Regionalne planowanje a mjeńšinowu politiku hromadźe zwjesć

Choćebuz. „Kročimy tu po nowych pućach“, wuzběhny nawoda wotrjada Regionalne wuwiće a škit mjeńšin (Regmje) Serbskeho instituta (SI) Lutz Laschewski na zahajenju konferency „Urbane a regionalne planowanje, governance mjeńšinow a serbska kultura“ wčera w Choćebuzu. Zhromadnje z fakultu architektura, twarske inženjerstwo a urbane planowanje Braniborskeje Techniskeje uniwersity Choćebuz-Zły Komorow bě wotrjad Regmje­ na centralny campus kubłanišća přeprosył. Mjez 40 wobdźělnikami běchu předewšěm wědomostnicy kaž tež akterojo serbskich organizacijow a na druhim boku zastupjerjo z planowanskeho wobłuka a regionalneje politiki.