Zahrodkowa přehladka wabi
Frankenberg. 8. krajna zahrodkowa přehladka Sakskeje přeprošuje wot minjeneje soboty hač do 6. oktobra zajimcow do srjedźosakskeho Frankenberga. Sakski ministerski prezident Michael Kretschmer (CDU) mjenowaše wustajeńcu při wotewrjenju „mustrowy přikład za naslědnje měšćanske wuwiće“. Organizatorojo su ze zazběhom spokojom, wšako předachu prěnjej dnjej 4 700 dnjowych a 139 trajnych zastupnych lisćikow.
Podpismo za škit klimy
Njebjelčicy. Njebjelčanski wjesnjanosta Tomaš Čornak (CDU) je jako prěni podpisał namołwu za zhromadne stejnišćo němskich měšćanostow a wjesnjanostow w naležnosćach demonstrowacych šulerjow a šulerkow za lěpši škit klimy. Z dalšimi zastupjerjemi komunow žada sej wón wot politikarjow Zwjazka a krajow trěbne naprawy zawjesć.
Daloki puć do lěkarnjow
Městačko Kinspork na zapadnej kromje wuchodneje Hornjeje Łužicy je 1248 w załoženskim dokumenće klóštra Marijineje hwězdy prěni króć dokumentarisce naspomnjene. Hač do politiskeho přewróta běchu w dźensa 4 412 wobydlerjow wopřijacym sydlišću tysacy sowjetskich wojakow zaměstnjene, z kotrymiž mějachu wobydlerjo wokoliny, tež Serbja, prawidłowny kontakt. Dźensa wabi wosebje překrasna Kinsporska hola do pućowanja. Tak přewjeduja tam pućowanja z busom. Jědźeš-li z Kinsporka dale do směra na Drježdźany, wuhladaš na lěwej stronje w lěsu wjelči pomnik. W nowembru 1740 běchu tam při Kohlhofowej hrjebi, dźensa B 97, poslednjeho wjelka zatřělili a jemu wosebity kamjeń postajili, kiž tam přeco hišće steji.
Paduch předawarja kusnył
Běła Woda. Blešu palenca je młody muž zawčerawšim w Běłowodźanskej kupnicy na Berlinskej dróze bjez płaćenja sobu wzać chcył. Předawar to pytny a jeho zadźerža. Při tym jemu paduch do ruki kusny. Přiwołani policisća 19lětneho skónčnje zajachu. Pola njeho naměrichu 2,78 promilow alkohola w kreji. Wón změje so nětko rubježniskeho padustwa dla zamołwić.
Budyšin. Załožba za serbski lud přeproša wšitkich zajimcow na zjawnu prezentaciju internetneho projekta Serbšćinu online wuknyć srjedu, 24. apryla, w 15 hodź. na žurlu Budyskeho Serbskeho domu. W lěće 2017 su projekt wuspěšnje prěni raz w zjawnosći předstajili. We wobłuku prezentacije chcedźa zhromadnje z Multimedialnym centrom za wuknjenje rěčow na Drježdźanskej Techniskej uniwersiće, kiž je online-program wuwił, nowosće a dalewuwića předstajić a zajimcam składnosć poskićić, so wo natwarje a wobsahu wobšěrnje wobhonić.
Za dźěłarničku so přizjewić
Budyšin. Spěchowanski kruh za serbsku ludowu kulturu wuhotuje sobotu, 27. apryla wot 10 do 17 hodź. w Budyskim Serbskim muzeju dźełarničku, w kotrejž zajimcam techniku škrabanja serbskich jutrownych jejkow zbliža. Wobdźělenje płaći na wosobu dźesać eurow. Zajimcy njech přizjewja so pod telefonowym čisłom 03591/550 108.
Najskerje při najrjeńšim nalětnim wjedrje pojěchaja serbscy křižerjo jutrowničku w dźewjeć procesionach do susodneje wosady, zo bychu wjesołe poselstwo zrowastanjeneho Chrystusa wozjewjeli. Kaž stajnje za poslednje wudaće Serbskich Nowin do jutrow smy so kantorow a nawodow procesionow za informacijemi prašeli.
Wjacore razy wob lěto je krej darowanska słužba Němskeho čerwjeneho křiža w Pančicach-Kukowje. Dźesatki ludźi přińdu to na Józefowu žurlu klóštra Marijineje hwězdy, zo bychu krej darili. Wčera bě mjez nimi cyle wosebity darićel.
Pančicy-Kukow (SN/MWj). Za toho, kiž prawidłownje krej daruje, su tele dny w běhu lěta móhłrjec rutina. Sčasom maš přeprošenje w listowym kašćiku. Hdyž tak daloko je, so přizjewiš, wotmołwu na wšelakoriše prašenja nakřižuješ, daš temperaturu měrić a wotedaš kapku kreje za přepytowanje, rozmołwješ so krótko z lěkarku a hižo ležiš na stólcu a krej ćeče ze žiłki do plastoweho měška. Tule proceduru Jan Nowotny z Pančic-Kukowa jara dokładnje znaje. Wčerawši darowanski termin w klóštrje Marijinej hwězdźe pak bě za njeho wosebity, přetož bě to stoty raz, zo je wón krej darił.