Oldtimery składnostnje jubileja towarstwa přijěli

srjeda, 04. awgusta 2021
artikl hódnoćić
(0 )
Mjez wobdźělnikami zetkanja w Dubrawje běchu Siegfried Freudenberg (srjedźa) z Wóslinka z Lkw-jom typa Krass a jeho přećeljo.  Foto: Jost Schmidtchen Mjez wobdźělnikami zetkanja w Dubrawje běchu Siegfried Freudenberg (srjedźa) z Wóslinka z Lkw-jom typa Krass a jeho přećeljo. Foto: Jost Schmidtchen

Dubrawa (JoS/SN). Składnostnje 60lětneho wobstaća Grodkowskeho motorsportoweho kluba wotměchu njedawno na terenje bywšeje Dubrawskeje (Trattendorf) milinarnje 32. zetkanje oldtimerow a wiki narunankow. Wjace hač 300 starych jězdźidłow bě přijěło.

Załožili běchu towarstwo pod třěchu motorsportoweho zwjazka ADMV spočatk měrca 1961. K prěnim aktiwitam słušachu historiske kołojězby, wubědźowanja kartowych jězdźidłow, motocrossowe wurisanja a po­dobne zarjadowanja. Hižo pjeć lět po załoženju spožčichu Grodkowskim přećelam awtomobilow złotu jehličku za „zasłužby při wuwiću socialistiskeho sportoweho hibanja“. Po politiskim přewróće Grodkowska skupina z ADMV wustupi a załoži swójske towarstwo. Dźensa je jeho wobšěrne dźěło daloko za łužiskimi mjezami znate, kaž tež njedawne zetkanje wotbłyšćuje.

wozjewjene w: Lokalka
Prošu přizjewće so, chceće-li komentar podać

nawěšk