Na Njebjelčanskim swjedźenišću wosebity štom sadźić chcyli

Njebjelčicy (UM/SN). Při rejwanju za hwězdami přimać – tule romantisku předstawu zwjazuja hižo lětstotki z rejowej lipu. Wuměłsce zhotowjene pode­sty, kotrež wušikni rjemjeslnicy wokoło štomow natwarichu, dachu rejwacym začu­će, zo su njebju kusk bliže byli. Ći, kotřiž lipu jako mały štomik sadźa, wšak to lědma dožiwja. Hakle jich dźěći, snano tež hakle wnučki maja móžnosć, mjez hałzami narosćeneho štoma rejwać.

„Wnučkokmane“ – tele słowo zda so za ideju rejoweje lipy runje prawe być. Wnučkokmanosć je tež jedne z hesłow Njebjelčanskeje gmejny. „Při wšěm, štož planujemy a rozsudźamy, myslimy tež na wuskutki za tych, kotřiž za nami přińdu“­, rozłožuje wjesnjanosta Tomaš Čornak (CDU). W zwisku z rejowej lipu to najprjedy raz woznamjenja, zo změja wnučki dźensnišich Njebjelčanow rjane rejwanske městno.