Žana kmana rubizna

Słona Boršć. Na awtodróhowym wotpočnišću pola Słoneje Boršće su so nje­znaći w nocy na wutoru do nakładneho awta zadobyli, jako 35lětny šofer prědku spaše. Najskerje pak běchu skućićeljo frustrěrowani, dokelž bě na Lkw-ju pica za kóčki nakładowana. Ta jim po wšěm zdaću ničo wunjesła njeby, přetož sobu wzali ničo njejsu. Weterinarny zarjad Budyskeho wokrjesa bě na městnje, šofer móžeše na to dale jěć.

Wojerecy. Runja mnohim dalšim zarjadnišćam dyrbješe spočatk tydźenja tež Wojerowska Łužiska kupjel zawrěć. Kaž jednaćel Matthias Brauer zdźěli, potrjechi to zjawne kupanje a sawnu kaž tež wšitke dalekubłanja, kursy a towarstwowe płuwanje. Byrnjež so intensiwnje wo to prócowali, njemóža tež žane šulske płuwanje a płuwanske kursy za pěstowarnje přewjesć. Po słowach Brauera je kupjel w tak mjenowanym standby-modusu. Ručež budu wotpowědne zakonske móžnosće wutworjene, chcedźa Łužisku kupjel krótkodobnje zaso wočinić.

Dźěći móža darik dobyć

Malešecy (CS/SN). Sanitarne připrawy w towarstwowym domje „Sprjewina parla“ w Połpicy (Halbendorf) w Malešanskej gmejnje zawěrno přemoderne njejsu. Tohodla dyrbja je nuznje ponowić. Zo móhli so čłonojo Malešanskeje gmejnskeje rady wo tuchwilnym stawje přeswědčić, přewjedźechu woni swoje po­sedźenje předwčerawšim w „Sprjewinej parli“. Tam mějachu wudawkam we wobjimje 12 000 eurow přihłosować. Sanitarne dźěła za tule sumu přewozmje Gärtnerec firma z Barta. Dale wobstaraja firma Hantke elektrodźěła za 1 100 eurow, firma Hanisch blidarske dźěła za 500 eurow a Baslerec předewzaće molerske dźěła za 2 500 eurow. Dokelž dyrbja hosćency cyły nowember začinjene měć, maja rjemjeslnicy w Połpicy přichodne tydźenje swobodnu ruku.

Pod pomnikoškitom stejacu bróžnju chcedźa klětu přesadźić

Trjebin (AK/SN). Šusterec statokej w Trjebinje, wo kotryž so tamniša Domowinska skupina stara, ma so klětu dalše historiske twarjenje přidružić. Trjebinska gmejna chce pod pomnikoškitom stejacu hlinjanu tykowanu bróžnju ze sydlišća Za Goru (Hinterberg) z lěta 1935 z Wochožanskeje brunicoweje jamy tam přesadźić. „Koncern LEAG projekt financuje a nas podpěruje“, zdźěli wjesnjanosta Waldemar Locke (CDU) na wčerawšim posedźenju gmejnskeje rady. Klětu chcedźa bróžnju wotnjesć a w originalny stawje zaso natwarić dać. W njej móže Domowinska skupina potom historiske ratarske nastroje kaž wulki wóz a młóćawu podstajić. Tuchwilu steja wone pod hołym njebjom.