bydlenja prózdne
Spytaja wulke ćeže bydlenjotwarskeje towaršnosće rozrisać
Rakecy (JK/SN). Bydlenjotwarska towaršnosć Rakecy wojuje hižo někotre lěta z akutnymi hospodarskimi a financnymi problemami. Te su so mjeztym tak přiwótřili, zo móže towaršnosć swoje financielne winowatosće lědma hišće spjelnić. Gmejna jako hłowny towaršnik pyta hižo dlěši čas za móžnosću, ćeže rozrisać. Na wčerawšim posedźenju Rakečanskeje gmejnskeje rady naby tele prócowanje konkretne formy.
Zahroda za nutřkowne město
Město Kamjenc zhladuje na swojim teritoriju na wobšěrne tradicije zahrodnistwa a krajinotwara. W tym wobłuku móhła nětko dalša zajimawosć k tomu přińć.
Kamjenc (UM/SN). Na sakskim wubědźowanju „Ab in die Mitte“ je so město Kamjenc wuspěšnje wobdźěliło. Ze swojim projektom „Zahroda při mnišej muri“ wudoby sej wone wosebite myto nižozemskeho zahrodniskeho předewzaća, kotrež přewostaji kwětki w hódnoće 2 500 eurow.
Nadrobnosće wo zahrodźe při mnišej muri posrědkuja jeje iniciatorojo. Su to cityjowa managerka Anne Hasselbach, měšćanska dźěłarnička wobydlerska łuka, iniciatiwa wotewrjene zahrodowe durčka a planowarka zahrodow Almut Dietze. Zapadnje mnišeje murje pod tak mjenowanej horncowej halu (dźensa Irish Pub) je njewužiwana měšćanska ležownosć, kotraž je sebi samej přewostajena, ma pak po měnjenju iniciatorow potencial. Tam móhła wosrjedź města mała oaza nastać, z kotrejž hodźał so žiwjenski wobswět polěpšić a něšto přećiwo klimowej změnje činić.
