Po horach a dołach pućować(12)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ tworićelskosć na dobro našeje maćeršćiny znowa pozbudźiło. Serbske Nowiny tule w serialu rjad drobnych a małych projektow předstajeja.
Nahłe skalizny, wuske wudrjeńcy a rjane wuhlady na krajinu – Sakska Šwica ma tójšto dožiwjenjowpołnych potajnstwow, kotrež móžeš sej wotkryć. Tež Syman Pöpel z Chrósćic je tam zas a zaso po puću. Krosnowar sej kónčinu jara waži a je tam mjez druhim tež ze serbskimi jenakozmyslenymi tón abo tamny dyrdomdej přežiwił. Nětko chce wón z dalekubłanskej jězbu pod hesłom „Witaj, přiroda“ we wobłuku biologije, zemjepisa a sporta Saksku Šwicu zajimcam spřistupnić. Ze spěchowanskimi srědkami fondsa „Čiń sobu“ přihotuje wón jězbu, za kotruž móža so młodostni wot 16 lět přizjewić. „Dwaj přewodźerjej z narodneho parka Sakska Šwica, kotrajž so tam jara derje wuznawataj, budźetaj nam poboku“, Chróšćan rozkładuje.
Krótkopowěsće (30.09.20)
Polěpšenje na dźěłowych wikach
Budyšin. We wuchodnej Sakskej bě w septembrje 18 299 bjezdźěłnych, 496 mjenje (-2,6 procentow) hač w awgusće. Kaž Budyska agentura za dźěło dźensa zdźěli, přizjewichu předewzaća regiona tónle měsac zaso jasnje wjace dźěłowych městnow. Nimo toho su młodźi ludźo wukubłanje započeli a zawody dalšich dźěłopřijimarjow přistajili. Bjezdźěłnostna kwota wučinješe 6,6 proc.
Dźesać nowych infekcijow
Budyšin. Znowa wo dźesać je wčera ličba zwěsćenych koronainfekcijow w Budyskim wokrjesu rozrostła, cyłkownje su jich 603. Wčera bě 35 wosobow schorjenych, z kotrychž dwě dale w chorowni lěkuja. Předwčerawšim su 44 testow přewjedli. Zhorjelski wokrjes rozprawješe wčera wo štyrjoch nowonatyknjenych, cyłkownje 392. Třo su w Hamorje, jedyn w Zhorjelcu.
Z přistajenymi so dojednali
Karnewal lětsa njebudźe
Serbske Pazlicy. Kaž w Kulowje je so nětko tež Serbskopazličanske karnewalowe towarstwo rozsudźiło, koronapandemije dla lětuše póstniske zarjadowanja w Njebjelčanskej „Bjesadźe“ wotprajić. To woznamjenja, zo tam žane zahajenje karnewaloweje sezony njeswjeća a tež žanoho noweho princa njewuzwola. Hač so klětu k wjerškej póstniskeje sezony kapičkowe wječory a dalše ze zańdźenych lět zwučene zarjadowanja wotměja, tuchwilu hišće jasne njeje. Kaž ze Serbskopazličanskeho karnewaloweho towarstwa rěka, dyrbja najprjedy raz dalše wuwiće korony a z nim zwisowace postajenja hygieny wočaknyć.
Nowi spěwarjo rady witani
Konjecy. Serbski muski chór Delany přeproša dalšich muži, kotřiž rady a rjenje spěwaja, na projektny spěwny wječor. Po dorěčenju z prěnimi nowymi spěwarjemi zetkaja so stajnje štwórtk w 19 hodź. w Konječanskej Burskej stwě, informuje zamołwity za projektny chór Alojs Langa. „Na nowych spěwarjow čaka a wjeseli so předsydstwo chóra Delany“, rěka w jeho zdźělence.
Kulturna zyma wupadnje
Lessingowe město změje najmoderniši gymnazij
Kamjenc (BG/SN). Za nowy přitwar Kamjenskeho Lessingoweho gymnazija su minjeny pjatk nachwatali zakładny kamjeń połožić. Dołho běchu w měsće a wokrjesu wo to wojowali, zo so kubłanišćo na swoje starodawne městno załoženja nawróći. „Nětko so to zwoprawdźa a šula budźe modernišo wuhotowana dyžli do toho“, rjekny 1. přirjadnik krajneho rady Udo Wićaz (CDU). Hromadźe z wyšim měšćanostu Rolandom Dantzom (njestronjan) połoži wón kasetu z aktualnymi dokumentami, nowinami a pjenjezami do fundamenta. Trójce z hamorom na zakładny kamjeń klepnył je stolětny wobydler Kamjenca Werner Geißler, kotrehož dźěćatstwo a powołanske žiwjenje běštej wusko z Lessingowym gymnazijom zwjazanej. Tam bě wón šuler a pozdźišo hač do wuměnkarskeje staroby wučer.
Policija (29.09.20)
Kreatiwitu budźić chcyli
Prěnja dźěłarnička „sam rězbarić“ najebać wjedro do wody njepadnyła
Njebjelčicy (JK/SN). Přewšo aktiwne Njebjelčanske wuměłstwowe a kubłanske towarstwo Kamjenjak měješe cyle wosebitu ideju, kak lětnju sezonu zakónčić. Wone bě za minjeny pjatk a sobotu předewšěm dźěći přeprosyło so raz na wuměłskim polu rězbarjenja wuspytać. Najebać jara hubjene nazymske wjedro bě pjatk popołdnju pjatnaće dźěći do skały přichwatało, zo bychu prěnje kroki do wuměłskeho swěta činili. Towarstwo Kamjenjak ze swojim městopředsydu Hubertom Langu bě wšitko trěbne spřihotowało, zo bychu dźěći wot wšeho spočatka namakali swójski puć k rězbarjenju.
Regionalne dumperowe wubědźowanje předwčerawšim, njedźelu, w ...
Zaso wjace padow
Budyšin (SN/BŠe). Ličba koronainfekcijow w Budyskim wokrjesu dale přiběra. Wčera připołdnju wozjewi tudyši strowotniski zarjad hnydom dźesać nowych padow. Mjeztym zo běchu to w awgusće předewšěm nawrótnicy z dowola, njejsu přičiny tuchwilu cyle jasne. Přiwšěm je sej strowotniski zarjad wěsty, zo zdźěla někajki zwiski wobsteji.
Frédérica Joliota-Curiejowa zakładna šula w Budyskej Strowotnej studni je hač do 8. oktobra zawrjena. Wučerka bě so zwonka kubłanišća natyknyła. Njedźelu su kontaktne wosoby testowali a pola třoch šulerjow wirus dopokazali. Dalše kontakty nětko přepruwuja.
Šěsć padow korony we Wojerowskim jězorinowym klinikumje dla njesmědźa pacienća dweju stacijow žanych wopytowarjow přijimać. Klinikum je w nadawku wokrjesneho strowotniskeho zarjada wobšěrne testy zahajił. Tež Kamjenska chorownja je so mjeztym na přiběrace pady nastajiła. Wot dźensnišeho płaći tam zakaz wopytow.
Krótkopowěsće (29.09.20)
Němski hrajny film dobył
Großhennersdorf. Hłowne myto 17. nysoweho filmoweho festiwala je němski hrajny film „Jiyan“ (žiwjenje) režiserki Süheyle Schwenk dobył. Z 10 000 eurami dotěrowane wuznamjenjenje je sakske ministerstwo za kulturu a turizm spěchowało. Drama wo dwěmaj ćěkancomaj w Berlinje přeswědča z „originelnymi, sugestiwnymi, zmužitymi a cineastiskimi srědkami bjez kompromisa. Film će hišće dołho po kóncu zaběra“, rěkaše ze stron jury.
Studentow witaja w dźiwadle
Budyšin. W Němsko-Serbskim ludowym dźiwadle chcedźa lětsa swjatočnje 150 nowych studentow Budyskeje studijneje akademije witać. Za to maja so naprawy škita a hygieny dodźeržeć, akademija wčera zdźěli. Za hospodarski a techniski wobłuk je ličba studowacych někak jenaka. Moderne labory stejnišća skića jim najlěpše wuknjenske wuměnjenja.
Zjawny transport podróša
Policija (28.09.20)
Wulke zbožo měli
Porchow. Zbožo w njezbožu měješe młoda swójba wčera rano na awtodróze A 4 pola Porchowa. Wona bě ze swojim Opelom do směra na Budyšin po puću, jako 28lětny wodźer z dotal njeznateje přičiny kontrolu nad wodźidłom zhubi. Opel zajědźe najprjedy nalěwo a zrazy do srjedźneho wobhrodźenja, na to suny so na tamny bok jězdnje a wosta na prawej kromje stejo. Wodźer a jeho 33lětna sobujěduca so jeno snadnje zraništaj. Jeju na městnje lěkarsce zastarachu. Tři dźěći w starobje poł, jednoho lěta a pjeć lět so njezranichu. Opel pak so po informacijach policije dospołnje skóncowa. Nimo toho wobškodźi so wobhrodźenje awtodróhi na něhdźe 50 metrach. Dohromady nasta 20 000 eurow škody.
