Zapřahi na wosebity nyšpor přijěli
Chrósćicy (SN). Hladajo na připowědźene wjedro so něchtóžkuli strachowaše, hač planowany nyšpor Towarstwa Cyrila a Metoda z požohnowanjom konjacych zapřahow wčera, njedźelu, w Chrósćicach scyła budźe. Připowědźeny dešćik pak na zbožo přićahnył njeje. Jeničce městnosć dyrbjachu přepołožić. Dokelž bě so cyłu sobotu bjez přestawki chětro dešćowało, bě łuka za Hatkami přemokra za konjace zapřahi.
Tak móžeše farar Gabriš Nawka z Kulowa na Cyrkwinskej horje nimale dwaceći pohončow a jich konjace zapřahi požohnować. Do Chrósćic přijěli běchu woni mjez druhim z Koslowa, Wotrowa, Chasowa a druhich serbskich wsow. Na jednym z wozow steješe žnjowa króna. To pak njebě ta, kotruž běchu čłonojo wjesneho towarstwa Domizna w minjenych tydźenjach nawili. Ta mjenujcy bě w samsnym času w cyrkwi widźeć. Dźensa dowjezechu ju Chróšćenjo do Drježdźan, hdźež so z njej na wubědźowanju wo najrjeńšu žnjowu krónu Sakskeje wobdźěla.
Wuspěšna sezona při haće
Němske Pazlicy (SN). Němskopazličanske stanowanišćo při wulkim haće je woblubowane. Lětsa móžachu w lěću nimo swójbow wosebje šulerjow witać, kotřiž tam po zakónčenju 10. lětnika abo po abiturje w skupinkach stanowachu. Sezona pak njeje hišće nimo. Jedyn z wjerškow budźe přichodnu sobotu, 3. oktobra, tradicionalny rybarski swjedźeń, zwjazany z dnjom wotewrjeneho campa. Hižo nětko planuja w syći za dźěćace a młodźinske dźěło w Biskopicach přebywanje dźesać- do 16lětnych, tež serbskich dorostowacych w krasnym arealu při Němskopazličanskim haće.
Wodźenja w zwěrjencu
Wojerecy (SN). Prawidłownje přeprošuja we Wojerowskim zwěrjencu na wosebite wodźenja, hdźež móža zajimcy tež za kulisy pohladać. Tak wotmě so njedawno wodźenje „Dobru nóc, zwěrjenco“. Dožiwić móžachu dźěći a jich starši kaž tež dalši, što so stawa, hdyž durje coologiskeje zahrody wječor za wopytowarjow zamknu. Hladarjam poboku móža zajimcy tohorunja 3. oktobra wot 8 hodź. dožiwić, kak zwěrjenc wotući. Coologiska pedagogowka Silke Kühn runja lawam a wopicam hižo na holcy a hólcow čakaja.
Antitest nětko tež doma móžny
Pančicy-Kukow (SN/mwe). Wot zašłeho štwórtka wot Sakskeje za nakup swobodny daty antitest koronoweho wirusa „AProof“ móža ludźo tež w apotekach na wsach kupić. Mějićel apoteki swj. Bosćana w Pančicach-Kukowje Gerd Müller-Gottschlick našemu wječornikej zdźěli, zo su w domje hižo na dowolnosć čakali. To rěka, ludźo so wospjet za tym prašachu, kak móža so doma sami testować, ale apotekam tajki test k dispoziciji njesteješe. Wotnětka je to wšudźe móžno.
W hórniskim regionje łuki tworić
Dźiwje kwětki porjeńšeja wobraz krajiny
Grodk (Jos/SN). Kak dale w bywšim hórniskim regionje? Kak móhli zarosćene solarne parki rjeńšo wupadać? Što noweho nastupajo floru a fawnu w rekultiwěrowanych płoninach jamy Wjelcej-juh? Tele prašenja rozjimachu na 12. dnju wodo- a přirodoškita w Słomjenju (Slamen), wuhotowaneho wot Grodkowskeho zaměroweho zwjazka wody a wotwody (SWAZ) kaž tež regionalneje wotnožki Němskeho přirodoškitneho zwjazka Nabu. Referentaj běštaj Janšojska biologowka Christina Grätz, jednaćelka renaturěrowanskeje twzr Nagola Re, a geologa dr. Reinhard Reißmann, dobrozdatnik poradźowarnje Beak consulting.
Region steji w srjedźišću
Słody su wšelake, ale biologisce plahowana běrna so derje předawa
Budyšin/Chrósćicy (SN/MiR). Ducy po Budyšinje na regionalnych a ekologisce produkowanych žiwidłach zajimowani kupcy zwěsća, zo tajke poskitki přiběraja. Před někotrymi lětami hišće dyrbjachu sej z němskich wulkoměstow so nawróćacy młodźi Łužičenjo swoje produkty w sakskej stolicy Drježdźanach abo přez internet wobstarać. Mjeztym pak tež we Łužicy tajke poskitki su. Mjez druhim móža sej wobstarać na tydźenskich wikach pod Bohatej wěžu stajnje štwórtk a sobotu při předawanskim stejnišću Michaela Ubla nimo produktow wot wulkoposkićerja z Błótow a mnohich dodawarjow sada, zeleniny, wolija a tak dale, tež běrny z Chrósćic. „Kupc je mi wo tym powědał, zo je w Chrósćicach bioratar, kiž ma běrny, po biologiskich měritkach plahowane, na předań. Připadnje sym Ignaca něšto pozdźišo na zjawnym zarjadowanju zetkał a zeznał. Nětko hižo dlěje, nimo tych mojich dotalnych partnerow, tež Wjeselic běrny předawam“, Ubl powěda.
Dale figowe łopjeno?
Próca so skónčnje wudaniła
W bywšej Kamjenskej chorowni bórze zaso žiwjenje knježi
Kamjenc (BG/SN). Wot štwórtka popołdnja je jasne: Bywša Kamjenska chorownja při železniskim nasypje je wuchowana. Blisko nutřkowneho města ma twarjenje z wothladanymi bydlenjemi nastać. Klětu 1. julija chcedźa z přetwarom započeć a 1. februara 2023 je poswjećenje předwidźane. Překwapjenka je: Dom wobhospodarić budu Hornjołužiske kliniki. Z teje přičiny je tež tamniši jednaćel Reiner E. Rogowski do Kamjenca přijěł. Nihdy nanihdy njeměješe nichtó do toho tajku mysličku, a nětko su wšitcy ćim zbožowniši. Dom, w kotrymž je znaty lěkar z Łužicy Johann Gottfried Bönisch praktikował, so zachowa. Mawsolej w parku chorownje na njeho dopomina.
Ahrens: Status njeje rozsudny
Němsko-serbska bikulturnosć měła w Budyšinje wobydlerjam a hosćom nazornišo dožiwjomna być. Tomu słužeše idejowa konferenca dźěłoweho kruha za serbske naležnosće nazymu 2018. Nětko dźe skónčnje wo to, wo dalšim postupowanju rozsudźić.
Budyšin (SN/at). Předsydka dźěłoweho kruha za serbske naležnosće města Budyšina, měšćanska radźićelka dr. Annalena Schmidt njebudźe wot 1. oktobra wjace w sprjewinym měsće bydlić. Přičina to, mandat złožić a zdobom funkciju na čole komunalneho narodnostnopolitiskeho gremija. Na wuradźowanju minjenu srjedu pod nawodom zastupowaceho předsydy Benjamina Wirtha su so tuž dojednali, rozsud měšćanskeje rady nastupajo nowowobsadźenje městna w dźěłowym kruhu wočaknyć a na wurjadnym posedźenju klětu w januarje wo nowej předsydce abo nowym předsydźe rozsudźić. Wotmołwu dóstachu tež na prašenje za stajnej kontaktnej wosobu k měšćanskemu zarjadnistwu. „Wo to stara so Markus Gießler, nawoda zarjada za hospodarstwo, kulturu, nowinarstwo a zjawnostne dźěło“, rjekny wyši měšćanosta Alexander Ahrens (SPD).
Krótkopowěsće (28.09.20)
Olympiada so njewotměje
Budyšin. Lětuša 54. centralna olympiada serbšćiny wupadnje. To zdźěli předsydka Serbskeho šulskeho towarstwa Ludmila Budarjowa. Přičina su aktualne wuwiće koronapandemije dla a wotprajenja ze stron šulow. Pod tajkimi wuměnjenjemi njehodźi so charakter wubědźowanja zaručić. Přichodna olympiada ma klětu wot 14. do 16. apryla we Wodowych Hendrichecach być.
Šulerjo a wučerjo w karantenje
Budyšin. Pada korony dla su šulerjo wjacorych rjadownjow, wjacore wučerki a hortnerki Zakładneje šule Frèdèrica Joliota Curieja w karantenje. Wšitcy budu na koronawirus testowani. Nětko pak maja doma wuknyć a nadawki spjelnić. Minjeny pjatk wozjewi strowotniski zarjad Budyskeho wokrjesa tři dalše nowoinfekcije z koronawirusom. Tuchwilu je we wokrjesu 25 schorjenych, z kotrychž jednoho w chorowni lěkuja.
Myto Budyskej hwězdarni
Tam a sem w měšćanskej radźe
Kamjenc (BG/SN). Poł hodźiny mějachu zajimcy čakać, kotřiž chcychu posedźenje Kamjenskeje měšćanskeje rady minjenu srjedu sćěhować. Přičina za to bě, zo je radźićelka frakcije Stadt Land Frau Anne Hasselbach swój mandat złožiła. Jeje naslědnica Sylvia Tanner bě swoju zwólniwosć mandat přewzać někotre dny do posedźenja z priwatnych přičin cofnyła. Z tym pak bě nastał problem. Měšćanska rada njebě jeje rozsud akceptowała. Zo njeby młoda žona a mać do wuskosćow přišła, je Hasselbach swoju próstwu wo wuwjazanje z nadawka tohorunja cofnyła. Tuž wostanje wšitko kaž je. Wo nowowobsadźenju pjeć fachowych wuběrkow pak dojednachu so měšćanscy radźićeljo bjez diskusije. Na to zaběrachu so woni z kónclětnym wotličenjom 2019 Měšćanskeje bydlenskeje towaršnosće, kotraž móžeše po někotrejžkuli ćeži na pozitiwne wuwiće pokazać.
