Direktnu wuměnu wobydlerjow chce město Budyšin pjenježnje podpěrać

Budyšin (CK/SN). Zo by zhromadne dźěło z partnerskimi městami spěchowało, přewostaji město Budyšin wot klětušeho za to lětnje 15 000 eurow. To su měšćanscy radźićeljo na swojim zańdźenym posedźenju jednohłósnje schwalili. „Měšćanske partnerstwa su wažny přinošk, zo móhł so Budyšin ze swojim mnohostronskim charakterom prezentować“, rěka we wobkrućenju. Nimo toho zmóžnja mjezynarodna wuměna nowe perspektiwy za turizm, hospodarstwo, kulturu a kubłanje.

Budyšin ma pjeć partnerskich městow: Su to Worms (wot lěta 1990), Heidelberg (1991), Dreux w Francoskej (1992), Jelenia Góra w Pólskej a Jablonec nad Nisou w Čěskej (wobě wot 1993). We wobłuku lětušeho Budyskeho nalěća pomjenowachu ležownosć pod Starej wodarnju na Naměsto partnerskich městow. Wo nich informuja tam na muri z tekstom a wobrazami.

Budyšin. Kotry wuznam měješe Budyski měr z lěta 1018 za Europu? To praša so dr. Matthias Hardt w swojim přednošku zajutřišim, pjatk, w 19 hodź. w Muzeju Budyšin. Při tym wobswětli wón tež čas do a po měrowym zrěčenju a chce při­posłucharjam sposrědkować, kak su zapřijeće měr w srjedźowěku wukładowali. Z přednoškom w Budyšinje dźeń wote­wrjeneho pomnika za­haja. Michael Sapp a Anna Katharina Schumann zarjadowanje hudźbnje wobrubitaj. Zastup je darmotny.

Dźěłarnička w muzeju

Budyšin. „Bohowki do kapsy“ rěka hesło dźěłarnički sobotu, 8. septembra, wot 10 do 17 hodź. w Budyskim Serbskim mu­zeju. Tam móža wobdźělnicy wot 14 lět z tróšku wušiknosću mału škitnu postawu do kapsy zhotowić. Dźěłarnička wotměje so we wobłuku tuchwilneje wu­stajeńcy Reginy Herrmann. Je to dobra móžnosć, wuměłču zeznać a sej mały dar zhotowić. Regina Herrmann poskića někotre figury tež na předań. Přizjewjenja su hišće móžne. Přidatne wudawki nimo zastupa wučinjeja pjeć eurow.

Dyrbitaj pokutu płaćić

Horni Wujězd. W padźe zatykaneje awtodróhi njesměš prosće nabóčne pasmo wužiwać, zo by spěšnišo doprědka přišoł. Tole wěstaj nětko šoferaj, kotrejuž je policija zawčerawšim pola Hornjeho Wujězda na A 4 při tym lepiła. Wonaj dyrbitaj nětko wobaj pokutu 90 eurow płaćić a dóstanjetaj dypk w Flensburgu.

W Budyskej Sprjewinej kupjeli zličichu w lětušej kupanskej sezonje hač do kónca awgusta 34 000 wopytowarjow. Telko hosći mějachu tam posledni króć před dwanaće lětami.

Kulow/Porchow (SN/mwe). Hinak hač w Budyšinje, hdźež maja kupjel tež hišće w septembrje wočinjenu, su kupansku sezonu w Kulowskej lěsnej kupjeli 31. awgusta zakónčili. „Wězo bě to tež za Kulow lěćo, kotrež móžeš z tamnymi lětami lědma přirunować. Njemějachmy cyły čas žadyn dźeń zawrjene“, wěcywobdźěłarka za kulturu, sport a młodźinu na Kulowskim měšćanskim zarjadnistwje Beate Hufnagel Serbskim Nowinam zdźěli.