Rowno (JoS/SN). Po wjele tydźenjach nanuzowaneje přestawki knježeštej minjenu sobotu na Rownjanskim Njepilic statoku zaso čiłe žiwjenje a zhromadnosć, jako wotměchu tam lěćny swjedźeń. Při rjanym wjedrje knježeše dobra nalada. Wopytowarjo móžachu sej čerstwy tykanc a burske pomazki słodźeć dać a k tomu na dujersku hudźbu słuchać.

Předsyda spěchowanskeho towarstwa Njepilic statoka Manfred Nikel při witanju rjekny: „Naš lěćny swjedźeń je prěnje zjawne zarjadowanje po wjele měsacach čakanja na lěpše časy. Tež naši muzikanća móža zaso kaž w starych časach hudźić.“ Grodkowscy dujerscy muzikanća wokoło Rolanda Bartka su dołhi čas pandemije wužili a swój repertoire tež ze serbskimi štučkami rozšěrili. Za přihoty lěćneho swjedźenja bě wjele pilnych rukow trěbnych. Tak njejsu w swojej pjecy jenož tykanc pjekli, ale tež čerstwy Njepilic chlěb. Při tym so hižo nichtó prawje dopominać njemóžeše, hdy běchu to posledni raz činili.