Radźićeljo so zetkaja
Pančicy-Kukow. Dalše twarske dźěła za šulski dom w Pančicach-Kukowje budu jedna z temow posedźenja tamnišich gmejnskich radźićelow jutře, štwórtk, w 19 hodź. na Wotrowskej starej šuli. Tam chcedźa tež wo nowych nadróžnych taflach rěčeć.
Tohorunja jutře, ale w 19.30 hodź. zetka so Chróšćanska gmejnska rada w gmejnskim a kulturnym centrumje. Tam póńdźe mjez druhim wo popłatki za wužiwanje gmejnskich objektow.
Pokiwy čestnohamtskim
Chrósćicy. Domowina a Rěčny centrum WITAJ přeprošatej čestnohamtskich jednotliwcow resp. cyłki a towarstwa na informaciski wječork 7. februara we 18 hodź. do sydarnje Chróšćanskeho gmejnskeho zarjada. Na zjawnym zarjadowanju porěči zamołwita za čestnohamtske dźěło w Budyskim krajnoradnym zarjedźe Dunja Reichelt wo temje „Spěchowanja za čestnohamtskich“.
Na prózdninske dny
Nowa wodarnja klětu hotowa
Běła Woda (AK/SN). Nowa wodarnja Hamor ma zastaranje z pitnej wodu we wulkim wokrjesnym měsće Běłej Wodźe kaž tež w Slepom a wokolinje dołhodobnje zaručić. To podšmórny jednaćel Běłowodźanskich měšćanskich zawodow Stefan Przymosinski w swojej rozprawje na zašłym posedźenju měšćanskeje rady. „Loni běchu nadawki po wšej Europje wupisane. Zaměr je, kónc apryla 2020 twarić započeć. W juniju 2021 ma probowy běh slědować“, wón rozłoži. Zakład nowotwara je 40lětne zrěčenje mjez wodowym zaměrowym zwjazkom srjedźna Nysa-Šepc, městom a měšćanskimi zawodami. Běłowodźanski wyši měšćanosta Torsten Pötzsch (Klartext) rěčeše wo procesu, kotryž hižo dźesać lět traje. Cil je spušćomne a zapłaćomne zastaranje z pitnej wodu. Nowa wodarnja ma na kromje Bjerwałdskeho jězora nastać.
Hdy kompleks poswjeća?
W prózdninach Slepjanska šula do noweho twarjenja přećehnje
Slepo (AK/SN). Němsko-serbski šulski kompleks w Slepom je hotowy, tak zo móža do njeho zaćahnyć. To rjekny twarski nawoda gmejny Steffen Seidlich na wčerawšim posedźenju tamnišeje gmejnskeje rady. „Tele dny přepodadźa wučerjam trěbne kluče. Jutře krajny młodźinski zarjad hort pruwuje. Potom je wšitko dočinjene.“
Jednohłósnje Slepjanscy radźićeljo wčera wobzamknychu, zo ma předewzaće z Lauchhammera za 216 000 eurow šulski kompleks rjedźić. Zrěčenje płaći lěto. W tym zwisku wjesnjanosta Reinhard Bork (njestronjan) zwurazni, zo planuje gmejna za wobhospodarjenje kompleksa lětnje 400 000 eurow. „Jeničce rjedźenje wučinja hižo wjace hač połojcu. Na to dyrbjeli myslić, hdyž wo to póńdźe zrěčenje podlěšić.“
Wjetšina radźićelow je wčera tohorunja přidatne pjenjezy za techniske wuhotowanje šule schwaliła. Jedna so wo 86 000 eurow za dźesać interaktiwnych taflow, wo kotrež běchu wučerjo prosyli. Pjenjezy financuja z tak mjenowaneho digitalneho pakta.
Policija (05.02.20)
Při dźěle znjezbožił
Horni Wujězd. Při wotkładowanju zornowcowych platow je wčera popołdnju w Hornim Wujězdźe dźěl platow na portugalskeho wodźerja Lkw-ja padnył. Hižo prjedy hač wobornicy na pomoc přijědźechu, běchu sobudźěłaćerjo ćežko zranjeneho muža wuswobodźili. Dowjezechu jeho do Drježdźanskeje chorownje.
Wjacorych dobyćerjow zwěsćili
Runje w zymskim času mnozy ludźo po dołhich wječorach knihi čitaja. Šulerjo zakładnych a wyšich šulow kaž tež gymnazijow pak hotuja so w tym času kóždolětnje na předčitanske wubědźowanje.
Wojerecy (SiR/SN). Elisabeth Sygusch, mějićelka Wojerowskeho Domu za knihi a hudźbu Sygusch, přeproša hižo wot lěta 1994 šulerjow na předčitanske wubědźowanje. Lětsa je wona předčitacych a připosłuchacych z nowinku překwapiła.
W Kulowje swjeća mjeztym 314. karnewalowu sezonu. Tuchwilu wabja ...
Horcy wólbny bój wo zastojnstwo wjesnjanosty
Radwor (SN/BŠe). Přijědźeš-li tele dny do Radworskeje gmejny, to hnydom widźiš, zo knježi tu horcy wólbny bój. Wo tym swědča plakaty na sćežorach a banery podłu dróhow. W swojich póštowych kašćikach nańdźechu wobydlerjo minjene tydźenje profesionelnje zhotowjeny wólbny material. Hnydom štyrjo kandidaća chcedźa so z přichodnym wjesnjanostu Radworja stać, dokelž poda so Wincenc Baberška (CDU) po 27 lětach zastojnstwa na zasłuženy wuměnk. Přichodnu njedźelu maja wobydlerjo wo nowym mjezwoču na čole gmejny rozsudźić, kotraž ma dohromady 24 wjesnych dźělow.
Krótkopowěsće (05.02.20)
Saksojo wjele dźěłaja
Kamjenc. Sakskojo wosebje wjele dźěłaja, zdźěli wčera krajny statistiski zarjad ze sydłom w Kamjencu. Tak je přistajeny w lěće 2018 přerěznje 1 431 hodźin dźěłał. To je 41 hodźin wjace hač cyłozwjazkowy přerězk. Najwjac dźěłali su w sakskim twarstwje, tam zličichu statistikarjo na jednotliwca 1 627 hodźin.
Wjace na gripu schorjenych
Budyšin. Ličba na gripu schorjenych w Budyskim wokrjesu je minjeny tydźeń wo 77 na 145 wosobow přiběrała. To je najwjetši přirost w aktualnej gripowej sezonje z cyłkownje 273 padami, kaž z informacije krajnoradneho zarjada wuchadźa. Samsny čas loni bě dohromady 188 na gripu schorjenych. W strowotniskim zarjedźe maja dosć šćěpiwa za tych, kotřiž chcedźa so hišće šćěpić dać.
Nadźijeja so noweho sněha
Zeleny tydźeń w Berlinje dožiwjenjowpołny był
W nadawku Sakskeho krajneho kuratorija wjesnych kónčin přebywach njedawno wjacore dny na Mjezynarodnym zelenym tydźenju w Berlinje, a to mjeztym třeći raz. A móžu wo rjanych dožiwjenjach tam rozprawjeć. Jako steješe sakski wječor na programje, přichwata tójšto prominency do Berlina, kotraž tež pola našeho stejnišća zasta a nas postrowi. Jako prěnjej přińdźeštaj sakski ministerski prezident Michael Kretschmer a za nim Budyski krajny rada Michael Harig (wobaj CDU). Wobaj mje w serbskej rěči postrowištaj, štož mje jara zwjeseli. Jako so potom za zhromadne foto zestupachmy, sćahny mje ministerski prezident k sebi, zo dyrbjach před nim stać. W krótkej rozmołwje mi wón mjez druhim rjekny, zo mamy sej swoju identitu wobchować.
Zasłužeja sej wjace respekta
Dźeń wotewrjenych duri w dźěłarni za zbrašenych přewjedli
Wojerecy (AK/SN). Na přichod su Wojerowske łužiske dźěłarnje za zbrašenych ludźi derje přihotowane. Tuchwilu maja tam dosć nadawkow, štož podšmórny jednaćel Eckhart Friese minjenu sobotu na dnju wotewrjenych duri. W dźěłarnjach skutkuje něhdźe 450 ludźi, w spěchowanskim a powołanskowukubłanskim wobłuku, w ćišćerni, porjedźerni kolesow, blidarni, płokarni, zahrodnistwje, w industrijowej montaži kaž tež w zawodach na Horach a w Narću. 110 sobudźěłaćerjow so wo zbrašenych stara. K dźěłarnjam słušeja na wjacorych městnach bydlenja ze wšelakimi bydlenskimi formami. „Wosebje wažne je nam samostatnosć zbrašenych spěchować“, wuzběhny sobudźěłaćerka Caroline Rudolph. Wšědny dźeń wšak by sej wona wjace wotewrjenosće, zajima a hódnoćenja towaršnosće za swědomite dźěło ze zbrašenymi přała.
