Spěchowanje za koncept

srjeda, 20. meje 2020
artikl hódnoćić
(0 )

Kulow (AK/SN). Sobudźěłaćerjo města Kulowa maja w přichodnych lětach směrodajny a dołhodobny wuwićowy koncept komuny zdźěłać. To podšmórny měšćanosta Markus Posch (CDU) na minjenym wuradźowanju měšćanskeje rady. „Rozsudźacy gremij Leaderoweho regiona Hornjołužiska hola a haty (OHTL) je nam start signalizował. Smy přihłosowanje z Budyskeho krajnoradneho zarjada kaž tež přizwolenje wokrjesa dóstali. Za Kulow ma nětko tak mjenowany integrowany měšćanskotwarski wuwićowy koncept (INSEK) nastać.“ Za njón dóstanje město spěchowanje. Wopřijeć ma koncept mjez druhim wuprajenja wo turizmje, drobnowikowanju w měsće, wo kulturje a sporće. „Derje by było, nastajimy-li sej směrodajny program. Wobydlerjow dyrbjeli do procesa zapřijeć. Jich mysle a předstawy su prašane“, wuswětli měšćanosta.

Kulow přisłuša Leaderowemu spěchowanskemu regionej Hornjołužiska hola a haty. Region wopřijima kónčinu wokoło městow Budyšina na juhu, Wósporka na wuchodźe a Kulowa na sewjeru kaž tež 13 gmejnow, mjez nimi wšitke pjeć zarjadniskeho zwjazka Při Klóšterskej wodźe, Porchow, Wulku Dubrawu, Rakecy, Njeswačidło, Malešecy, Wóslink, Bóšicy a Radwor.

Pomjenowanje „Krajina tysac hatow“ dósta region swojeje bohaće wuhotowaneje přirody dla. Nimo karpoweho hatarstwa, kotrež tam w přirodźe bliskich hatach wukonjeja, su serbska kultura, historiske Budyske stare město kaž tež biosferowy rezerwat bytostne znamjenja OHTL-regiona.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND