Dobyćerjo wubědźowanja na Kulowskim torhošću mytowani

Kulow (SiR/SN). Přichodnje móhła so Krabatowa stela na Kulowskim torhošću na nowy wopytowarski magnet wuwić. To zmóžnja wubědźowanje towarstwa Hornjołužiska hola a haty (OHTL). Z nim chcychu ideje zběrać, kak turistisku infrastrukturu w Leaderowej kónčinje dale wuwić a zesylnić. „Wulki wothłós je nas překwapił. Dohromady dóstachmy 22 přinoškow z cyłeho regiona, zwjetša ze stawizniskim pozadkom. Paleta idejow sahaše wot kolesowanskeho dožiwjenskeho swěta hač k wutworjenju kolesowanskich a pućowanskich šćežkow“, rozłoži předsyda OHTL Marko Kowar.

Prěnje městno wubědźi sej projekt „Bachtać ze Šadowicom“ Kulowskeho domizniskeho slědźerja Hansa-Jürgena Schrötera. Jemu kaž tež dalšim dobyćerjam su přizwolenske wopisma minjeny pjatk na Kulowskim torhošću přepodali.