Historisku turbinu zachować

pjatk, 14. awgusta 2020
artikl hódnoćić
(0 )
Wo prašenju, kak historisku turbinu w Běłym Chołmcu zachować, diskutowachu na městnje Sebastian Fritze, Eberhard Pötschke, Volkmar Wierick a Thomas Rösler (wotprawa).  Foto: Andreas Kirschke Wo prašenju, kak historisku turbinu w Běłym Chołmcu zachować, diskutowachu na městnje Sebastian Fritze, Eberhard Pötschke, Volkmar Wierick a Thomas Rösler (wotprawa). Foto: Andreas Kirschke

Zajimowe zjednoćenstwo a wjesna rada zasadźatej so za staru stechniku

Běły Chołmc (AK/SN). Wysoka trawa rosće wokoło turbinoweho domu a spušćadło při Małej Sprjewi. Na někotrych městnach so lijawa pušća. Na muri wučitaš lětoličbu 1917–18. Tehdy bě přede­wzaćel a mějićel knježeho kubła Hugo Stinnes (1870–1924) turbinowy dom při Małej Sprjewi w Běłym Chołmcu natwarić dał. „Wottam su cyłe kubło, pozdźišo tež někotre domy z milinu zastarowali.

Hač do spočatka 1970tych lět je turbina dźěłała“, powěda Thomas Rösler, kiž je wot 2014 čłon wjesneje rady. „Wona je nimale posledni zachowany industrijny pomnik we wsy.“ Njebudźe-li spěšnje jednane, drje krajne zarjadnistwo rěčnych zawěrow (LTV) jako wobsedźer ležownosće twarjenje spotorha.

Turbina je techniski swědk, kiž měli zachować, měni wobydler Rolf Möbius. Z dalšimi Běłochołmčanami je wón zajimowe zjednoćenstwo załožił. Wone chce historisku turbinu wuchować. Tuchwilu zdźěłuja koncept za wužiwanje turbinoweho domu, snano za kulturne a domi­znowědne zaměry. Mjez druhim mysla na rjemjeslnisku bróžnju a na mału kofejownju. Wjesnjenjo z originelnym hobbyjom móhli tu swoje wudźěłki wustajeć. „Z turbinu móhli šulerjam zbližić, kak běchu něhdy milinu produkowali“, praji Rolf Möbius, kiž je so sam wjele lět powołansce z turbinami zaběrał. Kaž wón so tež Werner Thomas za wuchowanje turbiny zasadźa. „Wona je dźěl našeje identity, dokelž swědči wo stawiznach a tradiciji. To njesmě nam wšojedne być“, rjekny Thomas na zašłym posedźenju wjesneje rady.

Zawodowy nawoda LTV za Sprjewju a Nysu Sebastian Fritze nochce naležnosć předaloko wotsuwać. „Hač do nazymy měli rozrisanje namakać, hewak horni dźěl turbinoweho domu zwottorhamy“, wón připowědźi. Mjez druhim staraja so wo 160 spušćadłow. Te w Běłym Chołmcu drje je w špatnym stawje, hodźi pak so zachować. To by tež Łazowskeho wjesnjanostu Thomasa Leberechta (CDU) zwjeseliło. Pjenježnu pomoc pak wón žanu skićić njemóže.

Po móžnosći w septembru chce za­jimowe zjednoćenstwo gmejnskej radźe wužiwanski koncept předpołožić.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND