K nałožowanju serbšćiny pozbudźeć

wutora, 04. awgusta 2020
artikl hódnoćić
(0 )
 Jadwiga Bryckec  Foto:  z wobsydstwa Jadwigi Bryckec  Jadwiga Bryckec Foto: z wobsydstwa Jadwigi Bryckec

Čestne zastojnstwo ma wona za njeparujomne. „Te je za dźěławosć towarstwow po wšej Němskej přewšo wažne. Runje w tak měrnej kónčinje kaž tu je wažne wólnočasne poskitki z pomocu čestnohamtskich ludźi tworić“, měni Jadwiga Bryckec ze Zhorjelca. Na namjet FDP a předsydy frakcije strony w Zhorjelskim wokrjesnym sejmiku Franka Wittiga su ju za wěcywustojnu wobydlerku do přirady za serbske naležnosće wokrjesa Zhorjelc powołali. Dwurěčnje hornjoserbsko-němsce bě wona w Kubšicach wotrostła. Do šule chodźeše w Budyšinje, hdźež tež maturu złoži. „Hač do dźens­nišeho ze swojimi serbskimi přećelemi tež serbsce rěču. Hdys a hdys wopytuju serbske dźiwadło“, wona wuswětla.

Wuchodźiwši šulu studowaše dźensa 33lětna medicinsku techniku na Jenaskej Wysokej šuli Ernsta Abbeja, a po zakónčenju jako masterka dźěłaše za Hagenwerdersku firmu SKAN. Tam skutkuje nětko jako projektna nawodnica. SKAN Němska ze sydłom w Hagenwerderje je pře­dewzaće šwicarskeje SKAN AG, kotraž mjez druhim we wobłuku izolatorskeje technologije wiki nawjeduje a je zdobom wažny partner farmaindustriji. „Powołanje wobradźa mi wjele wjesela“, młoda Zhorjelčanka podšmórnje.

W serbskej přiradźe chce sej najprjedy z dalšimi čłonami a čłonkami intensiwnje mysle wuměnjeć. Konkretne ideje wona hišće žane nima. „Chcu serbske žiwjenje a serbsku rěč zaso sylnišo do Zhorjelskeho wokrjesa přinjesć.“ „Wšako serbskosć tule tak jara njepraktikuja kaž wokoło Budyšina abo Kamjenca. Při­wšěm sym přeswědčena, zo su ludźo, kotřiž­ rěč znajmjeńša hišće zdźěla wob­knježa. Z nimi chcu zwisk nawjazać. Chcu tež swoje znajomosće serbšćiny aktiwizować a polěpšić – na přikład z pomocu prawi­dłownych zetkanjow za stajnym blidom.“ Andreas Kirschke

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND