Mało chwile za nowotwar
Sakska a wokrjes přidatej pjenjezy za pěstowarnju – ale jenož hač do 2022
Rowno (CK/SN). Dny Rownjanskeje pěstowarnje „Milenka“ zdadźa so ličene być, znajmjeńša w nětčišim twarjenju. Město toho zo bychu wobstejacy dom saněrowali, chcedźa nowy natwarić. Tale tema wobydlerjow wsy w Slepjanskej gmejnje jara zaběra. To bě tež na zahajenskim zarjadowanju za wjesny wuwićowy koncept jasnje pytnyć.
Runja Rownjanskej wjesnej radźe je so nětko tež techniski wuběrk Slepjanskeje gmejny za to wuprajił, zo měła gmejnska rada 7. julija zasadnje rozsudźić, nowe dźěćace přebywanišćo wosrjedź wsy natwarić dać. Nazymu 2019 je sakski kabinet rozsudźił, za to dwaj milionaj eurow přewostajić. Pjenježne srědki su dźěl dwójneho etata 2021/2022 Swobodneho stata Sakskeje a dyrbja hač do 31. decembra 2022 wužiwane być. „To je sportowski zaměr, tohodla dyrbjeli so nětko z nim zaběrać“, praji wjesnjanosta Reinhard Bork (njestronjan). Pjenjezy přewostajić chce tež Zhorjelski wokrjes we wobłuku spěchowanja pěstowarnjow.
Krótkopowěsće (08.06.20)
Dalši korona-pad zwěsćili
Budyšin/Zhorjelc. Z jednej nowoinfekciju wučinja ličba dotal z koronawirusom natyknjenych w Budyskim wokrjesu 497. Nětko je 29 wosobow schorjenych, šěsć z nich lěkuja w chorowni. Dwaj pacientaj staj ćežko schorjenaj. W Zhorjelskim wokrjesu njejsu hižo wot 28. meje žane dalše infekcije zwěsćili. Mjez dohromady 269 natyknjenymi je tu hišće jedna wosoba schorjena.
Wo wuhnaću po wójnje
Kinspork. Pod hesłom „,Do hoan uns die Polen nausgetriebm‘ – Vertreibung, Ankunft und Neuanfang im Kreis Zittau 1945–1950“ wěnujetaj so historikarjej dr. Lars-Arne Dannenberg a dr. Matthias Donath dołho zamjelčanemu kapitlej němsko-pólskich stawiznow. Kniha je w Kinsporskim nakładnistwje Via Regia wušła a ma 268 stron.
Hač potuńšenje pomha?
Praha. Płaćizny w hosćencach a kofejownjach w centrumje čěskeje stolicy su w zwisku z koronapandemiju wokomiknje wo 30 do 50 procentow niše hač do toho. Mjenowane předewzaća, wusměrjene hewak na wukrajnych turistow, spytaja na te wašnje čěskich ludźi přiwabić. Přiwšěm so mnozy mějićeljo boja, zo dyrbja swoje domy cyle zawrěć.
Policija (05.06.20)
Medicina wina była?
Krušwica. Hač bě znaty přirodny lěk „Klosterfrau Melissengeist“ wina na tym, zo měješe šofer tójšto alkohola w kreji, dyrbi nětko policija w Krušwicy wujasnić. Jako zastojnicy awto 59lětneho wčera rano kontrolowachu, jim alkoholowa chorhojčka hnydom napadny. Muž so wurěčowaše, zo měješe problemy ze žołdkom a zo bě lunk woneho srědka pił. Zo pak je tón dwaj promilej alkohola zawinił, je skerje wěrjenjepodobne.
Porěči wo židowstwje
Smochćicy. Dźěłowy kruh „Zetkanje ze židowstwom“ Smochčanskeho Domu biskopa Bena přeprosy póndźelu, 8. junija, w 19.30 hodź. na přednošk fararja dr. Siegfrieda Foelza. Wječor steji pod hesłom „Što by wot europskeho rozuma zwostało, bychmy-li židowski wotćahnyli?“. Přednošk wěnuje so wliwej židowskeje nabožiny, kultury a stawiznow na Europu a rysuje zdobom wumjezowanje, diskriminaciju, přesćěhanje kaž tež planowane zaničowanje Židow.
Wšitcy zajimcy su wutrobnje witani, zastup je darmotny. Organizatorojo na to skedźbnjeja, zo je přistup do domu jenož dowoleny, hdyž wopytowarjo žane symptomy koronawirusa (suchi kašel, zymicu, mylenje słoda atd.) nimaja. Do zarjadowanja maja so wobdźělnicy při zachodźe wosobinsce registrować dać.
W starowni nałožk pěstowali
Zwony nětko znowa klinča
Klukš (CS/SN). Zwony a zwóńcu Klukšanskeje cyrkwje su minjene tydźenje ponowili. Nětko móže tež najmjeńši zwón zaso klinčeć. Dotal bu wón jeno z jednym hamorom nabity a je tak čas wozjewjał. Tónle Mariny zwón pochadźa z 15. lětstotka a tuž z předreformaciskeho časa.
Hinak hač tamne Klukšanske zwony njetrjebachu najmjeńši ženje za wójnske zaměry wotedać. Wón ma nětko kwaklu z duboweho drjewa. Ze swojim wosebje mjechkim zwukom ma mały zwón předewšěm ke křćeńcam zaklinčeć.
Poprawom chcychu železnej zwonaj z 1950tych lět z nowymaj mjedźanymaj narunać. Ale po tym zo bě wěcywustojny fachowc zwěsćił, zo stej wonej hišće dosć derje zdźeržanej, so rozsudźichu jej jeničce zwuporjedźeć. Wobaj wulkej zwonaj dóstaštej nowu woclowu kwaklu. Po něhdźe štyrjoch tydźenjach twarskeho časa wonej nětko zaso wěsće w zwóńcy wisatej. A dokelž běštej wobaj cyfrownikaj cyrkwineje wěže chětro wusmahnjenej, su jej tohorunja ponowili.
Zelena swěcaza nowe domy
Ležownosće při jězoru budu zjawnje wupisane
Hamor (AK/SN). Młodym swójbam chce Hamorska gmejna móžnosć poskićić, sej swójski dom twarić. W juliju započnu twarsku štwórć na Dróze přećelstwa wutwarjeć. To zdźěli wjesnjanosta Achim Junker (CDU) kónc meje w aktualnej gmejnskej nowinje. „Móžne su jedno-, dwu- a wjaceswójbne domy. Jednotliwe ležownosće pak hišće rozrjadowane njejsu“, wón rozłoži.
Hižo srjedź meje bě gmejnska rada rozsudźiła, zo ma Krušwičanska firma Nadebor za dohromady 316 000 eurow areal wotkryć. Cyłkownu sumu financuje gmejna Hamor z 205 000 eurami, Běłowodźanske měšćanske zawody ze 54 000 eurami a wopłóčkowy zaměrowy zwjazk srjedźna Nysa-Šepc ze 56 000 eurami. Prěni wotrězk wotkrywanja ma hač do kónca lěta hotowy być. Na to chce gmejna ležownosće zjawnje wupisać. Płaćiznu wusměrja na aktualne wiki a na inwesticisku sumu za wotkrywanje. Twarski plan ze wšěmi trěbnymi informacijemi budźe bórze na internetnej stronje gmejny widźeć.
Tobias Koch z Brětnje-Michałkow je we wobłuku lětušeho třělenja ...
W Choćebuzu chódniki ponowjeja
Krótkopowěsće (05.06.20)
Čěska mjezu wočiniła
Praha. Čěska je dźensa po nimale třoch měsacach swoju mjezu k Němskej, Awstriskej a Madźarskej wotewrěła. To je kabinet rano w Praze wobzamknył. Pućowacy njetrjebaja hižo negatiwny test na koronawirus předpołožić. Ministerski prezident Andrej Babiš rjekny: „Je derje, hdyž turisća z mjenowanych krajow swoje pjenjezy zaso w Čěskej wudawaja.
Dalši so wustrowili
Budyšin/Zhorjelc. Staw z koronawirusom natyknjenych je w Hornjej Łužicy stabilny. W Budyskim wokrjesu je jich 496. Ze šěsć dalšimi je so mjeztym 449 ludźi wustrowiło. Ličba postajenych karantenow wučinja aktualnje 69, 2 785 su hižo zběhnyli. W Zhorjelskim wokrjesu je ličba 269 padow hižo tydźeń jenaka, 245 wosobow je tu zaso strowych.
Skónčnje zaso pućować
