Runje hakle su we Worklecach nowy hort dotwarili a chcedźa jón 20. awgusta přepodać, to započnu přichodny twarski projekt. Nětko dźěłaja rjemjeslnicy w šuli.
Worklecy (SN/MWj). Poprawom wšak je w šulskich twarjenjach za čas prózdnin ćicho, chibazo tam we wjetšim stilu rjedźa. We Worklečanskej wyšej šuli wšak wo ćišinje wjele pytnyć njeje. Tam zahajichu spočatk tydźenja wosebite dźěła. Přičina je, zo budźe wot noweho šulskeho lěta holca z přewšo rědkej genetiskej chorosću we Worklecach do šule chodźić. Wona dyrbi so před słónčnymi pruhami škitać. Zo móhła tam přiwšěm wuknyć, wuwichu za nju wosebity škitny koncept. Jako prěnje zalěpja w štyrjoch rjadowniskich rumnosćach na hornim poschodźe kaž tež na dźělu chódby wšitke wokna ze specialnej foliju. Ta drje swětło přepušća, nic pak ultrawioletne pruhi. Za to dyrbja kóžde wokno jara dokładnje wurjedźić, foliju akuratnje přitřihać a ju skónčnje nalěpić. Mjeztym zo trjebaja za to wotwonka „jenož“ dźěłowy lift, su naprawy w šulskim twarjenju wobšěrniše.