Biskopicy (CS/SN). Swoje 800lětne wobstaće chce město Biskopicy cyłe přichodne lěto swjećić. Prěnje pisomne naspomnjenje pochadźa wot 26. měrca 1227. Stawizny sydlišća pak sahaja wróćo hač do lěta­ 600, jako tam předchadnicy Serbow sydlachu. Mjeztym hižo połdra lěta swjedźenjowanje přihotuja. W dźesać dźěłowych skupinach su ćežišća zdźěłali. Wosebje wjeseli so wyši měšćanosta Holm Große nad pjenježnej podpěru sponsorow. 117 000 eurow su dotal nazběrali.

Prěni wjeršk budźe hižo na proze do noweho lěta, hdyž chcedźa na staroměšćanskim torhošću prěnju zjawnu silwestersku party swjećić. Wot 18 hodź. přeměni so torhošćo posledni dźeń lěta na jewišćo pod hołym njebjom. Mjez druhim wustupi tam kapała Jolly Jumper. Za to wot tohole tydźenja zastupne lisćiki poskićuja.