Spěchowanske srědki chcedźa w Njeswačidle za bydlenja zasadźeć

Njeswačidło (JK/SN). Někotražkuli gmejna ma tučasnje problemy, wobchować konstantnu ličbu wobydlerjow abo ju snano powjetšić. Wšako je to sobu zakład za to, kelko klučowych připokazankow gmejna dóstanje abo kak wysoke spěchowanje w tym abo tamnym programje je. Na minjenym posedźenju Njeswačanskeje gmejnskeje rady dźěše mjez druhim wo to, předać poslednju gmejnje słušacu twarsku ležownosć, z čimž je gmejna wućežena. Tak nasta prašenje, kak móhli dalše ležownosće twarskim zajimcam poskićeć. Wěste rezerwy drje hišće maja, ale tučasnje njeje z hospodarskich přičin scyła na to myslić, ležownosće wuměrić a přihotować.