Dźiwadło wupadnje
Budyšin. Jutřiše předstajenje młodźinskeho dźiwadła při Němsko-Serbskim ludowym dźiwadle „Prěki-durich-loborka“ w 10 hodź. na hłownym jewišću schorjenja hrajerja dla wupadanje. Přichodnej předstajeni budźetej 3. nowembra w 10 hodź. a 19.30 hodź. na hłownym jewišću, kaž NSLDź informuje.
Na wodźenje a přednošk
Budyšin. Lubowarjo mólbow Ante Trstenjaka njech njeskomdźa jutře, 14. oktobra, sej do Budyskeho Serbskeho muzeja dóńć. We 18 hodź. poskića tam wosebite wodźenje po tuchwilnej wosebitej wustajeńcy „Barby daliny. Moler Ante Trstenjak a Łužiscy Serbja“. W 19 hodź. přizamknje so přednošk Jurja Łušćanskeho „Moja zaběra z Ante Trstenjakom“ (ze simultanym přełožkom). Wšitcy zajimcy su wutrobnje přeprošeni.
Porěči wo populizmje
Znowa wo tykancy spěwali
Sportowcy so sami gratu přimali
Lěpše wuměnjenja za sportowanje maja nětko w Kulowje. Tam su sej sportowcy móhłrjec sami wulke přeće spjelnili a sej nowe socialne twarjenje natwarili.
Kulow (SN/MWj). Na Kulowskim sportnišću při Koćinskej dróze je towarstwo DJK Módro-běli Kulow minjenu sobotu swoje nowe socialne twarjenje oficialnje přepodało. Požohnował je je wosadny farar dr. Wolfgang Křesák. K přitomnym čłonam sportoweho towarstwa porěčeštaj mjez druhim bywši Kulowski měšćanosta Udo Popjela, kiž je so za nowotwar sobu angažował, a cyłoněmska předsydka katolskeho zjednoćenstwa DJK (Deutsche Jugendkraft) Elsbeth Beha.
Wot lěća 2019 su na nowym socialnym twarjenju dźěłali. Wone nasta na městnje dotalneho sanitarneho twarjenja. W nim běchu nuzniki skóncowane a tepjenje často defektne. Scyła bě dom chětro dodźeržany, a tak dyrbjachu jón z nowym narunać. Nětko maja za hrajerjow kaž tež za přihladowarjow zaso porjadne sanitarne připrawy. Nimo toho nastachu přebywanska rumnosć, płokarnja za sportowu drastu a skład za sportowe wuhotowanje towarstwa.
Sprjewnik park wobstražuje
Nowa atrakcija woprawnjenych přičin dla z płotom wobdata
Budyšin (UM/SN). Wjetša hač čłowjek wulka drjewjana figura hobra Sprjewnika je nowy symbol Budyskeje Strowotneje studnje. Wona steji njedaloko Hasy Jana Skale. „Sprjewnik je jedna z najwuznamnišich serbskich powěsćowych figurow“, rjekny wčera jednaćelka Budyskeje bydlenjotwarskeje towaršnosće Kirsten Schönherr. Nadrobnišo rozłožić móžeše to zapósłanc Sakskeho krajneho sejma Marko Šiman (CDU). „Sprjewnik symbolizuje móc, zmužitosć a sebjewědomje, ale tež miłosć a přećelnosć. Dźakowano jemu je po legendźe město Budyšin nastało. Tež tři žórła Sprjewje su tam, hdźež su so Sprjewnikowe kłoki do zemje zaryli.“
Krótkopowěsće (13.10.20)
Pěstowarnja zawrjena
Budyšin. Pěstowarnja w delnich Sulšecach je po zwěsćenej koronainfekciji dźěsća hač do 22. oktobra zawrjena. Ralbičansku zakładnu šulu porno tomu zawrěć njetrjebaja, dokelž njejsu testy žane dalše pozitiwne wuslědki wujewili, kaž Budyski krajnoradny zarjad wčera zdźěli. Přez kónc tydźenja je ličba natyknjenjow w Budyskim wokrjesu wo 34 na 732 rozrostła, 138 (+20) ludźi je schorjenych.
Chór Budyšin z nowym předsydu
Budyšin. Benjamina Wirtha su čłonojo chóra Budyšin na swojej wčerawšej hłownej zhromadźiznje za noweho předsydu cyłka wuzwolili. Dotalna předsydka Janina Krygarjowa bě po wosom lětach na čole funkciju złožiła. W nowym předsydstwje nětko Sylwija Jancyna, Robert Lorenc, Anne Pawolski kaž tež Reinhard Simmgen sobu dźěłaja.
Rozrisanje njewotwidźomne
Policija (12.10.20)
„Třěchikryjerjo“ wobšudźić chcyli
Kamjenc. Po zdaću lukratiwny poskitk rjemjeslnikow je so tele dny w Kamjenskim měšćanskim dźělu Lückersdorfje jako wobšudnistwo wopokazało. Štyrjo mužojo, kotřiž so jako třěchikryjerjo wudawachu, 80lětnemu wobydlerjej poskićichu, zo bychu jeho carport znowa zakryli, a to za 450 eurow. Rentnar do toho zwoli. Njemało pak so wón dźiwaše a nastróži, jako jemu pozdatni fachowcy zličbowanku 12 000 eurow předpołožichu a sej nablaku pjenjezy žadachu. Na to zawoła muž policiju. Ta zwěsći, zo rumunscy staćenjo w starobje 28 do 43 lět scyła žanu přemysłowu dowolnosć njemějachu. Nětko so cłownistwo z padom zaběra.
Wjesny puć njeje awtodróha
Čornochołmčenjo wobaraja so přećiwo přiběracemu wobchadej
Čorny Chołmc (AK/SN). Hłowna dróha w Čornym Chołmcu je wažny zwisk mjez zwjazkowymaj dróhomaj B 97 wot Njedźichowa do Wojerec a B 96 wot Wojerec do Złeho Komorowa. „Turizm je za naš region wulka šansa. Z tym zwisowacy wobchad pak nas dźeń a bóle poćežuje. Hižo wjacore lěta zwěsćamy, zo wobchad na wjesnym puću do směra na łužisku jězorinu kaž tež wottam přiběra“, podšmórny Čornochołmčanska wjesna předstejićerka Claudia Jurisch na zašłym posedźenju Wojerowskeje měšćanskeje rady. „Cyle zlě je pjatk wot 14 hodź., hdyž wšitcy do jězoriny jědu, a njedźelu wot 14 hodź. zaso wróćo.“
Lěsawa na krjepjawje sedźała
Před wjace hač dźesać lětami namakach blisko Noweho Bronja mortwu lěsawu (Waldohreule), kotraž bě so z woporom wobchada stała. Dokelž bě wona wonkownje hišće w porjadku, dach ju preparować, zo móhli sej ju zajimcy woměrje wobhladać. Namakanki dla pak počach kónčinu mjez Bronjom a Kamjenej dokładnišo wobkedźbować, přetož něhdźe wšak dyrbješe lěsawa doma być, sej myslach. Loni wuhlada Jurij Měrćink tajku sowu na swojej zahrodźe. Hač wona tam něhdźe hnězdźeše, njebě jasne, bě pak wot 7. do 25. apryla wšědnje přitomna.
Zelena swěca za jězdźidłowu halu
Dźěwin (AK/SN). Dobrowólna wohnjowa wobora w Brězowce w Dźěwinskej gmejnje ma nowu jězdźidłowu halu dóstać. Wjetšina gmejnskich radźićelow je so na swojim zašłym posedźenju zasadnje za to wuprajiła. Gmejnske zarjadnistwo ma nětko nadawk, trěbne plany a wobličenje kóštow za nowotwar hale z předrasćernju a sanitarnymi rumnosćemi zdźěłać.
Wotnětka namjety zapodać
Město Wojerecy změje klětu znowa wobydlerski etat. Po dobrych nazhonjenjach w lětomaj 2019 a 2020 chcedźa tule formu sobupostajowanja wobydlerjow města a wjesnych dźělow dale wjesć.
Wojerecy (SN/MWj). Za wobydlerski etat 2021 města Wojerec móža wobydlerjo města a přisłušnych wsow wot dźensnišeho hač do 13. nowembra swoje namjety zapodać. Je to mjeztym třeći tajki wosebity hospodarski plan, kotryž je měšćanska rada na swojim posedźenju kónc septembra schwaliła. Je pak to prěni, kotryž jeničce z měšćanskeje kasy financuja a nic z přidatnych pjenjez. Loni a lětsa dźě dóstachu za to pawšalnu přiražku Swobodneho stata Sakskeje za sylnjenje wjesneje kónčiny.
