Jitk (JK/SN). Na njedawnym dworowym swjedźenju Helmec swójby w Jitku mě­ješe Krabatowy lód swoju oficialnu premjeru. Nimale na kóncu lětušeje sezony bě to rjana překwapjenka. Planowane bě to po słowach Kornelije Helm, kotraž bě ideju za lód hromadźe z mandźelskim Swenom zrodźiła, hižo za prěni dworowy swjedźeń, kotryž tradicionelnje 1. meje wotměwaja. Koronapandemije dla pak bě tón wupadnył a tež po tym bě lědma składnosće, lód we wotpowědnej formje předstajić. Kornelia Helm njezataji, zo su lód tež bjez oficialneho předstajenja hižo cyły čas hosćom a přećelam dwora poskićeli. Za to su dobry wothłós žnjeli.