Křesćansko-socialny kubłanski skutk je zamołwitosć wotedał

Łaz (AK/SN). Inkluzija a wotewrjenosć swětej stej wažnej wobsahowej ćežišći noweho ­nošerja wšěch štyrjoch dźěćacych ­dnjowych přebywanišćow Łazowskeje gmejny. Socialny zwjazk VdK Sakskeje budźe wot klětušeho jich nowy nošer. To je tamniša gmejnska rada na swojim minjenym posedźenju jednohłósnje wobzamknyła. „Rozsud je swědomiće wotwažowany“, podšmórny wjesnjanosta Thomas Leberecht (CDU).

Dotalny nošer dźěćacych dnjowych přebywanišćow „Bajkowy kraj“ we Łazu, „Sprjewine myše“ w Běłym Chołmcu, „Kraj kubołćikow“ we Wulkich Ždźarach a „Kraj kubołćikow“ w Šćeńcy (Steinitz) je wot lěta 2011 Křesćansko-socialny kubłan­ski skutk (CSB) Miłočicy. Tón pak je zrěčenje k 31. decembrej 2021 wupo­wědźił. Na wupisanje gmejny Łaz lětsa w prěnim kwartalu je so wosom zajimcow wo nošerstwo kubłanišćow prócowało. Třo z nich běchu we wušim wuběrje a mějachu składnosć so předstajić“, wjesnjanosta Thomas Leberecht rozłoži.