W karantenje dźenik pisać
Stabowe městno a informaciski telefon corona-wirusa dla zarjadowali
Budyšin (CS/SN). Swojich wobydlerjow před corona-wirusom škitać je tuchwilu najwažniši nadawk Budyskeho wokrjesa. To ma najwyšu prioritu, rjekny wčera hamtska lěkarka dr. Jana Gärtner na krótkodobnje zwołanej nowinarskej rozmołwje. Tak je wokrjes z wosom wosobami wobsadźene stabowe městno wutworił. Wone ma wšitke naprawy koordinować a połoženje wšědnje znowa posudźować.
Mjez druhim su w bywšej „čerwjenej poliklinice“ na Tuchorskej wotnožku strowotniskeho zarjada zaměstnili. Tam kontaktne wosoby inficěrowanych ludźi testuja. Potrjecheni dyrbja sej tam sami dojěć abo dóńć, dokelž bychu jězby sobudźěłaćerjow krajnoradneho zarjada k ludźom domoj přewobćežne byli, wčera rěkaše. Wot dźensnišeho je nimo toho wosebita informaciska hotline zarjadowana, kotruž docpěja wobydlerjo pod čisłom 03591/ 5251 12121.
Krótkopowěsće (10.03.20)
Krawcowy roman znowa wušoł
Budyšin. Roman Křesćana Krawca „Das Ende vom Paradies“ je w Budyskej Smolerjec kniharni zaso předań. Wuspěšna twórba je w dalšim nakładźe jako kapsna kniha w LND wušła. W publikaciji wopisuje Krawc na wjac hač 600 stronach žiwjenje serbskeje swójby přez tři generacije wot spočatka 20. lětstotka hač do 1980tych lět. Kniha je wulkotny mozaik žiwjenja wjesnych ludźi.
Integraciske wiki wotprajene
Lubij. Hladajo na stupace ličby na corona-wirus schorjenych w Budyskim wokrjesu su jutřiše integraciske wiki „Ankommen und Leben“ w Lubiju wotprajili. Wokrjes Zhorjelc je přehladku na 16. september přesunył. Kaž Zhorjelski krajny rada Bernd Lange (CDU) zdźěli, stejitej strowota a wěstota wobydlerjow na prěnim městnje.
Prócuja so znowa wo BUGA
Krótkopowěsće (09.03.20)
Dalši rjad mólbow wudała
Budyšin. Wuměłča Ulrika Mětškowa dalši rjad mólbow na zakładźe Franza Schuberta zhudźbnjenych basnjow Johanna Ludwiga Wilhelma Müllera stworiła. Brošurka „Die schöne Müllerin“ wopřijima 20 reprodukcijow twórbow Budyšanki. W samonakładźe wudatu brošurku dóstanu zajimcy pola Ulriki Mětškoweje, wobmjezowanu ličbu ma Budyska Smolerjec kniharnja na předań.
Kontrole na mjezach
Praha/Waršawa. Čěska chce na swojich mjezach pućowacych kontrolować, zo by rozšěrjenju chorosće płucow corona-wirusa dla zadźěwała. Wot dźensnišeho policija na dźesać namjeznych přechodach do Bayerskeje, Awstriskeje a Słowakskeje kontroluje. Pólska chce pućowacych z Němskeje na A 4 w Jędrzychowicach pola Zhorjelca kontrolować.
Płaćiznu maskow regulowali
Změje rěčne hodźiny
Kamjenc. Zapósłanc Sakskeho krajneho sejma Alojs Mikławšk (CDU) změje srjedu, 11. měrca, wot 13 do 17 hodź. dalše rěčne hodźiny w swojim Kamjenskim běrowje na Zapadnej 4. Zajimcy móža sej do toho termin dojednać, a to pod telefonowym čisłom 03578/ 305 383 abo e-mailnje pod . Wočinjeny je běrow wot póndźele do štwórtka, stajnje wot 8 do 16 hodź., a pjatk wot 8 do 14 hodź.
Filmowu dokumentaciju widźeć
Budyšin. Přichodne zarjadowanje sekcije hudźby Maćicy Serbskeje a Towarstwa za staru serbsku ludowu hudźbu wotměje so srjedu, 18. měrca, w 19 hodź. w sydarni čo. 106 Budyskeho Serbskeho domu. Tam pokazaja filmowu dokumentaciju serbskich ludowych rejow. Wšitcy zajimcy su wutrobnje witani.
Zhromadnje hrać
Budyšin. Štóž rady towaršnostne hry hraje a za to sobuhrajerjow pyta, nadeńdźe jich snano w Budyskej měšćanskej bibliotece. Tam steji zajutřišim, srjedu, wot 14 do 17 hodź. dalše hrajne popołdnjo na programje. Towaršnostne hry a dalše zabawjenske medije móža sej zajimcy w bibliotece tež wupožčić.
Zaso orchideje poskićeli
Slepo (SN). Jedne z najwoblubowanišich zarjadowanjow w běhu lěta w Slepjanskim Serbskim kulturnym centrumje je přehladka orchidejow. Wona je kónc tydźenja wjace hač tysac ludźi přiwabiła. Hłownje wuhotujetej ju zahrodnistwje z Ranja (Großräschen) a bliskeho Allmosena. Wosebitosć orchidejow je, zo ma lědma druha kwětka telko družin, mjenujcy 28 000.
Nanajwjetši dźěl wopytowarjow je sej sobotu a njedźelu jednu z poskićenych orchidejow kupił. Wažne je, zo maja wone swětłe městno, ale nic w połnym słóncu. Jónu wob tydźeń přiliwać dosaha. „Orchideje dyrbjeli lubowarjo kwětkow kóždej dwě lěće do druheho hornca přesadźić“, poruča plahowar Lutz Lehradt z Allmosena. Tohodla su po lońšej přestawce tónle serwis zaso poskićeli.
Twarja škitnu murju při šuli
Policija (09.03.20)
Kaž njemdry jězdźił
Horni Wujězd. Awtodróhu A 4 mjez Hornim Wujězdom a Słonej Boršću je drje 44lětny wodźer VWja Amarok sobotu z wubědźowanskej čaru zaměnił. Přesćahnywši ciwilne awto sakskeje hotowostneje policije na prawym boku wón krótko před nim zaso dolěwa zawiny. Jeno ze spěšnej reakciju móžeše šofer policajskeho awta hóršemu zadźěwać. Na wotpočnišću Hornja Łužica-juh bě jězba 44lětneho skónčnje nimo. Tam njejsu jenož jeho jězbnu dowolnosć sćazali, ale nańdźechu pola njeho tež elektrošoker a nóž.
Přeja sej přiručku a terminologiju
Chrósćicy (JK/SN). Stólcy w sydarni Chróšćanskeho gmejnskeho a kulturneho srjedźišća njejsu dosahali, jako so tam minjeny štwórtk šwalče a hotowarniče katolskeje narodneje drasty zeńdźechu. Na hižo tradicionalne zetkanje, kotrež organizuje předsydstwo Kamjenskeje župy pod nawodom Zale Cyžoweje a regionalneje rěčnicy Kathariny Jurkoweje, bě 25 zajimčow z nimale wšitkich serbskich wosadow přišło. Tež wšitke starobne skupiny běchu zastupjene, štož swědči wo tym, zo so tež młoda a młódša generacija serbskej drasće, jeje wužiwanju a woblěkanju wěnuje.
Do serbskeho archiwa
Budyšin. Na cyłoněmskim dnju archiwow wobdźělitej so jutře, sobotu, tež Serbski kulturny archiw a Serbska centralna biblioteka w Budyskim Serbskim instituće. Wot 14 hodź. su zajimcy na čitanje přeprošeni, hdźež zhonja wo priwatnych, oficialnych a kurioznych zdźělenkach z listow znatych abo zabytych serbskich wosobinow. W 14.30 hodź. započnje so crashkurs za čitanje serbskeje fraktury w historiskich dokumentach. Wot 15 hodź. wodźa wopytowarjow serbsce a němsce po archiwje a bibliotece, w 15.30 hodź. pokazaja film „Lěto 1950 w Serbach“.
Z wyšim měšćanostu porěčeć
Delnja Kina. Na wobydlerski forum přeprosy Budyski wyši měšćanosta Alexander Ahrens (SPD) wobydlerjow Delnjeje Kiny wutoru, 10. měrca, w 19 hodź. do tamnišeje gratownje wohnjoweje wobory. Dale wobdźěla so twarska měšćanostka a jeje kolega za financy, zastupjerjo policije a mobilneho młodźinskeho dźěła, kotřiž na prašenja wobydlerjow wotmołwjeja.
Lajkojo dźiwadźeleja
Policija (06.03.20)
Po njezbožu ćeknył
Narć. 60lětny wodźer BMWja je zawčerawšim wječor w Narću do sćežora nadróžneho wobswětlenja zrazył, při tym 6 000 eurow škody načinił a na to z městna njezboža ćeknył. Swědcy pak we wsy bydlaceho spóznachu a policiju informowachu. Zastojnicy muža na to doma wopytachu, hdźež jeho z podawkom konfrontowachu. Při tym woni zwěsćichu, zo steješe wón pod njesnadnym wliwom alkohola. Test wunjese pola 60lětneho na wšěch 1,9 promilow alkohola w kreji. Tak prošachu policisća jeho k wotedaću kreje. Nětko njezměje so wón jeno zawinowanja njezboža pod wliwom alkohola dla zamołwić, ale tež ćeknjenja z městna njezboža dla.
