Njezměja hižo žane pinguiny

póndźela, 04. oktobera 2021
artikl hódnoćić
(0 )
Wojerecy (SN). We Wojerowskim coowje njebudu přichodnje hižo pinguiny widźeć. To staj nawoda coowa Eugène Bruins a jednaćel ZooKultur Arthur Kusber dorěčałoj. Přičina je po zemrěću tamnišich skoćatow přepytowanje připrawy za pinguiny a wuslědk obdukcije štwórteho přepytowaneho pinguina. Tež ta njeje přičinu smjerće zemrětych skoćatow wujasnić móhła. Mjeztym su dalše tři pinguiny zemrěli, byrnjež je intensiwnje wobkedźbowali, jim prewentiwne medikamenty dawali a wšitko desinfikowali. Nihdźe na terenje njejsu móhli bakterije zwěsćić, kotrež běchu pola jednoho zahinjeneho pinguina nadešli. Tež rozprawa obdukcije njeje nowe dopóznaća wunjesła. Kaž hižo pola předchadźacych zemrětych pinguinow njejsu přičiny, wosebje bakterielne schorjenje abo tajke na hriby zwěsćili. Nětko přewjedu dalšu analyzu aktualneje situacije a přepytuja dalše proby z připrawy pinguinow a zemrětych zwěrjatow. Poprawom je coo chcył zawostajenej ptakaj do druheho coowa wotedać. Byrnjež přepytowanja schorjenje njedopokazali, njehodźi so to wuzamknyć.
wozjewjene w: Lokalka
Prošu přizjewće so, chceće-li komentar podać

nawěšk